រាជធានីភ្នំពេញ ៖ ទីផ្សារបន្លែសុវត្ថិភាពរបស់ប្រជាកសិករកាន់តែមានហាងឆេងនិងតម្រូវការខ្ពស់ នៅក្នុងដំណាក់កាលនៃការរាលដាលនៃជំងឺកូវីដ១៩ ផង និងក្នុងពេលដែលពលរដ្ឋកម្ពុជាជាច្រើនយល់ដឹងពីអត្ថប្រយោជន៍នៃបន្លែសុវត្ថិភាព និងយល់ដឹងពីផលប៉ះពាល់នៃបន្លែមានសារធាតុគីមី ដែលលក់លើទីផ្សារកម្ពុជា ។
ស្របពេលតម្រូវការទីផ្សារនៃបន្លែសុវត្ថិភាពនេះកាន់តែច្រើននោះ កសិករក៏បានពង្រីកការដាំដុះ បន្ថែមដើម្បីផ្គត់ផ្គង់នៅលើទីផ្សារហើយក៏ទទួលបានចំណូលបន្ថែមពីរបរដាំដុះបន្លែសុវត្ថិភាពនេះដែរ ។
បើតាមអ្នកស្រី សួន សុឃៃ ម្ចាស់ផ្សារកសិផលធម្មជាតិ J Green បានអោយដឹងថា បច្ចុប្បន្ននេះតម្រូវការនៃបន្លែសុវត្ថិភាព នៅលើទីផ្សារប្រទេសកម្ពុជា កាន់តែមានច្រើនឡើងៗ ពីព្រោះពលរដ្ឋជាច្រើនក៏បានយល់ដឹងពីអត្ថប្រយោជន៍និងបានគាំទ្របន្លែសុវត្ថិភាពដាំដុះដោយកសិករខ្មែរ ក៏ប៉ុន្តែយ៉ាងណាក្ដី បន្លែសុវត្ថិភាពក៏នៅតែមានបញ្ហាប្រឈមនឹងការប្រកួតប្រជែងជាមួយបន្លែ នាំចូលឬបន្លែដែលដាំដុះដោយប្រើជីគីមី ។
អ្នកស្រីបន្តថា ចាប់តាំងកម្ពុជាជួបប្រទះនឹងជំងឺកូវីដ១៩ ឃើញថាបន្លែសុវត្ថិភាពរបស់កសិករកម្ពុជា ដែលសហការជាមួយផ្សារកសិផលធម្មជាតិ J Green ហាក់ទទួលបានការគាំទ្រពីប្រជាពលរដ្ឋកាន់តែច្រើន ដែលទាមទារអោយផ្សារកសិផលធម្មជាតិ ត្រូវជំរុញអោយកសិករបង្កើនការដាំដុះ ដើម្បីផ្គត់ផ្គង់លើទីផ្សារអោយគ្រប់ទៅនឹងតម្រូវការ ។ អ្នកស្រី បាននិយាយថា « តាមពិតទៅ កសិករមួយចំនួនធំកាលពីមុនមិនចេះដាំដុះបន្លែសុវត្ថិភាពទេ ក៏ប៉ុន្តែបន្ទាប់ពីមានក្រុមការងារបច្ចេកទេសណែនាំអោយអនុវត្តន៍សាកល្បងដាំដុះបន្លែសុវត្ថិភាពក៏ឃើញបានផលល្អ ប្រសើរ ហើយកសិករក៏ចាប់ផ្ដើមងាកមកដាំបន្លែសុវត្ថិភាព ពីព្រោះវាមានទីផ្សារស្រាប់ដោយមិនភ័យព្រួយពីបញ្ហាទីផ្សារទៀតឡើយ » ។
លោកស្រីបន្ថែមថា បច្ចុប្បន្ននេះ ក៏នៅមានប្រជាពលរដ្ឋមួយចំនួនធំទៀតដែលគិតថា បន្លែដែលដាំដុះតាមបច្ចេកទេសធម្មតាឬហៅថាបន្លែសុវត្ថិភាពនេះ មានតម្លៃខ្ពស់បើធៀបនឹងបន្លែនៅតាមផ្សារធម្មតា តែតាមពិតទៅបើប្រៀបគ្នាឃើញថាបន្លែសុវត្ថិភាពថ្លែងតិចតួចប៉ុណ្ណោះ ដូច្នេះប្រជាពលរដ្ឋកម្ពុជាគួរតែងាកមកទទួលទានបន្លែសុវត្ថិភាព ដើម្បីសុខភាពផង និងជួយគាំទ្រដល់កសិករក្នុងស្រុកផង ។
លោកឃុត សុខា ម្ចាស់កសិដ្ឋានដំណាំប៉េងប៉ោះមួយកន្លែងនៅស្រុកពួកខេត្តសៀមរាបបានអោយដឹងថា ការរកទីផ្សារសម្រាប់បន្លែសុវត្ថិភាព នៅខេត្តសៀមរាប គឺមិនពិបាកទេ ជាក់ស្ដែងដំណាំប៉េងប៉ោះដែលដាំដុះដោយបច្ចេកទេសសុវត្ថិភាព និងមិនប្រើគីមី គឺមានការទទួលចាំទិញពីម្ចាស់សណ្ឋាគារ ពីផ្សារទំនើប និងពីប្រជាពលរដ្ឋនៅក្នុងតំបន់មូលដ្ឋាននោះជាច្រើន ។ លោកបានថា « រៀងរាល់ថ្ងៃយើងបេះ ប៉េងប៉ោះទៅអោយដៃគូរបស់យើងដូចជាសណ្ឋាគារខ្លះ តាមផ្សារទំនើបនានាក្នុងខេត្តសៀមរាប ហើយក៏មានអ្នកមកទិញយកទៅហូបតាមផ្ទះជាច្រើនដែរ ។ និយាយរួមទៅបន្លែដែលយើងដាំ ដោយមិនប្រើគីមី គឺមានប៉ុន្មានគេរង់ចាំទិញទាំងអស់មិនពិបាកលក់នោះទេ » ។
លោកបន្តថា ការដាំដុះដំបូងៗពិបាកបន្តិចព្រោះថាការដាំបន្លែសុវត្ថិភាពមិនស្រួលដូចដាំដាក់ជីគីមី និងប្រើថ្នាំគីមីនោះទេ ក៏ប៉ុន្តែនៅពេលដែលបានផលគឺរង់ចាំប្រមូលលុយជាក់ស្ដែងប៉េងប៉ោះមួយគីឡូក្រាមលក់បោះដុំបាន៥ដុល្លារឬ២ម៉ឺនរៀលក៏ប៉ុន្តែបើលក់រាយអាចបាន៦ដុល្លារក្នុងមួយគីឡូក្រាម ។
យោងតាមរបាយការណ៍ និងការព្យាករណ៍របស់ធនាគារអភិវឌ្ឍន៍អាស៊ី បានអោយដឹងថា វិស័យកសិកម្មកម្ពុជា ក្នុងរយៈពេលថ្មីៗនេះ មានភាពល្អប្រសើរជាងមុនឆ្ងាយ ដែលនឹងធ្វើអោយសេដ្ឋកិច្ចកម្ពុជា មានភាពប្រសើរផងដែរ ក្នុងនោះកាលពីADB ព្យាករណ៍ថាសេដ្ឋកិច្ចកម្ពុជានឹងធ្លាក់ដល់-៥,៥ភាគរយ ក៏ប៉ុន្តែថ្មីៗនេះក៏បានព្យាករណ៍ឡើងវិញថានឹងធ្លាក់ចុះត្រឹមតែ -៤ភាគរយប៉ុណ្ណោះ ក្នុងឆ្នាំ ២០២០នេះ ៕
ចែករំលែកព័តមាននេះ