ខេត្តសៀមរាប ៖ គេថាត្រីកំភ្លាញងាប់ដោយសារតែមាត់ ។ ដូចករណីខាងក្រោមនេះ ដែលអ្នក
ប្រើបណ្តាញ Tik Tok ច្បាស់ជាបានឃើញពីការផុសរូបគ្រឿងចក្រវាយកម្ទេចសំណង់ធ្វើលើចំណីផ្លូវដើម្បីបើកផ្លូវ និងមានឮសំឡេងស្រែកយំទ្រហឹង ប្រៀបដូចជាស្រែកប្រឆាំងគ្រឿងចក្រ តែមិនឃើញក្រុមអ្នកស្រែកឡាំប៉ានោះឡើយ ។ ការពិតគឺជាការបំភ្លៃបែបគំនិតទុច្ចរិត ។
បុរសម្នាក់ឈ្មោះ ទ្រី គឹមហាន អាយុ២៦ឆ្នាំ បានត្រូវឃាត់ខ្លួនដោយសារបានកាត់តបញ្ចូលបន្ថែមសំឡេងស្រែកទ្រហោយំរបស់ប្រជាពលរដ្ឋបំភ្លៃការពិតចោទប្រកាន់មកលើអាជ្ញាធរ ក្នុងបណ្តាញសង្គម Tik Tok និងសរសេរជាខ្លឹមសារថា រដ្ឋបាលខេត្តសៀមរាបចុះរុះរើរបងផ្ទះដោយមិនមានការព្រមព្រៀងពីម្ចាស់ផ្ទះជិត១០០ខ្នង ។
បុរសរូបនេះបានឆ្លើយបំភ្លឺនិងសារភាពកំហុសសុំទោសជាសាធារណៈ ហើយព្រមលុបវីដេអូដែលខ្លួនបានបង្ហោះកន្លងមកពាក់ព័ន្ធនឹងករណីនេះ នាព្រឹកថ្ងៃទី២៧ ខែកញ្ញា ឆ្នាំ២០២០ នៅស្នងដ្ឋានការនគរបាលខេត្ត ។
តាមចម្លើយសារភាព គឺការផុសកាត់តបញ្ចូលសំឡេងនិងចោទប្រកាន់នេះ មានគោលបំណង ដើម្បីចង់បានការចាប់អារម្មណ៍លើគណនីបណ្តាញសង្គម TikTokរបស់ខ្លួន ដែលម្នាក់ៗចង់បានបេះដូង និងទទួលបានផលប្រយោជន៍ពីអាជីវកម្មផ្ទះសំណាក់ផ្ទាល់ខ្លួន ។
សូមបញ្ជាក់ថា បុរសខាងលើនេះមានស្រុកកំណើតនៅខេត្តបាត់ដំបង តែបច្ចុប្បន្នបានមក
រស់នៅក្នុងខេត្តសៀមរាប និងបានជួលផ្ទះដើម្បីប្រកបមុខរបរផ្ទះសំណាក់ ស្ថិតនៅក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប ។
ជាក់ស្តែង បងប្អូនប្រជាពលរដ្ឋនៅលើដងផ្លូវដែលរដ្ឋបាលខេត្តចាប់ផ្តើមរុះរើពីផ្លូវជាតិលេខ៦ ភ្ជាប់ទៅផ្លូវ៧មករា គឺសុទ្ធតែបានសម្រុះសម្រួល និងមានការចូលរួមរុះរើដោយស្ម័គ្រចិត្ត ។ចំណែករូបភាពដែលបុរសរូបនេះយកមកកាត់តនោះ គឺជាសកម្មភាពរបស់អាជ្ញាធរជួយដល់ការរុះរើរបស់ប្រជាពលរដ្ឋ ៕
ចែករំលែកព័តមាននេះ