រាជធានីភ្នំពេញ ៖ តាមការគ្រោងទុកនៅថ្ងៃអាទិត្យសប្ដាហ៍នេះនឹងមានការប្រដាល់អន្តរជាតិ២ព្រឹត្តិការណ៍ត្រូវបានរៀបចំឡើងនៅលើសង្វៀនទូរទស្សន៍អាស៊ីអាគ្នេយ៍ (SEA TV) ដើម្បីកំដរបរិយាកាសនៅចុងបញ្ចប់
រាជធានីភ្នំពេញ ៖ តាមការគ្រោងទុកនៅថ្ងៃអាទិត្យសប្ដាហ៍នេះនឹងមានការប្រដាល់អន្តរជាតិ២ព្រឹត្តិការណ៍ត្រូវបានរៀបចំឡើងនៅលើសង្វៀនទូរទស្សន៍អាស៊ីអាគ្នេយ៍ (SEA TV) ដើម្បីកំដរបរិយាកាសនៅចុងបញ្ចប់នៃខែមីនានេះ ។ ការកំណត់នេះដើម្បីឲ្យស្របនឹងគោលការណ៍ឆ្លាស់គ្នាមួយសប្ដាហ៍ប្រដាល់ក្នុងស្រុក និងមួយសប្ដាហ៍ប្រដាល់អន្តរជាតិ បន្ទាប់ពីសប្ដាហ៍មុន គឺជាការប្រកួតក្នុងស្រុករួចទៅហើយ ។ យ៉ាងណាក៏ដោយ ការរំពឹងទុកនោះមិនបានកើតឡើងឡើយដោយទាល់តែសប្ដាហ៍បន្ទាប់មួយទៀតទើបដំណើរការជាធម្មតា ។
ព្រឹត្តិការណ៍ប្រដាល់អន្តរជាតិនោះ គឺការប្រដាល់ពេលព្រឹករបស់ស្រាបៀរ Gangburg និងការប្រដាល់ពេលយប់របស់ស្រាបៀរ Black Cat ដែលមានមហាជនភាគច្រើនផ្ដោតការចាប់អារម្មណ៍ ។ លោកញាណ សុធី អ្នករៀបចំការប្រដាល់ប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ព្រឹត្តិការណ៍ទាំងពីរនឹងត្រូវលើកពេលមួយសប្ដាហ៍ ដោយមិនធ្វើការប្រដាល់អន្តរជាតិតាមការឆ្លាស់គ្នាជាក់ស្ដែងនោះទេ ដោយសារតែវាស្ថិតនៅក្នុងលក្ខខណ្ឌពិសេសខុសពីសប្ដាហ៍ធម្មតា ។ ជាធម្មតាការប្រដាល់ទាំងបីព្រឹត្តិការណ៍នៅថ្ងៃអាទិត្យរបស់ទូរទស្សន៍អាស៊ីអាគ្នេយ៍ គឺត្រូវឆ្លាស់គ្នាមួយសប្ដាហ៍ម្នាក់ជាមួយការប្រដាល់ក្នុងស្រុក ។
បើផ្អែកតាមហេតុផលនេះ លោកថា ការប្រដាល់នៅពេលព្រឹក និងពេលយប់ថ្ងៃអាទិត្យទី២៩ មីនានេះ នឹងត្រូវប្រកួតជាលក្ខណៈអន្តរជាតិ ។ ប៉ុន្តែមកពីមានខាងប៉ុស្ដិ៍ដោយផ្ទាល់ផ្ដល់ការប្រកួតអន្តរជាតិឲ្យ
ព្រឹត្តិការណ៍នីមួយៗបានតែ២ដងក្នុងមួយខែ ទើបនៅសប្ដាហ៍នេះ នៅតែជាការប្រកួតរវាងកីឡាករក្នុងស្រុកដដែល បើទោះជាសប្ដាហ៍មុនក៏បានប្រកួតជាលក្ខណៈក្នុងស្រុកដូចគ្នា ។ លោកពន្យល់ថា តាមការព្រមព្រៀងជាមួយម្ចាស់ឧបត្ថម្ភកម្មវិធី ការប្រកួតអន្តរជាតិ២ត្រូវកំណត់ធ្វើឡើងតែរៀងរាល់សប្ដាហ៍ទី១ និងសប្ដាហ៍ទី៣ប៉ុណ្ណោះសម្រាប់ព្រឹត្តិការណ៍ប្រដាល់ពេលព្រឹក និងពេលយប់ ខណៈដែលការប្រដាល់នៅពេលរសៀល ក៏ត្រូវកំណត់ឲ្យមានការប្រកួតអន្តរជាតិតែរៀងរាល់សប្ដាហ៍ទី២ និងទី៤ ដើម្បីឆ្លាស់គ្នានោះវិញ ។
អញ្ចឹងហើយទើបក្នុងខែមីនា ការប្រកួតក្នុងស្រុកនឹងត្រូវធ្វើឡើងដល់២សប្ដាហ៍ជាប់គ្នាដោយសារតែក្នុងខែនេះ ថ្ងៃអាទិត្យមានដល់ទៅ៥ថ្ងៃ ហើយថ្ងៃទី៥ គឺមិនមានការកំណត់ឲ្យប្រកួតជាអន្តរជាតិនោះឡើយ ។ លោកនិយាយថា «ជាគោលការណ៍សម្រាប់ការប្រដាល់ពេលព្រឹក និងពេលយប់ យើងឲ្យមានការប្រកួតអន្តរជាតិតែក្នុងសប្ដាហ៍ទី១ និងទី៣ទេ អញ្ចឹងបើខែហ្នឹងមានថ្ងៃអាទិត្យ៥ដង មានន័យថា ថ្ងៃសប្ដាហ៍ទី៤ ក៏ជាការប្រកួតក្នុងស្រុក ហើយក្នុងសប្ដាហ៍ទី៥ ក៏ជាការប្រកួតក្នុងស្រុកផងដែរ គឺអត់ប្រើគោលការណ៍ឆ្លាស់ដូចធម្មតាទេ!» ។ លក្ខខណ្ឌនេះក្នុងមួយឆ្នាំ គឺកើតឡើងប្រហែលជា២ទៅ៣ដង ដោយសារតែយូរៗម្ដងមានថ្ងៃអាទិត្យ៥ថ្ងៃក្នុង១ខែ ដែលលើសពីការគ្រោងទុកជាពិសេសដូចជាក្នុងខែមីនានេះជាភស្ដុតាងស្រាប់។ ជាមួយនឹងការបញ្ជាក់នេះមានការយល់ឃើញថា នៅសប្ដាហ៍ក្រោយនឹងមានការប្រដាល់ជាលក្ខណៈអន្តរជាតិជាន់គ្នាដល់ទៅ៣ព្រឹត្តិការណ៍តែម្ដងដោយសារតែព្រឹត្តិការណ៍ប្រដាល់ពេលរសៀល ដែលមានការប្រកួតជាលក្ខណៈក្នុងស្រុក នៅថ្ងៃអាទិត្យនេះ ក៏ត្រូវឆ្លាស់ដោយការប្រកួតជាមួយបរទេសផងដែរ ។
ពាក់ព័ន្ធនឹងបញ្ហានេះ មន្ត្រីជាអ្នករៀបចំបានច្រានចោល និងអះអាងថា នៅសប្ដាហ៍ក្រោយ ព្រឹត្តិការណ៍អន្តរជាតិរបស់កម្មវិធីប្រដាល់ពេលរសៀល ក៏ត្រូវលុបចោល និងលើកពេលផងដែរ ដោយមិនមាននោះទេ ។ លោកបានថ្លែងតាមទូរស័ព្ទថា «បានធ្វើតាមឆ្លាស់ កម្មវិធីពេលរសៀលនឹងត្រូវប្រកួតអន្តរជាតិដែរ ប៉ុន្តែដោយសារយើងបានកំណត់ថា មួយព្រឹត្តិការណ៍ត្រូវឲ្យមានការប្រកួតបែបហ្នឹងតែ២លើក ហើយត្រូវធ្វើឲ្យមានភាពឆ្លាស់គ្នាកុំឲ្យជាន់ការប្រដាល់ពេលព្រឹក និងពេលយប់ ទើបកម្មវិធីពេលរសៀលនៅសប្ដាហ៍ក្រោយអត់មានប្រដាល់អន្តរជាតិវិញ»។ លោកអះអាងថា នៅសប្ដាហ៍ក្រោយ អ្វីៗនឹងប្រក្រតីតាមលំដាប់លំដោយនៃខែថ្មីជាធម្មតាដោយមិនរាប់បញ្ចូលអ្វីៗដែលបានរៀបចំសម្រាប់សប្ដាហ៍នេះឡើយ ។ លោកក៏អះអាងពីការភ្លេចភ្លាំង និងភ័ន្តច្រឡំដោយខ្លួនឯងម្ដងៗផងដែរ ដោយសារតែការរៀបចំ គឺមិនបានគិតដល់រឿងថ្ងៃអាទិត្យសប្ដាហ៍ទី៥ អីនោះទេ គឺចាំមាត់ទទេ ថាត្រូវឆ្លាស់គ្នាជាមួយការប្រដាល់ក្នុងស្រុកមួយអាទិត្យម្នាក់ ។
ចាប់តាំងពីបើកដំណើរការមានករណីបែបនេះចំនួន៣លើកមកហើយ ប៉ុន្តែអ្នកទស្សនាភាគច្រើនបូករួមទាំងរូបលោកផង គឺនៅតែភ្លេច និងមិនបានផ្ដល់ការជូនដំណឹងឲ្យទាន់ពេលវេលា ។ ជាមួយនឹងការបញ្ជាក់នេះ អ្នកទស្សនាដែលរំពឹងថា នឹងបានសប្បាយភ្នែកជាមួយការប្រដាល់អន្តរជាតិទាំង២ព្រឹត្តិការណ៍នឹងមិនបានដូចចិត្តនោះទេក្នុងពេលដែលការឆ្លាស់គ្នា មិនត្រូវបានអនុវត្តសម្រាប់ថ្ងៃអាទិត្យនេះ ។ យ៉ាងណាក៏ដោយ មន្ត្រីជាអ្នករៀបចំក៏អះអាងថា បានផ្គូផ្គងឲ្យមានការប៉ះគ្នារវាងកីឡាករក្នុងស្រុកល្អៗជំនួសឲ្យការលុបចោល ហើយរំកិលឡើងមួយសប្ដាហ៍នៃការប្រកួតអន្តរជាតិទាំងពីរនោះផងដែរ ៕
ចែករំលែកព័តមាននេះ