រាជធានីភ្នំពេញ ៖ បន្ទាប់ពីបានឆ្លងកាត់ការប្រកួតជ្រើសរើសជើងឯកថ្នាក់ជាតិកាលពីពេលថ្មីៗកន្លងមកនេះ សហព័ន្ធកីឡាវាយសីកម្ពុជាបានរកឃើញកីឡាករ៦រូបដែលមានសមត្ថភាពគ្រប់គ្រាន់សម្រាប់ត្រៀមបញ្ជូនទៅចូលរួមប្រកួតកីឡាស៊ីហ្គេមលើកទី២៨ ឆ្នាំ២០១៥ នៅប្រទេសសិង្ហបុរី ។
លោកជាម សុភា អគ្គលេខាធិការរងសហព័ន្ធកីឡាវាយសីកម្ពុជាបានឱ្យដឹងថា កីឡាករជម្រើសជាតិទាំង៦រូបនេះត្រូវបានសហព័ន្ធធ្វើលិខិតស្នើទៅក្រសួងអប់រំ យុវជន និងកីឡារួចហើយ បុ៉ន្តែសេចក្តីសម្រេចនៅមិនទាន់ធ្លាក់មកនៅឡើយទេ ។ ទោះបីជាយ៉ាងណា អ្នកទាំង៦រូបនេះប្រហែលជាគ្មានការកែប្រែអ្វីឡើយ។ តាមការឱ្យដឹងបន្ថែម សហព័ន្ធកីឡាវាយសីកម្ពុជាត្រៀមបញ្ជូនកីឡាករ៦រូប និងប្រតិភូដឹកនាំ២រូបទៀត ដែលសរុបទាំងអស់៨រូប ក្នុងនោះថ្នាក់ដឹកនាំមានលោក ជាម សុភា, លោកដែង ទិត្យរស្មី ចំណែកកីឡាករមាន ទាវ យុ៉ងវណ្ណៈ, ងួន កាណូរ៉ា, ទេព ចាន់ម៉ារ៉ា, យ៉ាន កុសល, ចេង ភារុំ និង អេង ភារម្យ ។
លោកជាម សុភា បានឱ្យដឹងបន្ថែមទៀតថា សហព័ន្ធកីឡាវាយសីកម្ពុជា មុននឹងបញ្ជូនកីឡាករណាម្នាក់ឱ្យទៅចូលរួមប្រកួតក្នុងព្រឹត្តិការណ៍អន្តរជាតិ សុទ្ធតែបានឆ្លងកាត់ការប្រកួតជ្រើសរើសយ៉ាងសម្រិតសម្រាំងរកអ្នកដែលមានសមត្ថភាពគ្រប់គ្រាន់ដើម្បីចៀសវាងនូវពាក្យថា បក្ខពួកនិយម ។ ជាក់ស្តែងកីឡាករទាំង៦រូបនេះមុននឹងសហព័ន្ធសម្រេចចិត្តដាក់សំណើទៅក្រសួងអប់រំ សុទ្ធតែបានធ្វើការជ្រើសរើសយ៉ាងត្រឹមត្រូវតាមរយៈការប្រកួតជ្រើសរើសជើងឯកថ្នាក់ជាតិ ។ សម្រាប់ការទៅចូលរួមប្រកួតកីឡាស៊ីហ្គេមលើកនេះ ក្រុមកីឡាករជម្រើសជាតិកម្ពុជាមានជំនឿចិត្តយ៉ាងច្រើនក្នុងការយកឈ្នះលើប្រទេសមួយចំនួនដូចជា មីយ៉ាន់ម៉ា ឡាវ ទីម័រខាងកើត និងព្រុយណេជាដើម ។
បុ៉ន្តែសម្រាប់បណ្តាប្រទេសមួយចំនួនទៀតដែលមានដូចជា វៀតណាម ថៃ ម៉ាឡេស៊ី និងសិង្ហបុរី សុទ្ធតែជាប្រទេសខ្លាំងមិនអាចប្រៀបផ្ទឹមជាមួយគេបានឡើយ ។ ទោះជាយ៉ាងណា រៀងរាល់លើក មុននឹងបញ្ជូនកីឡាករឱ្យទៅចូលរួមប្រកួតនៅក្នុងព្រឹត្តិការណ៍ណាមួយ សហព័ន្ធតែងបញ្ជូនក្រុមកីឡាករទាំងនោះឱ្យទៅហ្វឹកហាត់នៅបណ្តាប្រទេសផ្សេងៗ ។ បុ៉ន្តែឆ្នាំនេះ រហូតមកដល់ពេលនេះ នៅមិនទាន់បានបញ្ជូនទៅហ្វឹកហាត់នៅប្រទេសណាមួយនៅឡើយនោះទេ ។ តាមគម្រោងប្រហែលជាត្រូវបញ្ជូនឱ្យទៅហ្វឹកហាត់នៅប្រទេសម៉ាឡេស៊ី គ្រាន់តែមិននៅពុំទាន់ដល់ពេល រង់ចាំដល់កៀកថ្ងៃប្រកួតទើបបញ្ជូនទៅ ហើយនៅថ្ងៃបញ្ចប់ទើបបញ្ជូនបន្តឱ្យទៅប្រកួតស៊ីហ្គេមតែម្តង ៕
ចែករំលែកព័តមាននេះ