ការធ្វើការជាមួយចៅហ្វាយ ឬមិត្តរួមការងារដែលពិសពុល ឬធ្វើការក្នុងបរិស្ថានការងារដែលពោរពេញទៅដោយអារម្មណ៍ស្ត្រេសអាចប៉ះពាល់ខ្លាំងណាស់ដល់អាជីពរបស់អ្នក។ ក្នុងពេលដែលមុខសញ្ញាដែលបង្ហាញប្រាប់ថាកន្លែងធ្វើការមួយមានបរិស្ថានការងារមិនល្អអាចបានមើលឃើញពេលដែលអ្នកចាប់ផ្តើមធ្វើការនៅកន្លែងនោះពិតមែនក្តី អ្នកនៅតែអាចដឹងក្នុងកំឡុងពេលសម្ភាសន៍ដែរប្រសិនបើអ្នកយកចិត្តទុកដាក់លើចំណុចខាងក្រោមនេះ៖
១. អាកប្បកិរិយាដែលមិនគោរពគ្នាទៅវិញទៅមក
ប្រសិនបើអ្នកត្រូវបានបន្តទៅវគ្គសម្ភាសន៍ អ្នកត្រូវយកចិត្តទុកដាក់លើការដែលមនុស្សនិយាយសួស្តីដាក់គ្នា។ តើពួកគេគោរពគ្នាទៅវិញទៅមកទេ? តើពួកគេមើលគ្នាចំៗទេ? តើពួកគេប្រៀបដូចជាមិនចូលចិត្តនរណាម្នាក់ទេ? លើសពីនេះទៅទៀតអ្នកអាចយកចិត្តទុកដាក់លើកម្លាំង និងចំណាប់អារម្មណ៍របស់បុគ្គលិកលើស្ថាប័នការងាររបស់ពួកគេ។
២. ចៅហ្វាយដែលមិនឧស្សាហ៍និយាយពីក្រុមរបស់ខ្លួន
មនុស្សជាច្រើនលាឈប់ពីការងារព្រោះតែមានចៅហ្វាយមិនល្អ។ ដើម្បីធានាថាអ្នកមិនដើរចូលកន្លែងការងារមួយដែលមិនល្អ អ្នកត្រូវតែយកចិត្តទុកដាក់លើអ្នកដឹកនាំក្នុងស្ថាប័នការងារនោះ និងការដែលពួកគេនិយាយក្នុងកំឡុងពេលសម្ភាសន៍។
អ្នកអាចស្តាប់មើលការដែលពួកគេនិយាយពីក្រុមការងារ និងភាពជោគជ័យរបស់ក្រុមហ៊ុន។ តើពួកគេនិយាយពីខ្លួនឯង ឬនិយាយពីក្រុមការងាររបស់ពួកគេដែរ។ ប្រសិនបើពួកគេនិយាយពីខ្លួនឯងច្រើន នោះមានន័យថាពួកគេជាចៅហ្វាយដែលមិនផ្តោតស្មារតី ឬឲ្យតម្លៃលើបុគ្គលិកខ្លួនច្រើនឡើយ។
៣. ការផ្តល់អត្ថប្រយោជន៍ច្រើនពេក
ការធ្វើការនៅការិយាល័យដែលទំនើប ដែលពោរពេញដោយសម្ភារៈល្អៗសម្រាប់បុគ្គលិកគឺល្អហើយ ប៉ុន្តែអ្នកត្រូវតែមានការប្រុងប្រយ័ត្នមិនអនុញ្ញាតឲ្យអ្នកមើលរំលងវប្បធម៌ការងារក្នុងស្ថាប័ននោះ។ ឧទាហរណ៍ដូចជា ស្ថាប័នការងារខ្លះអាចនឹងផ្តល់ជាបន្ទប់សម្រាក អាហារហ្វ្រីៗ បន្ទប់លេងហ្គេម និងសម្ភារៈល្អៗផ្សេងទៀតព្រោះពួកគេចង់ឲ្យអ្នកចំណាយពេលភាគច្រើនរបស់អ្នកនៅការិយាល័យ។ មានន័យថាអ្នកអាចនឹងត្រូវធ្វើការលើសម៉ោងច្រើន៕
ចែករំលែកព័តមាននេះ