សត្វប្រវឹកជិត៤០០ក្បាលរួចផុតពីកណ្ដាប់ដៃឈ្មួញ
- សៀមរាប
ខេត្តសៀមរាប ៖ នាថ្ងៃទី២៧ ខែកញ្ញា ឆ្នាំ២០២០ លោក ឃឹម ភីណង់ អភិបាលស្រុកបន្ទាយស្រី ដឹកនាំកម្លាំងជំនាញពាក់ព័ន្ធបានយកសត្វប្រវឹកជិត៤០០ក្បាល…
ខេត្តសៀមរាប ៖ នាថ្ងៃទី២៧ ខែកញ្ញា ឆ្នាំ២០២០ លោក ឃឹម ភីណង់ អភិបាលស្រុកបន្ទាយស្រី ដឹកនាំកម្លាំងជំនាញពាក់ព័ន្ធបានយកសត្វប្រវឹកជិត៤០០ក្បាល ទៅលែងឱ្យមានសេរីភាពឡើងវិញនៅក្នុងតំបន់អភិរក្សនៃសហគមន៍ទេសចរណ៍បឹងឈូក ស្រុកបន្ទាយស្រី ខេត្តសៀមរាប ។
គួររំលឹកផងដែរថា កម្លាំងនគរបាលស្រុកប្រាសាទបាគងបានសហការជាមួយមន្ត្រីរដ្ឋបាលព្រៃឈើ ចុះបង្ក្រាបការដឹកជញ្ជូនសត្វប្រវឹកប្រមាណជា៤០០ក្បាលនេះ ធ្វើឡើងកាលពីវេលាម៉ោង១២និង៣០នាទីយប់រំលងអធ្រាត្រឈានចូលថ្ងៃទី២៦ ខែកញ្ញា ឆ្នាំ ២០២០ នៅចំណុចភូមិជ្រៃ ឃុំកណ្ដែក ស្រុកប្រាសាទ បាគង ខេត្តសៀមរាប។
រថយន្តមួយគ្រឿងដែលដឹកដឹកសត្វប្រវឹកព្រៃជិត៤០០ក្បាលនោះ ម៉ាកឡង់គ្រីស្ស័រ ពណ៌ត្រេអ៊ីប៉ារា៉ ពាក់ស្លាកលេខ ខ.ម 2-6158 ។
ប្រតិបត្តិការចុះបង្ក្រាបករណីខាងលើនេះដែរ សមត្ថកិច្ចបានឃាត់មនុស្ស២នាក់ ជាអ្នកបើកបរនិងអ្នករួមដំណើរ ក្នុងម្នាក់ឈ្មោះ យ៉េង ឈុនហេង ភេទប្រុស អាយុ៣៣ឆ្នាំ រស់នៅភូមិព្រៃឬស្សី សង្កាត់ពន្លក ក្រុងសិរីសោភ័ណ ខេត្តបន្ទាយមានជ័យ និងម្នាក់ទៀតឈ្មោះ ឆាត រស្មី រស់នៅភូមិគាប ឃុំទឹកផ្លា ស្រុកសិរីសោភ័ណ ខេត្តបន្ទាយមានជ័យ។
ជនសង្ស័យបានសារភាពថា សត្វប្រវឹកព្រៃទាំងនេះ ត្រូវបានពួកគេលួចនាំចូលមកពីខេត្តស្រះកែវ ប្រទេសថៃ បម្រុងយកទៅលក់នៅរាជធានីភ្នំពេញ។
បច្ចុប្បន្ន ជនល្មើសទាំងពីរនាក់ត្រូវបានមន្ត្រីជំនាញរដ្ឋបាលព្រៃឈើ រៀបចំកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ