ខេត្តបន្ទាយមានជ័យ ៖ នគរបាលជំនាញប្រឆាំងគ្រឿងញៀននៃស្នងការដ្ឋាននគរបាលខេត្តបន្ទាយមានជ័យ បានបញ្ជូនជនសង្ស័យម្នាក់ពីបទជួញដូរគ្រឿងញៀន រួមទាំងវត្ថុតាង ទៅសាលាដំបូងខេត្តបន្ទាយមានជ័យ នៅរសៀលថ្ងៃទី២៧ ខែកញ្ញា ឆ្នាំ២០២០ម្សិលមិញ ដើម្បីចាត់ការតាមនីតិវិធីច្បាប់។ លោកវរសេនីយ៍ឯក ធិន ស៊ិនដេត អធិការនគរបាល ក្រុងប៉ោយប៉ែតបានឲ្យដឹងថា៖ ជនសង្ស័យម្នាក់ ដែលត្រូវបានកម្លាំងនគរបាលផ្នែកប្រឆាំងគ្រឿងញៀន ចុះបង្ក្រាបចាប់ឃាត់ខ្លួន កាលពីវេលាម៉ោង២រសៀល ថ្ងៃទី២៦ ខែកញ្ញា ឆ្នាំ២០២០ នៅចំណុចមណ្ឌល៤ ភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត។
ឈ្មោះ នេត កុសល់ ភេទប្រុស អាយុ៤៤ឆ្នាំ ជនជាតិខ្មែរ មុខរបរជ្រែអីវ៉ាន់ ស្នាក់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ជននេះគឺជាមុខសញ្ញាចាស់ ដែលកម្លាំងនគរបាលក្រុងបានធ្វើការកំណត់ និងតាមដានស្រាវជ្រាវយូរមកហើយទើបឈានដល់ការបង្ក្រាប និងដកហូតបានវត្ថុតាងជាក់ស្តែងមាន៖ ថ្នាំគ្រាប់ពណ៌ស្វាយមានរូបសត្វពីលើចំនួន១១(ដប់មួយ)គ្រាប់និង៥(ប្រាំ)កំណាត់,ម្សៅក្រាមសថ្លាចំនួន១កូនថង់តូច,ម្សៅម៉ត់ស (សង្ស័យខេហិត)ចំនួន៤(បួន)កូនថង់តូច,ថ្នាំគ្រាប់ពណ៌ផ្កាឈូកមានរាងបេះដូងចំនួន៥(ប្រាំ)គ្រាប់,កូនជញ្ជីងថ្លឹងថ្នាំញៀន១,ស្លាបព្រាជ័រសម្រាប់ចូកថ្នាំញៀន៣,ថ្នាំទឹកប្រភេទដបសម្រាប់សម្ងួតខេហិតចំនួន១១(ដប់មួយ)ដប,ដែកកេះសម្រាប់ដុត១ និងសម្បកថង់មួយចំនួន ដែលជនសង្ស័យបានលាក់ទុកនៅក្នុងបន្ទប់ស្នាក់នៅរបស់គេ។
លោកវរសេនីយ៍ឯក ស្រី សារ៉ុម នាយការិយាល័យ នគរបាលប្រឆាំងគ្រឿងញៀន បានឲ្យដឹងថា៖ ជនសង្ស័យរួមទាំងវត្ថុតាង ត្រូវបានកម្លាំងនគរបាលជំនាញ រៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ នៅរសៀលថ្ងៃទី២៨ ខែកញ្ញា ឆ្នាំ២០២០ ដើម្បីចាត់ការតាមនីតិវិធីច្បាប់ហើយដែរ៕ ដោយ ៖ ណុប រក្សា
ចែករំលែកព័តមាននេះ