រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់កម្ពុជាសង្វៀនគុនខ្មែរ(Champion Of Champion)ជុំទី២នៅលើសង្វៀនសុីអិនសុីឈានមកដល់វគ្គផ្ដាច់ព្រ័ត្រហើយនៅថ្ងៃសៅរ៍ ទី២៦ កញ្ញា ស្អែកនេះ ។ សម្រាប់សមាសភាពកីឡាករដែលឡើងមកដល់វគ្គផ្ដាច់ព្រ័ត្រនេះមានសូត្រ ខេវិនមកពីក្លិបបក្សីស្លាបដែក ត្រូវប្រកួតជាមួយសោម វិឆ័យ មកពីក្លិបវិបុលដារិទ្ធខណ្ឌពោធិសែនជ័យ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករជើងខ្លាំងទាំង២មួយណាសម្រេចគោលដៅឡើងទៅប្រកួតវគ្គផ្ដាច់ព្រ័ត្រយកពានរង្វាន់ធំ។
គួររំលឹកថា ការប្រកួតនេះចែកចេញជាពីរជុំដោយក្នុងមួយជុំមានកីឡាករ៨រូបប្រកួតតាមរូបមន្តជម្រុះវិលជុំដើម្បីចម្រាញ់យកតែអ្នកឈ្នះចំនួន៤រូបប៉ុណ្ណោះឡើងមកប្រកួតនៅវគ្គផ្ដាច់ព្រ័ត្រដណ្ដើមយកចំណាត់ថ្នាក់ពីលេខ១ដល់លេខ៤ ។ ប៉ុន្តែមានតែអ្នកជាប់ចំណាត់ថ្នាក់លេខ១ប្រចាំជុំនីមួយៗប៉ុណ្ណោះទើបមានឱកាសបានឡើងទៅប្រកួតនៅវគ្គផ្ដាច់ព្រ័ត្រដណ្ដើមយកពានរង្វាន់ធំដែលមានទឹកប្រាក់រហូតដល់ទៅ៦ពាន់ដុល្លារឯណោះ។
ដោយឡែកនៅក្នុងការប្រកួតវគ្គផ្ដាច់ព្រ័ត្រជុំទី២នេះកីឡាករ សូត្រ ខេវិន ត្រូវប៉ះជាមួយកីឡាករ សោម វិឆ័យ ដណ្ដើមយកចំណាត់ថ្នាក់លេខ១ ខណៈកីឡាករ សេក គឹមរួន មកពីក្លិបមកុដរាជសីហ៍ ត្រូវប៉ះជាមួយកីឡាករ ឡុង ឡាមកពីក្លិបអប់រំកាយស្រុកអន្លង់វែងដណ្ដើមយកចំណាត់ថ្នាក់លេខ៣។ ការប៉ះគ្នារវាងកីឡាករ សូត្រ ខេវិន និងសោម វិឆ័យ លើកនេះអត់មានអ្នកណាម្នាក់ហ៊ានទាយទុកមុនពីលទ្ធផលចាញ់ឈ្នះបានឡើយ ព្រោះមិនអាចមើលស្រាលលើភាគីខាងណានោះទេ ។
កីឡាករទាំងពីរបានត្រៀមខ្លួនរួជាស្រេចក្នុងការសម្រេចគោលដៅឡើងទៅប្រកួតនៅវគ្គផ្ដាច់ព្រ័ត្រដណ្ដើមយករង្វាន់ធំ។
បើតាមការសង្កេតការប្រកួតកន្លងមកគូនេះមានល្បិចប្រយុទ្ធនៅលើសង្វៀនម្យ៉ាងម្នាក់។ សូត្រ ខេវិន ដែលមានប្រៀបជាងខាងកម្ពស់នោះ ស្នៀតកែងនិងជង្គង់របស់គេល្អខ្លាំងណាស់ គ្រាន់តែកម្លាំងរបស់គេរាងខ្សោយបន្តិច ។ ចំណែកសោម វិឆ័យ វិញស្នៀតជើងក៏ល្អណាស់ដែរអាចទាត់ចេញបានរហ័សថែមទាំងមានទម្ងន់ធ្ងន់ទៀតផង ។ អ៊ីចឹងហើយទើបទាំងសងខាងបង្ហាញការកោតញញើតគ្នាទៅវិញទៅមក។ សម្រាប់អ្នកដែលឈ្នះលេខ១ក្នុងជុំទី២នេះនឹងត្រូវឡើងទៅប្រកួតជាមួយកីឡាករលន បញ្ញា មកពីសមាគមកីឡាប្រដាល់កងយោធពលខេរភូមិន្ទដែលជាអ្នកឈ្នះលេខ១កាលពីជុំទី១។
រីឯគូប្រកួតមិត្តភាពវិញកីឡាករឡៅ ចន្ទ្រាមកពីក្លិបកងទ័ពពិសេសឆត្រយោង៩១១ប៉ះជាមួយកីឡាករឈឿន ល្វៃ មកពីក្លិបនាគរាជចតុមុខ៕
ចែករំលែកព័តមាននេះ