ខេត្តកំពង់ឆ្នាំង ៖ គួរឱ្យសង្វេគណាស់ មន្ត្រីយោធាម្នាក់បានបាត់បង់ជីវិតដោយសារតែធ្លាក់ចូលទឹកស្រះ ខណៈព្យាយាមចូលរួមដេញតាមចាប់ក្រុមចោរស្រីប្រុស២នាក់ដែលធ្វើសកម្មភាពកាច់សោ.កលួចយកម៉ូតូគេមួយគ្រឿង បង្កឱ្យមានការភ្ញាក់ផ្អើលកាលពីម៉ោងប្រមាណ៣រសៀល ថ្ងៃទី២៧ ខែកញ្ញា ឆ្នាំ២០២០ នៅចំណុចមាត់ទន្លេ…
ខេត្តកំពង់ឆ្នាំង ៖ គួរឱ្យសង្វេគណាស់ មន្ត្រីយោធាម្នាក់បានបាត់បង់ជីវិតដោយសារតែធ្លាក់ចូលទឹកស្រះ ខណៈព្យាយាមចូលរួមដេញតាមចាប់ក្រុមចោរស្រីប្រុស២នាក់ដែលធ្វើសកម្មភាពកាច់សោ.កលួចយកម៉ូតូគេមួយគ្រឿង បង្កឱ្យមានការភ្ញាក់ផ្អើលកាលពីម៉ោងប្រមាណ៣រសៀល ថ្ងៃទី២៧ ខែកញ្ញា ឆ្នាំ២០២០ នៅចំណុចមាត់ទន្លេ ស្ថិតក្នុងភូមិកំពង់ត្រឡាចក្រោម ឃុំកំពង់ត្រឡាច ស្រុកកំពង់ត្រឡាច ។
យ៉ាងណានេះក្តី ក្រុមចោរស្រីប្រុសទាំង២នាក់ខាងលើ ក៏ត្រូវបានកម្លាំងសមត្ថកិច្ចសហការជាមួយប្រជាការពារ និងប្រជាពលរដ្ឋស្ទាក់ចាប់បាន ដើម្បីកសាងសំណុំរឿងតាមផ្លូវច្បាប់ហើយ។
តាមការបញ្ជាក់ពីលោកអធិការនគរបាលស្រុកកំពង់ត្រឡាច បានឱ្យដឹងថា ៖ មន្ត្រីយោធាដែលទទួលគ្រោះថ្នាក់រហូតបាត់បង់ជីវិតខាងលើឈ្មោះ សាយ វិសាល ភេទប្រុស អាយុ១៨ឆ្នាំ ជាទាហាននៅវរៈទី៣ កងពលតូចអន្តរាគមន៍លេខ១លង្វែក មានទីលំនៅស្រុកសាមគ្គីមានជ័យ ។ ចំណែកជនសង្ស័យជាចោរទាំង២នាក់ដែលចាប់ខ្លួន មានម្នាក់ឈ្មោះសេន ឡឹប ភេទប្រុស អាយុ៣៤ឆ្នាំ រស់នៅភូមិកញ្ជោង ឃុំច្រេស ស្រុកកំពង់ត្រឡាច និងម្នាក់ទៀតឈ្មោះ សេង ពេជ្រ ភេទស្រី អាយុ៣៥ឆ្នាំ រស់នៅស្រុកពញាឮ ខេត្តកណ្តាល ។
លោកអធិការនគរបាលស្រុកកកំពង់ត្រឡាច បានបន្តថា មុនពេលកើតហេតុ នៅហាងលក់គ្រឿងក្លែមរបស់ឈ្មោះឡាន មានករណីលួចកាច់សោ.កយកម៉ូតូមួយគ្រឿងជារបស់ឈ្មោះ សាំង សុភ័ក្រ ភេទប្រុស អាយុ២៤ឆ្នាំ មានទីលំនៅភូមិដំណាក់អំពិល ឃុំត្បែងខ្ពស់ ស្រុកសាមគ្គីមានជ័យ ហើយក៏មានការឆោឡោឡើងតែម្តង ។
ភ្លាមៗនោះ លោកក៏បានបញ្ជាតាមវិទ្យុទាក់ទងដល់សមត្ថកិច្ចនគរបាលប៉ុស្តិ៍រដ្ឋបាល សហការជាមួយប្រជាការពារ ដើម្បីអន្តរាគមន៍ស្ទាក់ចាប់មុខសញ្ញាចោរ ។ ជាមួយគ្នានោះដែរ មន្ត្រីយោធាម្នាក់ឈ្មោះ សាយ វិសាល ដែលនៅជិតកន្លែងកើតហេតុនោះ បានឃើញសកម្មភាពនេះ ក៏ចូលរូមដេញចាប់ក្រុមចោរប្រុសស្រីនោះនឹងគេដែរ ។
លោកអធិការបានបន្តថា ដោយសារតែមេឃភ្លៀងរលឹមផង ធ្វើឱ្យស្ថានភាពផ្លូវមានការរអិល ចំណែកឯជនសង្ស័យទាំង២នាក់មិនអាចបើកម៉ូតូលឿនបានទេ លុះពេលមកដល់ពាក់កណ្តាលផ្លូវក៏ជួបនឹងសមត្ថកិច្ចដែលកំពុងស្ទាក់ចាប់ ដោយឃើញដូច្នេះជនសង្ស័យទាំង២ក៏បានផ្តួលម៉ូតូបំណងរត់គេចខ្លួន ប៉ុន្តែត្រូវបានសមត្ថកិច្ចចាប់បានម្នាក់ជាមនុស្សស្រី ចំណែកម្នាក់ទៀតជាមនុសុ្សប្រុសបានរត់គេចខ្លួនបន្ត ហើយត្រូវកម្លាំងសមត្ថកិច្ចដេញចាប់បន្តផងដែរ ។
ប្រភពដដែលបន្តថា ក្នុងគ្រាដែលដេញតាមចាប់ចោរម្នាក់ទៀតនោះ មានរឿងគួរសោកស្តាយ គឺខណៈពេលដែលសមត្ថកិច្ចបន្តដេញចាប់ខ្លួនជនសង្ស័យ ក៏ស្រាប់តែមន្ត្រីយោធាម្នាក់ដែលបានចូលរួមសកម្មភាពដេញចាប់ចោរនោះដែរ បានរអិលធ្លាក់ចូលទឹកស្រះដែលមានជម្រៅជ្រៅ បណ្តាលឱ្យលង់ទឹកបាត់បង់ជីវិត តែម្តង (ព្រោះតែមិនចេះហែលទឹក) ។ ចំណែកជនសង្ស័យម្នាក់ទៀតដែលព្យាយាមរត់គេចខ្លួន ក៏ត្រូវសមត្ថកិច្ចចាប់ខ្លួនបានដែរ។
ក្រោយពេលកើតហេតុ ជនសង្ស័យទាំង២នាក់រួមនឹងវត្ថុតាងមានម៉ូតូ១គ្រឿង និងដែកអក្សរតេ សម្រាប់ធ្វើសកម្មភាពកាច់សោ.កម៉ូតូ ត្រូវបានសមត្ថកិច្ចកសាងសំណុំរឿងបញ្ជូនមកកាន់ស្នងការដ្ឋាននគរបាលខេត្ត ដើម្បីបន្តនីតិវិធី ។ ដោយឡែកមន្ត្រីយោធារងគ្រោះក្នុងហេតុការណ៍ជួយដេញចាប់ជនក្រុមចោរនោះបានបញ្ជូនទៅក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ