រាជធានីភ្នំពេញ ៖ ក្រសួងសុខាភិបាលបានបញ្ជាក់និងអះអាងថា បានរកឃើញបុរសជនជាតិហុងគ្រីម្នាក់ឆ្លងជំងឺកូវីដ១៩ និងកំពុងស្វែងរកអ្នកប៉ះពាល់ជាបន្តទៀត បន្ទាប់បុរសម្នាក់នេះរត់ចេញពីមណ្ឌលចក្តាឡីស័ក។ យោងតាមជូនដំណឹងរបស់ក្រសួងសុខាភិបាលចេញផ្សាយនៅថ្ងៃទី២៧ ខែកញ្ញា ឆ្នាំ ២០២០…
រាជធានីភ្នំពេញ ៖ ក្រសួងសុខាភិបាលបានបញ្ជាក់និងអះអាងថា បានរកឃើញបុរសជនជាតិហុងគ្រីម្នាក់ឆ្លងជំងឺកូវីដ១៩ និងកំពុងស្វែងរកអ្នកប៉ះពាល់ជាបន្តទៀត បន្ទាប់បុរសម្នាក់នេះរត់ចេញពីមណ្ឌលចក្តាឡីស័ក។
យោងតាមជូនដំណឹងរបស់ក្រសួងសុខាភិបាលចេញផ្សាយនៅថ្ងៃទី២៧ ខែកញ្ញា ឆ្នាំ ២០២០ បានលើកឡើងថា បុរសជនជាតិហុងគ្រីអាយុ៧០ឆ្នាំ រស់នៅក្នុងបុរីអាថែន ភូមិគ្រូស សង្កាត់ស្វាយដង្គំ ក្រុងសៀមរាប ខេត្តសៀមរាប លទ្ធផលធ្វើតេស្ត គឺវិជ្ជមានវីរុសកូវីដ១៩ ដែលបានបញ្ជាក់ពីវិទ្យាប៉ាស្ទ័កម្ពុជា ហើយដែលក្រសួងសុខាភិបាល បានចេញសេចក្តីជូន ព័ត៌មានរួចមទាំងធ្វើប្រវត្តិដំណើររបស់គាត់ ជម្រាបជូនសាធារណជននារសៀលថ្ងៃទី២៦ ខែកញ្ញា ឆ្នាំ២០២០ រួចហើយ។
ក្រសួងសុខាភិបាលបានលើកឡើងទៀតថា ក្រុមការងារឆ្លើយតបបន្ទាន់នៃមន្ទីរសុខាភិបាលខេត្តសៀមរាប និងនៃនាយកដ្ឋានប្រយុទ្ធនឹងជំងឺឆ្លងរបស់ក្រសួងសុខាភិបាល ដោយសហការជាមួយអង្គការសុខភាពពិភពលោក និងមជ្ឈមណ្ឌលគ្រប់គ្រង និងបង្ការជំងឺឆ្លងសហរដ្ឋអាមេរិក បាននិងកំពុងធ្វើការស្រាវជ្រាវរកអ្នកប៉ះពាល់ជាមួយអ្នកជំងឺខាងលើ ហើយក្រសួងសូម ជម្រាបជូនដូចតទៅ ភរិយាបុរសជនជាតិហុងគ្រីនេះ ជាស្ត្រីជនជាតិខ្មែរ កំពុងធ្វើចត្តាឡី ស័កចំនួន១៤ថ្ងៃ និងធ្វើការតាមដានសុខភាព នៅក្នុងមន្ទីរពេទ្យខេត្តសៀមរាប។ លទ្ធផល តេស្តលើកទី១របស់គាត់ គឺ អវិជ្ជមានវីរុសកូវីដ-១៩ នៅថ្ងៃទី ២៦ ខែកញ្ញា ឆ្នាំ២០២០ នេះ។
អ្នកបើកម៉ូតូកង់បី (តុតុ) នៅខេត្តសៀមរាប ត្រូវបានក្រុមការងាររកគាត់ឃើញហើយ នៅរសៀលថ្ងៃទី២៦ ខែ កញ្ញា ឆ្នាំ២០២០ និងបានមកពិនិត្យតាមដានសុខភាព ព្រមទាំង ធ្វើច ត្តា ឡីស័កចំនួន១៤ថ្ងៃ នៅក្នុងមន្ទីរពេទ្យ ខេត្តសៀមរាប។ ភរិយា និងកូន០២នាក់ ត្រូវបាន ណែនាំឲ្យធ្វើចត្តាឡីស័កចំនួន១៤ថ្ងៃនៅផ្ទះរបស់គាត់ ដើម្បីគាត់ដានសុខភាពដែរ។
អ្នកដែលបម្រើការងារនៅគ្រឹះស្ថានអង្គរក្រុងសៀមរាប ដែលជាកន្លែងអ្នកជំងឺចូលទិញ ផ្ទាំងគំនូរនោះ តាមការស្រាវជ្រាវ មិនមានការប៉ះពាល់ច្រើនទេ ព្រោះអ្នកជំងឺបានពាក់ម៉ាស់ ហើយគាត់ចូលទៅទិញតែផ្ទាំងគំនូរមួយភ្លែតតែប៉ុណ្ណោះ។ ទោះជាយ៉ាងណាក្តី ក្រុមគ្រូពេទ្យកំពុងតែបន្តតាមដានពិនិត្យបន្ថែមទៀតលើករណីនេះ។
ក្រសួងក៏បានលើកឡើងថា ចំពោះអ្នកបើកបរតាក់ស៊ីនៅភ្នំពេញ ដែលអ្នកជំងឺរូបនេះបានម៉ៅជិះតែម្នាក់ឯងកាលពីថ្ងៃទី១៦ ខែកញ្ញា ឆ្នាំ២០២០ ក៏រកឃើញហើយដែរ ដែលនឹងត្រូវយកសំណាកនៅថ្ងៃនេះ ដើម្បីវិភាគហើយបានណែនាំឲ្យគាត់ធ្វើចត្តាឡីស័កនៅផ្ទះរបស់គាត់ហើយដែរ។
ក្រសួងសុខាភិបាលក៏បានលើកឡើងថា អ្នកដំណើរតាមយន្តហោះដែលមានបុរសជនជាតិហុងគ្រីជិះដែរនោះ សរុបចំនួន៨៤នាក់ ត្រូវបានក្រុមការងារឆ្លើយតបបន្ទាន់របស់ ក្រសួងសុខាភិបាលបាននិងកំពុងធ្វើទំនាក់ទំនង ដើម្បីធ្វើតេស្តពួកគាត់ជា លើកទីពីរ ជាប ណ្ដើរៗហើយ។ នៅពេលដែលមានលទ្ធផល ក្រសួងនឹងជូនព័ត៌មានជាបន្តទៀត។
ជាមួយគ្នានោះដែរក្រសួងសុខាភិបាល សូមធ្វើការអំពាវនាវដល់បងប្អូនប្រជាពលរដ្ឋទាំងអស់ សូមបន្តចូលរួមអនុវត្តន៍ វិធានការការពារការចម្លងវីរុសកូវីដ-១៩ ទៅតាមការ ណែ នាំ និងការអំពាវនាវជារឿយៗរបស់ក្រសួង ដើម្បីសុខ ភាពរបស់លោកអ្នក របស់ក្រុម គ្រួសារ លោកអ្នក និងការពារការចម្លងចូលក្នុងសហគមន៍យើងផងដែរ។
សូមជម្រាបថាព្រឹក ថ្ងៃទី២៧ ខែកញ្ញា ឆ្នាំ២០២០នេះ នៅកម្ពុជាបានរកឃើញ អ្នក មានវីរុសកូដ-១៩ មានចំនួនសរុប២៧៦នាក់ ក្នុងនោះចំនួនអ្នកព្យាបាលជាសះស្បើយសរុប ទូទាំងប្រទេសមានចំនួន ២៧៤នាក់ និងអ្នកកំពុងសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ ចំនួន១នាក់ និងនៅមន្ទីរពេទ្យខេត្តសៀមរាប ចំនួន ១នាក់៕ (កែសម្រួលដោយ ៖ ធីតា)
ចែករំលែកព័តមាននេះ