ខេត្តកណ្ដាល ៖ មុខសញ្ញាប្រើល្បិចទម្លាក់ស្ពន់ដូរយកមាសដែលគេហៅថា (ទម្លាក់យោង) បានបាត់ករណីបែបនេះមួយរយៈហើយ ទើបតែនឹងលេចមុខសញ្ញាមកធ្វើសកម្មភាពទម្លាក់យោងមួយករណីនៅផ្សារតាខ្មៅចាស់ ក្រុងតាខ្មៅ ខេត្តកណ្តាល ដោយបានឆបោកយកលុយកាក់ និងមាសប្រាក់ពីជនរងគ្រោះជាស្ត្រីម្នាក់អស់ពីខ្លួន…
ខេត្តកណ្ដាល ៖ មុខសញ្ញាប្រើល្បិចទម្លាក់ស្ពន់ដូរយកមាសដែលគេហៅថា (ទម្លាក់យោង) បានបាត់ករណីបែបនេះមួយរយៈហើយ ទើបតែនឹងលេចមុខសញ្ញាមកធ្វើសកម្មភាពទម្លាក់យោងមួយករណីនៅផ្សារតាខ្មៅចាស់ ក្រុងតាខ្មៅ ខេត្តកណ្តាល ដោយបានឆបោកយកលុយកាក់ និងមាសប្រាក់ពីជនរងគ្រោះជាស្ត្រីម្នាក់អស់ពីខ្លួន ប៉ុន្តែរំលងបាន៤ថ្ងៃក្រោយមក ជនសង្ស័យមួយក្រុមនោះបាននាំគ្នាបម្រុងទៅធ្វើសកម្មភាពនៅកន្លែងដដែលម្តងទៀត ក៏ត្រូវអស់លក្ខណ៍ម្នាក់ ចំណែក៣នាក់ទៀតរត់គេចខ្លួនបាត់ ។
មុខសញ្ញាម្នាក់ដែលត្រូវឃាត់ខ្លួនខាងលើនេះឈ្មោះ សុខសំណាង ភេទប្រុស អាយុ៤៧ឆ្នាំ មុខរបរមិនពិតប្រាកដ មានទីលំនៅភូមិគោកឃ្លាង សង្កាត់ភ្នំពេញថ្មី ខណ្ឌសែន សុខ រាជធានីភ្នំពេញ ។ ចំណែកជនរងគ្រោះក្នុងអំពើឆបោកខាងលើនេះឈ្មោះ លី ចាន់ណា ភេទស្រី អាយុ៣៨ឆ្នាំ មុខរបរលក់ដូរ ទីលំនៅភូមិក្បាលកោះ សង្កាត់កោះ អន្លង់ចិន ក្រុងតាខ្មៅ ខេត្តកណ្តាល ។
បើតាមការរៀបរាប់ពីស្ត្រីរងគ្រោះបានប្រាប់សមត្ថកិច្ចឱ្យដឹងថា កាលពីវេលាម៉ោង៧ព្រឹកថ្ងៃទី១៩ ខែកញ្ញា ឆ្នាំ២០២០ គាត់បានទៅផ្សារចាស់ក្រុងតាខ្មៅ ដើម្បីរកទិញម្ហូប ពេលនោះក៏មានស្ត្រី២នាក់ដើរមុខក្រោយ ហើយក៏ធ្វើជាជ្រុះមាស១ថង់ រួចពួកគេបានហាមគាត់កុំឲ្យនិយាយ នឹងបានប្រាប់ថា ចាំចែកគ្នា ។
តាមប្រភពដដែលបានបន្តថា បន្ទាប់មកជនសង្ស័យ២នាក់(ម្នាក់ឈ្មោះ នី និងឈ្មោះ ក្អៀ) បានឲ្យគាត់ជិះម៉ូតូទៅជាមួយជនសង្ស័យ(ឈ្មោះ សុខសំណាង)ជាអ្នកឌុប ចំណែកពួកគេបានជិះម៉ូតូជាមួយជនសង្ស័យម្នាក់ទៀត(ឈ្មោះ ផាន) លុះទៅដល់ម្តុំភ្លើងស្តុបកែងផ្លូវ១១០ បត់ចូលផ្លូវច្រកចង្អៀតមួយ ស្ថិតក្នុងភូមិ ថ្មី ក្រុងតាខ្មៅ ពួកគេក៏បាននាំគ្នាបោកបញ្ឆោតដោះយកចិញ្ចៀនមាសទម្ងន់២ជី និងលូកយកលុយ២៥ម៉ឺនរៀល ហើយជិះម៉ូតូគេចខ្លួនបាត់ ។
តាមប្រភពដដែលបានបន្តឱ្យដឹងថា លុះដល់វេលាម៉ោង៧ព្រឹកថ្ងៃទី២៣ ខែកញ្ញា ឆ្នាំ២០២០ គាត់បានទៅផ្សារចាស់ក្រុងតាខ្មៅ ដើម្បីទិញម្ហូបដូចសព្វដង ពេលនោះក៏បានជួបជនសង្ស័យទាំង៤នាក់(មុខដដែល) ពួកគេបាននាំគ្នាបម្រុងទៅធ្វើសកម្មភាពម្តងទៀត នៅចំណុចផ្សារតាខ្មៅថ្មី ភូមិដើមមៀន សង្កាត់ដើមមៀន ក្រុងតាខ្មៅ ។ លុះឃើញដូច្នោះ គាត់(ជនរងគ្រោះ)ក៏បានស្រែកថាចោរ ៗ ធ្វើឲ្យជនសង្ស័យរត់គេចខ្លួនបាត់អស់៣នាក់ នៅសល់តែម្នាក់គឺឈ្មោះ សុខសំណាង ត្រូវបានគាត់ នឹងក្រុមអាជីវករ រួមទាំងអ្នករត់ម៉ូតូឌុប ជួយចាប់ខ្លួន ជនគ្មានសំណាង ប្រគល់ឲ្យសមត្ថកិច្ចប៉ុស្តិ៍ដើមមៀន ដើម្បីចាត់ការតាមផ្លូវច្បាប់ ។
ជាមួយនោះ សមត្ថកិច្ចក៏បានដកហូតវត្ថុតាងពីជនសង្ស័យរួមមាន ៖ ម៉ូតូ១គ្រឿងម៉ាកHonda c125 ពណ៌ខ្មៅ ស្លាកលេខ ភ្នំពេញ 1IC-2390, កូនកាបូបពណ៌ខ្មៅ១, ថ្នាំពេទ្យ១ថង់, ទូរសព្ទ័មួយគ្រឿងម៉ាកN ចុចពិលពណ៌ខ្មៅ ។
ស្ត្រីរងគ្រោះបានឱ្យដឹងបន្តថា គាត់បាត់បង់សម្ភារដូចជា ចិញ្ចៀនមានទម្ងន់២ជីមាស ១ វង់ និងលុយចំនួន២៥ម៉ឺនរៀល ។
នៅចំពោះមុខសមត្ថកិច្ច ជនសង្ស័យឈ្មោះ សុខ សំណាង បានឆ្លើយសារភាពថា ខ្លួន និងបក្ខពួកចំនួន៣នាក់ ពិតជាបានរួមគ្នាធ្វើសកម្មភាពទម្លាក់យោង.ឆបោកយកចិញ្ចៀនមាស និងលុយកាក់ ពីជនរងគ្រោះខាងលើប្រាកដមែន ហើយពួកគេក៏ធ្លាប់បានធ្វើសកម្មភាព ដើរទម្លាក់ស្ពាន់ដូរយកមាសចំនួន៥លើករួចមកហើយដែរ គឺនៅភ្នំពេញ៣លើក និងនៅក្រុងតាខ្មៅ២លើក ដោយក្នុង១លើកៗ ខ្លួនទទួលបានចំណែកតែ៥ ម៉ឺនរៀលប៉ុណ្ណោះ ។
សមត្ថកិច្ចបានឲ្យដឹងថា នេះជាមុខសញ្ញាជនឆបោកប្រើល្បិចទម្លាក់ស្ពាន់ដូរយកមាស (ទម្លាក់យោង) ដែលបានបាត់ជាយូរហើយ តែល្បិចនិងមុខមាត់នៅដដែល វិលមកជាប់ជុចម្នាក់ ចំណែក៣នាក់រត់គេចបាត់ ៕ (កែសម្រួលដោយ ៖ ធីតា)
ចែករំលែកព័តមាននេះ