រាជធានីភ្នំពេញ ៖ រថយន្តម៉ាកឡិចស៊ិស RX.៣៥០មួយគ្រឿង ត្រូវចោរលួចយកទៅបាត់ អស់រយៈពេល ប្រមាណជាង១ខែមកហើយ នៅខេត្តសៀមរាប ត្រូវបានម្ចាស់ប្រទះឃើញកន្លែងលាងរថយន្តមួយកន្លែង នៅរាជធានីភ្នំពេញ ជនសង្ស័យដឹងខ្លួនទាន់ហើយរត់ជួបគ្រោះថ្នាក់ចរាចរណ៍ បង្កចិត្តចុះរត់គេចបាត់ស្រមោល ។
ហេតុការណ៍នេះបង្កអោយមានការភ្ញាក់ផ្អើល កាលពីវេលាម៉ោងប្រមាណ៣និង៤០នាទីរសៀល ថ្ងៃទី២៥ ខែកញ្ញា ឆ្នាំ២០២០ ស្ថិតតាមបណ្តោយផ្លូវ១០៥ ខាងជើងភោជនីយដ្ឋានបុប្ជា រាជធានីក្នុងសង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ ។
រថយន្តនោះពាក់ស្លាកលេខ ខេមរៈភូមិន្ទ៨៧៥២ ដែលមានម្ចាស់ជាមន្ត្រីយោធា ហើយត្រូវជនសង្ស័យ ដោះស្លាកលេខបាត់ ។ តាមឈ្មោះ ឆន ដារា អាយុប្រមាណ២៤ឆ្នាំ ស្នាក់នៅសង្កាត់បឹងកក់២ ខណ្ឌទួលគោក ដែលជាកូនម្ចាស់កម្មសិទ្ធិរថយន្តបានអោយដឹងថា កាលពីថ្ងៃទី១៣ ខែសីហា ឆ្នាំ២០២០ ខ្លួនបានជិះរថយន្តខាងលើជារបស់ឪពុកទៅប្រកួតបាល់នៅខេត្តសៀមរាប ដោយស្នាក់នៅក្នុងសណ្ឋាគាមួយហើយត្រូវបានជនសង្ស័យលួចយកទៅបាត់ ។
តាមកូនម្ចាស់រថយន្តរូបនោះបានអោយដឹងទៀតថា នៅវេលារសៀលថ្ងៃទី២៥ ខែកញ្ញានេះ ស្រាប់តែ មានអ្នកស្គាល់គ្នាប្រទះឃើញរថយន្តនោះមានការសង្ស័យក៏បានទូរស័ព្ទប្រាប់ខ្លួនមកមើលទើបដឹងថា រថយន្តរបស់ខ្លួនបាត់ក៏បានទៅសួរនាំមើល ជនសង្ស័យដឹងខ្លួនទាន់ក៏បានបើករថយន្តរត់តែរត់មិនរួច ជិះចេញបានបន្តិចក៏បានជួបគ្រោះថ្នាក់ចរាចរណ៍បុកជាមួយរថយន្តមួយគ្រឿងទៀត ។
ភ្លាមៗ នោះ ជនសង្ស័យ ភ័យស្លន់ស្លោ ចុះរត់គេចខ្លួន ចោលរថយន្តតែម្តង ។ រថយន្តនោះត្រូវបានកម្លាំងកងរាជអាវុធហត្ថចុះទៅនាំយករថយន្តទៅរក្សាទុកនៅមូលដ្ឋានកងរាជអាវុធហត្ថខណ្ឌឬស្សីកែវ ដើម្បីអោយម្ចាស់យកឯកសារមកបង្ហាញរួចប្រគល់អោយម្ចាស់វិញ ៕
ចែករំលែកព័តមាននេះ