រាជធានីភ្នំពេញ ៖ ក្រុមហ៊ុន Microsoft បានប្រកាសចេញលក់ Lumia 532 ស៊ីមពីរជាផ្លូវការនៅប្រទេសកម្ពុជាហើយ ក្នុងតម្លៃដ៏ពិសេសហើយថែមទាំងមានថែមជូនស៊ីមកាត Smart ដែលអាចប្រើអ៊ិនធឺណិត 8GB (2GB/ខែ រយៈពេល 4 ខែ) ដោយឥតគិតថ្លៃ ។
Lumia 532 គឺជាស្មាតហ្វូនដែលមាន CPU ប្រភេទ Quad Core មានការរចនាល្អវិចិត្រ មានមុខងារ Glance Screen (សម្រាប់បង្ហាញម៉ោង និងព័ត៌មានថ្មីៗនៅលើអេក្រង់ទូរស័ព្ទកំពុងជាប់សោ) មានកាមេរ៉ាមុខ និង Memory ធំជាងមុន ដែលនឹងជួយអោយអ្នកប្រើប្រាស់សម្រេចគោលបំណងរបស់ខ្លួនជាមួយនឹងបទពិសោធន៍ដ៏ប្រសើរបំផុតពី Microsoft ដូចជា ផ្លាស់ប្តូរពីការនិយាយទូរស័ព្ទទៅជា Skype Video Call ភ្លាមៗ ដោយពុំចាំបាច់ចុចបិទទូរស័ព្ទ ហើយទៅបើកកម្មវិធី Skype ឡើយ , អាន ពិនិត្យ កែតម្រូវ និងផ្ញើរឯកសារ ឬទិន្នន័យផ្សេងៗ ជាមួយនឹងកម្មវិធី Microsoft Office តម្លើងរួចជាស្រេច , ផ្ទុករូបភាព វីដេអូឃ្លីប ឯកសារ Office ប្រកបដោយសុវត្ថិភាព ជាមួយនឹងទូឯកសារអនឡាញ OneDrive ដែលអាចផ្ទុកបានរហូតដល់ទៅ 30GB , គ្រប់គ្រងអ៊ីមែលការងារ និងអ៊ីមែលផ្ទាល់ខ្លួនបានគ្រប់ទីកន្លែងយ៉ាងងាយស្រួល ជាមួយនឹងកម្មវិធី Microsoft Outlook , ថតរូបភាពបានលឿន និងងាយស្រួលជាមួយនឹងកម្មវិធីថតរូប Lumia Camera ឬ Lumia Selfie ដែលអាចកែរូប និងបញ្ចូលទៅក្នុងបណ្តាញសង្គមបានភ្លាមៗបន្ទាប់ពីថតរូបភាពរួច , តុបតែងអេក្រង់ទូរស័ព្ទបានទៅតាមចំណង់ចំណូលចិត្ត ជាមួយប្រព័ន្ធប្រតិបត្តិការ Windows Phone 8.1 ដែលអាចនឹងទទួលបាន Update ជាបន្តបន្ទាប់ទៅថ្ងៃមុខ និង Live Folders ។ល។
ស្របពេលនឹងការប្រកាសចេញលក់ Lumia 532 ស៊ីមពីរនេះ លោក Rahul Karve អគ្គនាយកនៃប្រតិបត្តិការ Microsoft Devices នៅកម្ពុជាបានលើកឡើងថា ៖ ការច្នៃប្រឌិតថ្មីៗគឺសម្រាប់មនុស្សគ្រប់រូប ហើយយើងតែងបានខិតខំរិះរេដាក់បញ្ចូលនូវភាពច្នៃប្រឌិតថ្មីៗទៅក្នុងស្មាតហ្វូនតម្លៃទាប ។ Lumia 532 នឹងក្លាយទៅជាជម្រើសដ៏ឆ្លាតវៃរបស់យុវជន ជាពិសេសនិស្សិត និងអ្នកបម្រើការងារវិជ្ជាជីវៈវ័យក្មេង ដែលត្រូវការឧបករណ៍អេឡិចត្រូនិកចល័តដើម្បីជួយឲ្យពួកគេសម្រេចលទ្ធផលការងារតាមរយៈកម្មវិធី Microsoft Office, Skype, OneDrive, OneNote ។ល។ ហើយថែមទាំង ទទួលបាននូវការកម្សាន្តតាមរយៈ Apps និង (Xbox) Games ក្នុងពេលតែមួយ ។ អមជាមួយនឹងប្រព័ន្ធប្រតិបត្តិការអភិវឌ្ឍន៍ថ្មីដែលមានភាពងាយស្រួលក្នុងការប្រើប្រាស់ ហើយឆ្លុះបញ្ចាំងឲ្យឃើញពីបុគ្គលិកលក្ខណៈរបស់អ្នកប្រើប្រាស់ទៀតផងនៅ, Lumia 532 ផ្តល់នូវអត្ថប្រយោជន៍កាន់តែច្រើនឡើងចំពោះអ្នកដែលតែងយកចិត្តទុកដាក់ខ្ពស់លើប្រសិទ្ធភាពនៃការចាយវាយរបស់ខ្លួន ។
ទន្ទឹមនឹងនេះលោក Thomas Hundt នាយកប្រតិបត្តិនៃក្រុមហ៊ុន Smart Axiata បានមានប្រសាសន៍ថា ៖ យើងមានសេចក្តីសោមនស្សរីករាយឥតឧបមាចំពោះភាពជាដៃគូជាមួយនឹងក្រុមហ៊ុន Microsoft ក្នុងការផ្តល់អ៊ិនធឺណិតក្នុងតម្លៃកាន់តែប្រសើរឡើងដល់អ្នកប្រើប្រាស់ ។ ក្រុមហ៊ុនSmart មានបណ្តាញអ៊ីនធឺណិតធំជាងគេបង្អស់នៅប្រទេសកម្ពុជា គ្របដណ្តប់ល្អបំផុតនៅតាមបណ្តាផ្លូវជាតិនានាដូចជាពីសៀមរាបមកភ្នំពេញ និងទៅខេត្តព្រះសីហនុជាដើម។ យើងគឺជាក្រុមហ៊ុនដែលផ្តល់សេវា 4G LTE ទីមួយ និងតែមួយគត់នាពេលបច្ចុប្បន្ននេះ ។ យើងមានអ្នកប្រើប្រាស់បច្ចុប្បន្នប្រមាណ 6,5 លាន ហើយ និងទទួលអ្នកប្រើប្រាស់ថ្មីៗរាប់ពាន់នាក់ថែមទៀតក្នុងមួយថ្ងៃៗ ។ បច្ចុប្បន្ននេះ នៅមានអ្នកប្រើប្រាស់ជាច្រើនមិនទាន់អាចប្រើប្រាស់អ៊ិនធឺណិតនៅឡើយ ដោយសារពុំមានលទ្ធភាពជាវស្មាតហ្វូនតម្លៃខ្ពស់។ ស្មាតហ្វូន Lumia 532 រួមជាមួយនឹងការផ្តល់ជូននូវអ៊ីនធឺណិត 2GB/ខែ រយៈពេល 4 ខែពី Smart ផងនោះ គឺពិតជាជម្រើសដ៏ឆ្លាតវៃសម្រាប់អតិថិជនដែលឈានជើងចូលក្នុងពិភពអ៊ិនធឺណិតលើកដំបូង ។ Lumia 532 ចាប់ផ្តើមចេញលក់ចាប់ពីថ្ងៃនេះតទៅក្នុងតម្លៃលក់រាយ ១០៩ ដុល្លារ ជាមួយនឹងជម្រើសច្រើន ពណ៌ដូចជា ខ្មៅ ស ទឹកក្រូច និងបៃតង ៕
ចែករំលែកព័តមាននេះ