ខេត្តបន្ទាយមានជ័យ ៖ ក្មេងស្រីចំនួន២នាក់បាននាំគ្នាទៅងូតទឹកលេងនៅចំណុចលូទឹកមួយកន្លែងចុងភូមិ បណ្តាលឲ្យលង់ទឹករហូតបាត់បង់ជីវិតទាំង២នាក់តែម្តង បង្កឱ្យមានការភ្ញាក់ផ្អើលកាលពីម៉ោង៥និង១៥នាទីល្ងាច ថ្ងៃទី២៦ ខែកញ្ញា ឆ្នាំ២០២០ ស្ថិតក្នុងភូមិបុស្បធំ ឃុំតាគង់…
ខេត្តបន្ទាយមានជ័យ ៖ ក្មេងស្រីចំនួន២នាក់បាននាំគ្នាទៅងូតទឹកលេងនៅចំណុចលូទឹកមួយកន្លែងចុងភូមិ បណ្តាលឲ្យលង់ទឹករហូតបាត់បង់ជីវិតទាំង២នាក់តែម្តង បង្កឱ្យមានការភ្ញាក់ផ្អើលកាលពីម៉ោង៥និង១៥នាទីល្ងាច ថ្ងៃទី២៦ ខែកញ្ញា ឆ្នាំ២០២០ ស្ថិតក្នុងភូមិបុស្បធំ ឃុំតាគង់ ស្រុកម៉ាឡៃ ខេត្តបន្ទាយមានជ័យ ។
បើតាមលោកវរសេនីយ៍ឯកបេន សំអាត អធិការនគរបាលស្រុកម៉ាឡៃ បានឲ្យដឹងថា ក្មេងស្រីរងគ្រោះទាំង២នាក់ខាងលើ ម្នាក់ឈ្មោះ ភាព ចំណាន អាយុ១១ឆ្នាំ ជាសិស្ស មានឪពុកឈ្មោះ ភាព តុលា និងម្តាយឈ្មោះ ឡាច ស៊ីណាក់ មានទីលំនៅភូមិបល្ល័ង្គ ឃុំតាគង់ ស្រុកម៉ាឡៃ ខេត្តបន្ទាយមានជ័យ និង ម្នាក់ទៀតឈ្មោះ វ៉ាង សុខវណ្ណ អាយុ៨ឆ្នាំ ជាសិស្ស មានឪពុកឈ្មោះ ផាត់ វ៉ាង និងម្តាយ ឈ្មោះឈឿន ចាន់ណា មានទីលំនៅភូមិបល្ល័ង្គ ឃុំតាគង់ ស្រុកម៉ាឡៃ ខេត្តបន្ទាយមានជ័យ ក្មេងស្រីរងគ្រោះទាំង២នាក់ត្រូវជាបងប្អូនជីដូនមួយនឹងគ្នា ។
លោកអធិការបានបញ្ជាក់ថា នៅមុនពេលកើតហេតុ កុមារីរងគ្រោះទាំង២នាក់បាននាំគ្នាមកងូតទឹកលេងនៅចំណុចលូទឹកចុងភូមិមួយកន្លែង ស្ថិតក្នុងភូមិបុស្សធំ ឃុំតាគង់ ។ ស្របពេលដែលទឹកកំពុងជន់ឡើងមានក្មេងៗជាច្រើនបានមកងូតទឹកលេង ក្នុងនោះក៏មានក្មេងស្រីរងគ្រោះទាំង២នាក់ផងដែរ បាននាំគ្នាមកងូតទឹកលេង ក៏ស្រាប់តែបណ្តាលឲ្យលង់ទឹករហូតបាត់បង់ជីវិតទាំង២នាក់បងប្អូនជីដូនមួយតែម្តង។
ក្រោយពេលកើតហេតុ សមត្ថកិច្ចបានចុះមកធ្វើការពិនិត្យ រួចក៏ប្រគល់សពក្មេងស្រីទាំង២នាក់ទៅឪពុកម្តាយរៀងៗខ្លួន ដើម្បីនាំយកទៅធ្វើបុណ្យតាមប្រពៃណី៕
ចែករំលែកព័តមាននេះ