រាជធានីភ្នំពេញ ៖ សពទារកម្នាក់ ត្រូវបានបងប្អូនប្រជាពលរដ្ឋ ប្រទះឃើញក្នុងថង់មួយ ដែលយកមកបោះចោលនៅជិតធុងសំរាម នៅវត្តភ្នំ ក្នុងសង្កាត់វត្តភ្នំ ខណ្ឌដូនពេញ បង្កឲ្យមានការភ្ញាក់ផ្អើលដល់សមត្ថកិច្ចមូលដ្ឋាន ចុះមកមើលសពទារកនោះ នាព្រឹកថ្ងៃទី២៣ ខែកញ្ញា ឆ្នាំ២០២០នេះ ។
ក្រោយទទួលដំណឹងភ្លាមៗ កម្លាំងនគរបាលក្រសួងមហាផ្ទៃ និងក្រុមការងារស៊ើបអង្កេតបទល្មើសមនុស្សឃាត (HIT) និងក្រុមការងារបច្ចេកទេសវិទ្យាសាស្ត្រ (FST) នៃអង្គភាពការពារកុមារ (CPU) រួមជាមួយនឹងនគរបាលដ្ឋានខណ្ឌដូនពេញ បានចុះទៅត្រួតពិនិត្យ និងហំព័ទ្ធកន្លែងកើតហេតុ និងបើកការស៊ើបអង្កេត ថាតើជាករណីឃាតកម្មលើទារក ឫយ៉ាងណា ?
តាមការពិនិត្យ និងធ្វើកោសល្យវិច័យ ទៅលើសាកសព សមត្ថកិច្ចការិយាល័យជំនាញបច្ចេកទេស និងលោកវេជ្ជបណ្ឌិត នង សុវណ្ណរ័ត្ន បានសន្និដ្ឋានថា ទារកបានស្លាប់ក្នុងផ្ទៃម្ដាយ មុនពេលសម្រាល ។
បើតាម សន្តិសុខរមណីយដ្ឋានវត្តភ្នំម្នាក់ ឈ្មោះ ពេជ ចាន់ ភេទប្រុស អាយុ៤៦ឆ្នាំ បានប្រាប់ឲ្យដឹងថា នៅវេលាម៉ោង០៥ព្រឹក ថ្ងៃទី២៣ ខែកញ្ញា ឆ្នាំ២០២០ លោកបានជិះម៉ូតូ ចេញពីផ្ទះមកប្រចាំការ នៅរមណីយដ្ឋានវត្តភ្នំ ស្រាប់តែមានឈ្មោះ ហឿន ភេទប្រុស អាយុប្រហែល ៣៨ឆ្នាំ ជាភ្នាក់ងារប្រមូលសំរាម បានមកប្រាប់គាត់ថា មានទារកស្លាប់ នៅក្នុងស្បោងខ្មៅមួយ ។
សន្តិសុខរមណីយដ្ឋានវត្តភ្នំ បានបន្តថា បន្ទាប់ពីទទួលបានព័ត៌មានភ្លាម លោកបានរាយការណ៍ទៅប៉ូលិសខណ្ឌ និងប៉ុស្តិ៍ ឲ្យចុះមកពិនិត្យ នៅកន្លែងកើតហេតុ ។
បន្ទាប់មក សមត្ថកិច្ចមូលដ្ឋាន បានរាយការណ៍ជូនព្រះរាជអាជ្ញារងអមសាលាដំបូងរាជធានីភ្នំពេញ និងបានសហការណ៍ជាមួយការិយាល័យបច្ចេកទេសវិឡាសាស្ត្រ ការិយាល័យព្រហ្មទណ្ឌកំរិតធ្ងន់ អង្គភាពការពារកុមារ (CPU) និងពេទ្យអមសាលាដំបូងរាជធានីភ្នំពេញ ដើម្បីបង្កើត គណៈកម្មការធ្វើកោសល្យវិច័យ ពិនិត្យសព និងកន្លែងកើតហេតុ ។
ក្រោយពីបញ្ចប់ការពិនិត្យ ខាងជំនាញបច្ចេកទេស បានប្រគល់សពអោយ មន្ត្រីប៉ុស្ដិ៍នគរបាលរដ្ឋបាលវត្តភ្នំ ដើម្បីចាត់ចែងដឹកសពទារក បញ្ជូនទៅវត្តឬស្សីសាញ់ ដើម្បីបូជាតាមប្រពៃណី ៕
ចែករំលែកព័តមាននេះ