រាជធានីភ្នំពេញ ៖ នៅថ្ងៃសុក្រសប្ដាហ៍នេះ ការប្រកួតជម្រុះក្នុងព្រឹត្តិការណ៍ AFC U-23 ប្រចាំឆ្នាំ២០១៦ នឹងដំណើរការ ខណៈដែលការប្រកួតបើកឆាករបស់កម្ពុជា គឺប៉ះជាមួយក្រុមថៃដែលជាម្ចាស់ផ្ទះតែម្ដង
រាជធានីភ្នំពេញ ៖ នៅថ្ងៃសុក្រសប្ដាហ៍នេះ ការប្រកួតជម្រុះក្នុងព្រឹត្តិការណ៍ AFC U-23 ប្រចាំឆ្នាំ២០១៦ នឹងដំណើរការ ខណៈដែលការប្រកួតបើកឆាករបស់កម្ពុជា គឺប៉ះជាមួយក្រុមថៃដែលជាម្ចាស់ផ្ទះតែម្ដង ហើយក៏ជាការប្រកួតមួយដែលស្ថិតក្នុងសភាពដ៏តានតឹងផងដែរ ។ នេះជាការស្ទាបស្ទង់កម្លាំង និងសំណាងដ៏ធំមួយរបស់ក្រុមបាល់ទាត់ឈុតតូចក្រោមអាយុ២៣ឆ្នាំរបស់កម្ពុជា មុនក្រុមឈុតធំបើកយុទ្ធនាការប្រកួតជម្រុះ World Cup បន្តក្នុងពេលដ៏ខ្លី ។
ព្រឹត្តិការណ៍ប្រកួតជម្រុះក្នុងក្របខ័ណ្ឌ AFC U-23 ខាងលើនេះ ក្រុមប្រទេសកម្ពុជាហាក់មិនសូវមានសំណាងទាល់តែសោះ ដោយសារតែការចាប់ឆ្នោតចែកពូលប៉ះចំក្រុមប្រទេសដែលសុទ្ធតែមានការរីកចម្រើនលើវិស័យបាល់ទាត់នាំមុខជាងខ្លួន ។ ក្រុមដែលកម្ពុជាត្រូវប្រឈមគឺក្រុមថៃ, កូរ៉េខាងជើង និងហ្វ៊ីលីពីន ។ ក្នុងចំណោមក្រុមទាំង៣ កម្ពុជាមើលមិនឃើញពីជំហរស៊ីផុយទៅលើក្រុមណាមួយបានឡើយ ខណៈកងប្រយុទ្ធ U-23 របស់គូបដិបក្ខ ក៏សុទ្ធតែជាជើងខ្លាំង និងមានកម្រិតឈានដល់ស្ដង់ដាប្រកួតជាអន្តរជាតិគួរឲ្យបារម្ភ ។ ក្រុមប្រទេសទាំងនេះ នឹងបើកព្រឹត្តិការណ៍ប្រកួតគ្នានៅក្នុងទីក្រុងបាងកកប្រទេសថៃ ដោយនៅថ្ងៃសុក្រទី២៧ មីនា ខានស្អែក ក្រុមកម្ពុជាត្រូវប៉ះជាមួយក្រុមម្ចាស់ផ្ទះតែម្ដង នៅវេលាម៉ោង៧យប់ ។ ការប៉ះគ្នាជាមួយថៃ គឺជារឿងដែលតានតឹងបំផុតសម្រាប់ក្រុមជម្រើសជាតិកម្ពុជាក្នុងប្រភេទអាយុក្រោម២៣ឆ្នាំនេះ ។
ក្នុងព្រឹតិ្តការណ៍ជម្រុះនេះ កម្ពុជាហាក់ចាញ់ប្រៀបថៃ៣ចំណុចតែម្ដង គឺសមត្ថភាព ចាញ់ច្រាបទឹកដី និងកម្លាំងចិត្តពីអ្នកគាំទ្រផ្ទាល់តែម្ដង។ គាប់ជួនក្រុមថៃ ជាប្រទេសជិតខាងមួយដែលវិស័យបាល់ទាត់មានការរីកចម្រើន និងមានការគាំទ្រខ្លាំងក្លាពីសំណាក់ពលរដ្ឋក្នុងប្រទេស គឺរឹតតែធ្វើឱ្យសំឡេងហ៊ោកញ្ជ្រៀវរបស់ជនជាតិថៃ នឹងក្លាយជាសំឡេងសន្ធាប់ធ្វើឲ្យក្រុមកម្ពុជាចាញ់ច្រាបផងក៏មិនដឹង ។ នេះជាចំណុចដែលក្រុមកម្ពុជាត្រូវបារម្ភបំផុតបន្ថែមពីលើសមត្ថភាពក្នុងការយកឈ្នះដោយពិបាកដែលត្រូវគេមើលឃើញថា ពិបាកទៅរួចជាមួយក្រុមថៃ ។ ការប៉ះគ្នាលើកនេះ ក្រុមកីឡាករថៃបានព្យាករនៅលើបណ្ដាញសារព័ត៌មានក្នុងស្រុករបស់ខ្លួនថា នឹងឈ្នះកម្ពុជាដោយមិនពិបាក ដោយសង្ឃឹមថានឹងបាន៣ពិន្ទុមុនទៅប៉ះក្រុមប្រទេសហ្វ៊ីលីពីនក្នុងជំហានបន្តទៀតផង ។ សារព័ត៌មានរបស់ថៃជាច្រើនសុទ្ធតែលើកឡើងថា ក្នុងចំណោមក្រុមទាំង៤ ថៃនឹងឈរក្នុងចំណាត់ថ្នាក់កំពូល បើទោះជាត្រូវប្រឈមជាមួយនឹងក្រុមកូរ៉េខាងជើង និងហ្វ៊ីលីពីនដែលជាក្រុមខ្លាំង ។
សម្រាប់ការប្រកួតបើកឆាកជាមួយក្រុមម្ចាស់ផ្ទះថៃនេះ ក្រុមកម្ពុជាបានបង្ហាញពីការត្រៀមទុកខ្លាំងដើម្បីឲ្យការប្រកួតទទួលបានលទ្ធផលល្អដូចគ្នាការប្រកួតជាមួយក្រុមសិង្ហបុរីកន្លងមក។ ផ្អែកលើលទ្ធផលឈ្នះក្រុម U-23 សិង្ហបុរីក្នុងលទ្ធផល៣ ទល់នឹង១ កាលពីជុំទី១ និង២ស្មើជាមួយក្រុម U-22 របស់សិង្ហបុរីដដែល កាលពីថ្ងៃអាទិត្យកន្លងមកនេះ ក្រុមកម្ពុជាហាក់មានសង្ឃឹមច្រើនថា អាចទប់ទល់ជាមួយក្រុមថៃបាន បើទោះជានៅក្រៅទឹកដី និងជាក្រុមមួយដែលកម្ពុជាត្រូវប្រយ័ត្នបំផុត ។ ការប្រកួតនៅថ្ងៃសុក្រនេះនឹងក្លាយជាការកាត់ក្ដីដ៏ប្រសើរបំផុតដើម្បីរំលេចក្ដីសង្ឃឹមឆ្ពោះទៅកាន់វគ្គជម្រុះក្នុងព្រឹត្តិការណ៍បាល់ទាត់ពិភពលោកនៅក្រោយឱកាសបុណ្យចូលឆ្នាំ ។ នោះគឺដោយសារធនធានមួយចំនួននៅក្នុងឈុតធំដែលជាប្រភេទក្រុមជម្រើសជាតិ មានកីឡាករក្នុងឈុត U-23 នេះច្រើនគួរសម ។ ប្រសិនបើការប៉ះថៃ កម្ពុជាអាចទប់ត្រឹមស្មើនោះមានន័យថា កម្ពុជានឹងមានជំហានសង្ឃឹមបើទោះមិនច្រើននៅឡើយសម្រាប់តំណែងលេខ១ ក្នុងពូលឆ្ពោះទៅកាន់វគ្គបន្តរបស់ព្រឹត្តិការណ៍ AFC U-23 ឆ្នាំ២០១៦ ទាំងមូល ។
យ៉ាងណាក៏ដោយ ក្រុមបាល់ទាត់កម្ពុជាទាំងប្រភេទឈុតធំ និងប្រភេទឈុតក្រោមអាយុ២៣ឆ្នាំ មិនមែនជាក្រុមទន់ខ្សោយ និងអសមត្ថភាពដូចកាលពីអតីតកាលនោះទេ បន្ទាប់ពីវិស័យបាល់ទាត់របស់កម្ពុជាចាប់ផ្ដើមរើបឡើងវិញនាប៉ុន្មានឆ្នាំចុងក្រោយ ។ ជាក់ស្ដែងការប្រកួតឈ្នះក្រុមយុវជនរបស់ប្រទេសសិង្ហបុរី និងការប្រកួតឈ្នះក្រុមម៉ាកាវនៅក្នុងព្រឹត្តការណ៍ជម្រុះវគ្គបឋមនៃព្រឹត្តិការណ៍បាល់ទាត់ពិភពលោកមុននេះ មិនមែនជារឿងចៃដន្យរបស់ក្រុមកម្ពុជានោះទេ គឺមានន័យថា កីឡាករកម្ពុជាពិតជាបានកើនឡើងនូវសមត្ថភាព និងបច្ចេកទេសពេញលេញក្នុងកម្រិតអន្តរជាតិ ។ ដូច្នេះហើយទើបការប៉ះជាមួយក្រុមថៃលើកនេះ នឹងក្លាយជាការស្ទង់កម្លាំងមួយដ៏សំខាន់ដើម្បីដឹងថា កម្ពុជាកើនឡើងកម្រិតណា ?
មហាជនភាគច្រើន បានងាកមកឃ្លាំមើលចំពោះព្រឹត្តិការណ៍មួយនេះកាន់តែច្រើន បើធៀបនឹងរយៈកាលកន្លងទៅ ដែលក្រុមកម្ពុជាទៅប៉ះក្រុមណា គឺពិតជាចាញ់ងើបមុខមិនរួចនោះ ។ អ្នកខ្លះបានទាំងព្យាករណ៍ថា ក្រុម U-23 របស់កម្ពុជា នឹងធ្វើឲ្យថៃខកចិត្តសម្រាប់ការប្រកួតជម្រុះក្នុងថ្ងៃដំបូងនោះទៀតផង បើទោះជាក្រុមរបស់ថៃ គឺជាក្រុមខ្លាំងក្នុងតំបន់ដែលមានសន្ទុះឈានឡើងទាំងក្រុមជម្រើសជាតិឈុតធំ និងក្រុម U-23 គួរឲ្យកត់សម្គាល់ ។ ជើងទី២ សម្រាប់ការប្រកួតនេះ នឹងធ្វើនៅក្នុងទីក្រុងបាងកកដដែល នៅថ្ងៃទី២៩ មីនា ដោយកម្ពុជានឹងប៉ះជាមួយក្រុមកូរ៉េខាងជើងនៅវេលាម៉ោង៧យប់ និងការប្រកួតជម្រុះក្នុងពូលចុងក្រោយធ្វើនៅថ្ងៃទី៣១ មីនា ប៉ះជាមួយក្រុមហ្វ៊ីលីពីន ។
ក្រុមបាល់ទាត់ដែលចូលរួមប្រកួតក្នុងព្រឹត្តិការណ៍នេះមានចំនួន៤៣ប្រទេសក្នុងទ្វីបអាស៊ី ត្រូវបានបែងចែកជា១០ពូល ដោយពូលA, B និង C មានចំនួន៥ប្រទេសឬ៥ក្រុមក្នុងមួយពូល និងពីពូលD ដល់ J មាន៤ក្រុមក្នុងមួយពូល ។ ចំពោះការប្រកួតជម្រុះធ្វើឡើងនៅក្នុងប្រទេសផ្សេងៗដែលគណៈកម្មការរៀបចំបានជ្រើសរើសរួចជាស្រេច ។ ព្រឹត្តិការណ៍នេះក៏ជាការប្រកួតដ៏ធំមិនខុសគ្នាពីការប្រកួតជម្រុះប្រចាំទ្វីបអាស៊ីរបស់ព្រឹត្តិការណ៍ World Cup នោះផងដែរ ទើបការប្រកួតនេះនឹងក្លាយជាការស្ទាបស្ទង់កម្លាំងយ៉ាងពិសេសសម្រាប់ការប្រកួតជម្រុះបាល់ទាត់ពិភពលោកក្នុងពេលខាងមុខ ។ អ្វីដែលកម្ពុជារំពឹងទុក គឺបទពិសោធន៍ដែលទទួលបានពីការប្រកួតដែលពិតជាធ្វើឲ្យក្រុមបាល់ទាត់កម្ពុជាប្រែប្រួលសមត្ថភាព ៕
ចែករំលែកព័តមាននេះ