ខេត្តកំពង់ឆ្នាំង ៖ មន្ត្រីយោធាម្នាក់បានឈ្លាតពេលទំនេរពីការងារទៅស្នាក់នៅធ្វើចំការ រហូតចេះឆ្នៃប្រឌិតផលិតថាមពលអគ្គិសនីដើរដោយកម្លាំងទឹកបានសម្រេច ថែមទាំងបានប្រើប្រាស់ក្នុងគ្រួសារគួរជាទីមោទនៈទៀតផង បន្ទាប់ពីដំបូងឡើង គឺគ្រាន់តែទាញយកទឹកសម្រាប់ស្រោចស្រពដំណាំក្នុងចំការតែប៉ុណ្ណោះ ។ ហើយបច្ចុប្បន្ន គ្រួសារគាត់បានរស់នៅ…
ខេត្តកំពង់ឆ្នាំង ៖ មន្ត្រីយោធាម្នាក់បានឈ្លាតពេលទំនេរពីការងារទៅស្នាក់នៅធ្វើចំការ រហូតចេះឆ្នៃប្រឌិតផលិតថាមពលអគ្គិសនីដើរដោយកម្លាំងទឹកបានសម្រេច ថែមទាំងបានប្រើប្រាស់ក្នុងគ្រួសារគួរជាទីមោទនៈទៀតផង បន្ទាប់ពីដំបូងឡើង គឺគ្រាន់តែទាញយកទឹកសម្រាប់ស្រោចស្រពដំណាំក្នុងចំការតែប៉ុណ្ណោះ ។ ហើយបច្ចុប្បន្ន គ្រួសារគាត់បានរស់នៅ និងធ្វើចំការនៅជើងភ្នំរលៀបគុយ ក្នុងភូមិត្រាំឃ្លោក ឃុំជៀប ស្រុកទឹកផុស ខេត្តកំពង់ឆ្នាំង។
លោក ភោគ ហៀង បច្ចុប្បន្នជាមន្ត្រីយោធាខេត្តកំពង់ឆ្នាំង បានបញ្ជាក់ប្រាប់អ្នកយកព័ត៌មានយើងថា ៖ រយៈពេលជាង៤ឆ្នាំហើយ ដែលលោកមានអគ្គិសនីប្រើប្រាស់គ្រប់គ្រាន់ នៅក្នុងជីវភាពនៃក្រុមគ្រួសារ ដែលកំពុងដាំណាំច្រើនប្រភេទនៅលើដីចំការចំនួន៥ហិកតានេះ ។ កាលដើមឡើយ លោកគ្រាន់តែមានគំនិតឆ្នៃប្រឌិតនាំយកទឹកពីជ្រោះលើចង្កេះភ្នំមកស្រោចស្រពដីចំការគាត់តែប៉ុណ្ណោះ។ ប៉ុន្តែក្រោយមក គាត់ក៏បែកគំនិងឆ្នៃប្រឌិតយកទឹកមកផលិតជាអគ្គិសនីប្រើប្រាស់ក្នុងគ្រួសារវិញ ។ យ៉ាងនេះក្តី ពីដំបូងគាត់ជួបការលំបាកខ្លះដែរ។
មន្ត្រីយោធារូបនោះ បានបញ្ជាក់ឲ្យដឹងថា៖ បច្ចុប្បន្នថាមពលអគ្គិសនីដែលគាត់ទទួលបានពីការកែឆ្នៃដើរដោយកម្លាំងទឹកមានថាមពល១០កាវ៉េអា ស្មើនឹង៨គីឡូកន្លះ មានកម្លាំងថាមពល ២០០វ៉ុល ដែលអាចឱ្យគ្រួសារគាត់ប្រាស់គ្រប់គ្រាន់ ដូចជា ទូរទឹកកក២គ្រឿង ឆ្នាំងអគ្គិសនី២គ្រឿង ទូរទស្សន៍១គ្រឿង សាកអាគុយ សាកទូរស័ព្ទ និងប្រើប្រាស់អំពូលទាំងក្នុង និងក្រៅផ្ទះ ក្នុងចំការសរុប៣០អំពូលទៀត ។
ចំពោះការឆ្នៃប្រឌិតវិញ លោក ភោគ ហៀង បានរៀនតាមយូធូប ហើយយកមកកែឆ្នៃដោយខ្លួនឯង បន្ថែមពីលើរូបគាត់ដែលចេះជាងស្រាប់ផង ទើបទទួលបានលទ្ធផលបែបនេះ ។ ចំណែកវិធីធ្វើវិញ គឺលោកបានទិញទុយោជ័រ មានមុខកាត់១២សង្ទីម៉ែត្រ (១តឹក២ហ៊ុន) មកដាក់.តយកទឹកពីទឹកជ្រោះនៅចង្កេះភ្នំ មានចម្ងាយជាង៨០០ម៉ែត្រ ។ ពេលកម្លាំងទឹកមកដល់ក្រោម លោកធ្វើជារហាត់មានផ្លិតសម្រាប់ឱ្យទឹកហូរបុក មានចលនាវិលជុំ និងមានភ្ជាប់កង់យោងចំនួន២បន្ថែមទៀត សម្រាប់ដាក់ខ្យែពានអូស ឌីណាម៉ូ បង្កើតជាអគ្គិសនីតែម្តង ។
យ៉ាងនេះក្តី លោក ភោគ ហៀង បានបញ្ជាក់ថា ៖ ទម្រាំធ្វើបានបែបនេះ លោកបានចំណាយដើមទន់ជាង១ពាន់ដុល្លា ។ តទៅថ្ងៃមុខ លោកនឹងឆ្នៃប្រឌិតតម្លើងថាមពលឱ្យធំជាងនេះ បើសិនមានតម្រូវការបន្ថែមទៀត ដែលតាមការគ្រោងទុកលោកនឹងដាក់ ឌីណាម៉ូ មានកម្លាំង២០គីឡូវ៉ាត់ ដើម្បីឱ្យមានថាមពលអគ្គិសនីធំជាងនេះ ដែលអាចលក់ជូនបងប្អូនប្រជាពលរដ្ឋប្រើប្រាស់បានដូចគាត់ដែរ តែក្នុងតម្លៃថោកជាងទីផ្សារ ។
ជាមួយគ្នានេះ លោកក៏សូមអំពាវនាវដល់បងប្អូនប្រជាពលរដ្ឋដែលរស់នៅជាប់មាត់ទឹក មានចរន្តទឹកហូរ សូមចំណាយដើមទន់ផលិតអគ្គិសនីដូចគាត់ ហើយគាត់នឹងបង្រៀន ដោយឥតគិតថ្លៃ ព្រោះថា ពេលផលិតបានយើងងាយស្រួលប្រើ ហើយមិនអស់ថវិការប្រចាំខែ ដូចការទិញភ្លើងប្រើនោះឡើយ ៕
ចែករំលែកព័តមាននេះ