រាជធានីភ្នំពេញ ៖ សហគ្រាសផលិតឱសថ PPM និងសាកលវិទ្យាល័យវិទ្យាសាស្ត្រសុខាភិបាល បានចុះអនុស្សរណៈយោគយល់គ្នាលើការផ្ដល់អាហារូបករណ៍ ឱកាសកម្មសិក្សា និងការងារ ព្រមទាំងពានរង្វាន់គីណាល់ សម្រាប់និស្សិត ផងដែរ ។ ពិធីចុះ MOU នេះធ្វើឡើងនៅ សាកលវិទ្យាល័យវិទ្យាសាស្ត្រសុខាភិបាល កាលពីព្រឹកថ្ងៃទី ២៦ មីនា ២០១៥ រវាងលោក ឧកញ៉ា ហៃ លីអ៊ាង ប្រធានអគ្គនាយកសហគ្រាសផលិតឱសថ PPM និងលោក សាផុន វឌ្ឍនៈ សាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាល ។
លោកឧកញ៉ា ហៃ លីអ៊ាង ប្រធានអគ្គនាយកសហគ្រាសផលិតឱសថ PPM បានមានប្រសាសន៍ថា អនុស្សរណៈយោគយល់គ្នានេះបង្កើតឡើងដើម្បីជំរុញការធ្វើសហប្រតិបត្តិការរវាងស្ថាប័នទាំងពីរ អោយកាន់តែស្អិតរមួតនិងរលូន ក្នុងគោលបំណងលើកស្ទួយគុណភាពសិក្សារបស់និស្សិតផ្នែកឱសថសាស្ត្រ ក៏ដូចជាការរួមចំនែកលើកកម្ពស់វិស័យសុខាភិបាលរបស់ជាតិ តាមរយៈការផ្ដល់អាហារូបករណ៍ ការផ្ដល់ឱកាសចុះកម្មសិក្សា និងការងារ ព្រមទាំងការបង្កើតពានរង្វាន់គីណាល់ដែលផ្ដោតទៅលើការសិក្សាស្រាវជ្រាវផ្នែកវិទ្យាសាស្ត្រសុខាភិបាល ។ នៅក្នុងអនុស្សរណៈយោគយល់នេះដែរ សហគ្រាសផលិតឱសថ PPM នឹងផ្ដល់អាហារូបករណ៍ចំពោះនិស្សិតឆ្នើមក្នុងការសិក្សា ហើយទទួលយកនិស្សិតផ្នែកឱសថសាស្ត្រ ទៅធ្វើកម្មសិក្សាជារៀងរាល់ឆ្នាំដែលមានចំនួនអតិបរមា២០០នាក់ ។ ម្យ៉ាងទៀតរៀងរាល់ឆ្នាំ សហគ្រាសផលិតឱសថ PPM នឹងសហការជាមួយសាកលវិទ្យាល័យ វិទ្យាសាស្ត្រសុខាភិបាល រៀបចំកម្មវិធីប្រកួតប្រជែងស្នាដៃអត្ថបទស្រាវជ្រាវពានរង្វាន់ គីណាល់ ដែលជាកម្មវិធីតែមួយគត់នៅព្រះរាជាណាចក្រកម្ពុជា បង្កើតឡើងដើម្បីលើកស្ទួយ ការសិក្សាស្រាវជ្រាវរបស់និស្សិតឱសថសាស្ត្រ ។
លោកបន្តថា ទាំងនេះគឺជាសុឆន្ទៈរបស់លោកផ្ទាល់ក៏ដូចជាក្រុមហ៊ុនដែលចង់ចូលរួមចំណែកក្នុងការអភិវឌ្ឍន៍ធនធានមនុស្សលើវិស័យសុខាភិបាលទាំងចំណេះដឹង និងបច្ចេកទេសតាមរយៈការផ្ដល់អាហារូបករណ៍ ឱកាសកម្មសិក្សានិង ការងារជូននិស្សិត ។ ចំពោះគីណាល់ គឺក្រុមហ៊ុនលោក និងសាកលវិទ្យាល័យវិទ្យាសាស្ត្រសុខាភិបាល បានសហការបង្កើតរួមគ្នារយៈពេលពីរឆ្នាំដោយជោគជ័យរួចមកហើយ និងសង្ឃឹមថាការសហការគ្នានេះនឹងបន្តទៅមុខបានល្អប្រសើរទៀត ។
លោកសាស្ត្រាចារ្យ សាផុន វឌ្ឍនៈ សាកលវិទ្យាធិការនៃសាកលវិទ្យាល័យ វិទ្យាសាស្ត្រសុខាភិបាលបានមានប្រសាសន៍ដែរថា តាងនាមអោយសាកលវិទ្យាល័យ លោកសូមវាយតម្លៃខ្ពស់ដល់កិច្ចសហការនេះ និងសូមថ្លែងអំណរគុណចំពោះសហគ្រាសផលិតឱសថ PPM ដែលតែងតែជួយផ្ដល់ឱកាសដល់និស្សិតរបស់លោកអោយបានចុះកម្មសិក្សា និងទទួលបានការងារក្រោយពួកគេបញ្ចប់ការសិក្សា ៕
ចែករំលែកព័តមាននេះ