ខេត្តសៀមរាប ៖ មានករណីអគ្គិភ័យឆាបឆេះហាងលក់បាយមួយកន្លែង បណ្តាលឱ្យរងការខូចខាតអស់ទាំងស្រុង ។
ហេតុការណ៍ខាងលើនេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី២៤ ខែកញ្ញា ឆ្នាំ២០២០ នៅចំណុចហាងលក់បាយយីហោ ស្ទឹងមាស លក់បាយហៃណាំ ស្ថិតក្នុងភូមិតាភុល សង្កាត់ស្វាយដង្គំ ក្រុងសៀមរាប ខេត្តសៀមរាប។
បើតាមប្រភពពីសមត្ថកិច្ចមូលដ្ឋានបានឱ្យដឹងថា ភោជនីយដ្ឋានខាងលើធ្វើអំពីឈើប្រក់ស្បូវទំហំ៣ម៉ែត្រគុណនឹង១០ម៉ែត្រ ត្រូវឆាបឆេះអស់ទាំងស្រុង គិតជាទឹកប្រាក់អស់ជាង១ម៉ឺនដុល្លារ ប៉ុន្តែមិនបានរាលដាលដល់ផ្ទះអ្នកជិតខាងនោះទេ។
តាមប្រភពដដែលបានបន្តថា ក្នុងហេតការណ៍ខាងលើមានរថយន្តពន្លត់អគ្គិភ័យចំនួន ២គ្រឿង ចុះមកជួយអន្តរាគមន៍ ក្នុងនោះមានរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តចំនួន១គ្រឿង ប្រើប្រាស់ទឹកអស់១គ្រឿង និងរថយន្តពន្លត់អគ្គិភ័យរបស់កង រាជអាវុធហត្ថខេត្តចំនួន១គ្រឿង មិនបានប្រើប្រាស់ទឹកនោះទេ ព្រមទាំងបានប្រើបំពង់ពន្លត់អគ្គិភ័យចំនួន៣បំពង់។
ចំពោះមូលហេតុ បណ្តាលមកពីចុងភៅប្តូរធុងហ្គាសទម្ងន់១៥គីឡូ ហើយភ្លេចបិទហ្គាសឱ្យជិត បណ្តាលឱ្យឆាបឆេះចេញពីចង្ក្រានបាយ និងឆេះរាលដាលដល់ហាងទាំងមូលតែម្ដង ៕ (កែសម្រួលដោយ ៖ ធីតា)
ចែករំលែកព័តមាននេះ