រាជធានីភ្នំពេញ ៖ ក្រុមហ៊ុនធានារ៉ាប់រងលំដាប់លេខមួយនៅកម្ពុជា ហ្វតតេ បានសហការគ្នាជាមួយក្រុមហ៊ុនធានារ៉ាប់រងបន្ត Atradius Re ក្នុងការផ្ដល់សេវាធានារ៉ាប់រងលើគណនីត្រូវទទួល
រាជធានីភ្នំពេញ ៖ ក្រុមហ៊ុនធានារ៉ាប់រងលំដាប់លេខមួយនៅកម្ពុជា ហ្វតតេ បានសហការគ្នាជាមួយក្រុមហ៊ុនធានារ៉ាប់រងបន្ត Atradius Re ក្នុងការផ្ដល់សេវាធានារ៉ាប់រងលើគណនីត្រូវទទួល ដល់អតិថិជននៅកម្ពុជា ។ នៅព្រឹកថ្ងៃទី២៤ មីនា ២០១៥ ក្រុមហ៊ុនធានារ៉ាប់រងហ្វតតេ និងក្រុមហ៊ុនធានារ៉ាប់រង Atradius Re បានរៀបចំសិក្ខាសាលាមួយនៅសណ្ឋាគារ ភ្នំពេញ ទាក់ទងនឹងប្រធានបទ ធានារ៉ាបរងលើគណនីត្រូវទទួល និង អត្ថប្រយោជន៍ ដោយមានអ្នកចូលរួមពីបណ្ដាក្រុមហ៊ុននាំចេញ ជាង១០០នាក់ ។
លោកយក់ ចំរើនឬទ្ធិ អគ្គនាយកក្រុមហ៊ុនហ្វតតេ បានមានប្រសាសន៍ថា គោលបំណងសំខាន់នៃសិក្ខាសាលានេះ ធ្វើឡើងដើម្បីចែករំលែកចំណេះដឹង ទាក់ទងនឹងសេវាធានារ៉ាប់រងលើគណនីត្រូវទទួល និងអត្ថប្រយោជន៍របស់សេវាធានារ៉ាប់រងនេះ ។ ទន្ទឹមនឹងនេះ សិក្ខាសាលានេះក៏ផ្ដល់ឱកាសសម្រាប់ក្រុមហ៊ុនធានារ៉ាប់ហ្វតតេ ប្រកាសជាសាធារណៈ ពីការចាប់ផ្ដើមផ្ដល់សេវាធានារ៉ាប់រងនេះជាផ្លូវការផងដែរ ។
លោកបានបន្តថា ក្រុមហ៊ុនធានារ៉ាប់រងហ្វតតេ តែងតែខិតខំរិះរក និងផ្ដល់ជូននូវសេវាធានារ៉ាប់ដែលមានលក្ខណៈច្នៃប្រឌិត និងថ្មីៗ សម្រាប់អតិថិជននិងទីផ្សារធានារ៉ាប់រងទាំងមូល ជាក់ស្ដែងការផ្ដល់ជូននូវសេវាធានារ៉ាប់រងលើគណនីត្រូវទទួលដែលជាផលិតផលមួយថ្មីមុនគេបង្អស់សម្រាប់អតិថិជនក្នុងប្រទេសកម្ពុជា។ សេវាធានារ៉ាប់រងនេះ នឹងជួយដល់ក្រុមហ៊ុននាំចេញ ក្នុងការបង្កើនការលក់របស់ខ្លួនដល់អតិថិជនក្រៅប្រទេសកាន់តែច្រើនបន្ថែមទៀត ដោយសារតែសេវាធានារ៉ាប់រងនេះ នឹងផ្ដល់សំណងជូនក្រុមហ៊ុននាំចេញ ដែលបាននាំចេញផលិតផលរបស់ខ្លួនទៅក្រៅប្រទេសដោយអនុញ្ញាតិអោយមានការជឿ រឺ ជំពាក់ ប៉ុន្តែអតិថិជននៅក្រៅប្រទេសនោះមិនបានទូរទាត់វិក្កយប័ត្រដែលខ្លួនបានជំពាក់នោះ ជាហេតុធ្វើអោយក្រុមហ៊ុននាំចេញ ដែលមានទីតាំងនៅកម្ពុជាទទួលរងការខាតបង់ធ្ងន់ធ្ងរ ។ អត្ថប្រយោជន៍ផ្សេងទៀត របស់ធានារ៉ាប់រងនេះ មានដូចជាការផ្ដល់ជូននូវការបង្កើនសមត្ថភាពប្រកួតប្រជែងក្នុងទីផ្សារនាំចេញ និងការទទួលបាននូវលក្ខខណ្ឌល្អ ប្រសើរសម្រាប់ហិរញ្ញប្បទានក្នុងការនាំចេញ ជាដើម។
គួរបញ្ជាក់ថានៅក្នុងសិក្ខាសាលាថ្ងៃនោះដែរ លោក Roy Sharma ជាដៃគូរបស់ក្រុមហ៊ុន Atradius Re ក៏បានធ្វើបទបង្ហាញទាក់ទងនឹងសេវាធានារ៉ាប់រងនេះ ហើយលោក អ៊ុង សំអុល នាយកប្រតិបត្តិហិរញ្ញប្បទានពាណិជ្ជកម្ម នៃធនាគារអេស៊ីលីដា ក៏បានចែករំលែកបទពិសោធន៍របស់ធនាគារអេស៊ីលីដា ទៅលើហិរញ្ញប្បទានសម្រាប់ការនាំចេញ ដល់សិក្ខាកាមចូលរួមផងដែរ ៕
ចែករំលែកព័តមាននេះ