រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ បានធ្វើការព្រមានថា នឹងចាត់វិធានការចំពោះម្ចាស់សណ្ឋាគារ ភោជនីយដ្ឋាន និងម្ចាស់អាជីវកម្ម ដែលនៅតែបន្តលួចបង្ហូរទឹកស្អុយចូលសមុទ្រផ្គើនទៅនឹងបម្រាម និងប៉ះពាល់ដល់បរិស្ថាន ។តាមលោករដ្ឋមន្ត្រី ម្ចាស់អាជីវកម្មទាំងនោះបានប្រើរូបភាពបង្ហូរទឹកស្អុយចូលសមុទ្រនៅពេលយប់ គ្រាដែលពេលថ្ងៃគេបិទលូបង្ហូរជាធម្មតា ដើម្បីបំភាន់ភ្នែកអាជ្ញាធរ និងមន្ត្រីជំនាញ ។
លោករដ្ឋមន្ត្រី ថោង ខុន បានអះអាងថាសេចក្តីព្រាងច្បាប់នេះ ឆ្លុះបញ្ចាំងអំពីកិច្ចខិតខំប្រឹងប្រែងរបស់កម្ពុជា ក្នុងការយកចិត្តទុកដាក់ចំពោះតំបន់ឆ្នេរសមុទ្រ ក្នុងទិសដៅអនុវត្តច្បាប់ និងគោលការណ៍បទដ្ឋានអន្តរជាតិនានា ពិសេសកិច្ចព្រមព្រៀងទីក្រុង Rio ឆ្នាំ១៩៩២ ស្តីពី «បរិស្ថាន និងការអភិវឌ្ឍ» ។ ច្បាប់នេះត្រូវបានរៀបចំឡើងក្នុងគោលបំណងដើម្បីបំពេញបន្ថែម (Complementary) លើច្បាប់ និងបទដ្ឋានគតិយុត្តដែលមានស្រាប់ សំដៅធានារក្សាតុល្យភាពរវាងការអភិវឌ្ឍ និងការអភិរក្ស សម្រាប់គ្រប់គ្រងលើសកម្មភាពអវិជ្ជមានដែលកំពុងកើតមាននៅតំបន់ឆ្នេរ ដោយក្នុងនោះមានការគិតគូរពីបញ្ហាបម្រែបម្រួលអាកាសធាតុ ការថែរក្សាជីវចម្រុះក្នុងទឹក និងលើដីគោក តុល្យភាពរវាងសកម្មភាពសេដ្ឋកិច្ច ទេសចរណ៍ និងការថែរក្សាសម្បត្តិធម្មជាតិតាមរយៈការដាក់ចេញនូវយន្តការនៃការបង្ការ (Prevention) សម្រាប់គម្រោងអភិវឌ្ឍន៍នានានៅពេលអនាគត និងយន្តការស្តារឡើងវិញ (Restoration) ។ ច្បាប់នេះមានវិសាលភាពនៃការអនុវត្តក្នុងដែនដីកំណត់មួយជាក់លាក់ ដែលហៅថា តំបន់ឆ្នេរ (Littoral) ក្នុងនោះមានតំបន់អាងសមុទ្រ ដែលគិតចាប់ពីតំបន់ជម្រាលភ្នំរហូតដល់ព្រែកដៃសមុទ្រ ដោយរួមបញ្ចូលទាំងឆ្នេរ ដីកោះ និងដែនសមុទ្រដែលស្ថិតនៅចន្លោះកោះ និងដីគោក ។
គួរបញ្ជាក់ថា ក្នុងឆ្នាំ២០១៤កន្លងមក ចំនួនភ្ញៀវទេសចរអន្តរជាតិដែលមកទស្សនាតំបន់ឆ្នេរមានចំនួនប្រមាណជាង៥៧ម៉ឺននាក់ កើនឡើងប្រមាណជិត១១% ធៀបនឹងឆ្នាំ២០១៣ ។ យើងសង្ឃឹមថា នៅឆ្នាំ២០២០ ចំនួនភ្ញៀវទេសចរអន្តរជាតិដែលមកទស្សនាតំបន់ឆ្នេរមានប្រមាណពី១,៥ទៅ២លាននាក់ និងទេសចរក្នុងស្រុកប្រមាណ៤លាននាក់ នៅពេលមានការតភ្ជាប់តាមផ្លូវអាកាសក្នុងស្រុក និងក្នុងតំបន់ ហេដ្ឋារចនាសម្ព័ន្ធ ផ្លូវរថភ្លើង ផ្លូវគោក កាន់តែត្រូវបានអភិវឌ្ឍល្អ ៕
ចែករំលែកព័តមាននេះ