ប្រភពប៉ូលិសមូលដ្ឋាននិយាយកាលពីថ្ងៃទី២៩ មីនា ថា ប្រមុខឧទ្ទាមអ៊ិស្លាមនៅតំបន់កូកាស់រុស្ស៊ីជនជាតិឆេឆេនី លោកដូគូ អ៊ូម៉ារ៉ូវ អាចស្ថិតក្នុងចំណោមពួកឧទ្ទាម១៧នាក់ដែលសម្លាប់កាលពីថ្ងៃទី២៨ មីនា ក្នុងឱកាសនៃប្រតិបត្តិការយោធាមួយនៅរដ្ឋអ៊ីនហ្គូជី។ យោងតាមព័ត៌មានទាំងឡាយថា បណ្តាសមាជិកកងអង្គរក្សរបស់លោកដូគូ អ៊ូម៉ារ៉ូវ ត្រូវស្លាប់ក្នុងចំណោមពួកឧទ្ទាម។ ប្រការនេះអាចឱ្យគេសន្មត់ថា លោកដូគូ អ៊ូម៉ារ៉ូវ ខ្លួនឯងក៏ត្រូវស្លាប់ដែរ។
វាសនារបស់លោកដូគូ អ៊ូម៉ារ៉ូវ ដែលប្រកាសខ្លួនឯងថា ជាប្រមុខនៃអេមីរ៉ាតកូកាស់ មួយតែងជាកម្មវត្ថុនៃពាក្យចចាមអារ៉ាមនានា។ ការស្លាប់របស់លោកត្រូវបានប្រកាសជាញឹកញាប់រយៈពេលប៉ុន្មានឆ្នាំចុងក្រោយនេះ តែដោយពុំមានការអះអាងរបស់ប្រភពផ្លូវការឡើយ។
ក្នុងសារវីដេអូលើកចុងក្រោយរបស់លោកចេញផ្សាយកាលពីខែមីនាកន្លងមកនេះតាមអ៊ីនធើរណេតអ៊ិស្លាម លោកដូគូ អ៊ូម៉ារ៉ូវ បានផ្តល់ការគាំទ្ររបស់លោកចំពោះចលនាបះបោរទាំងឡាយក្នុងពិភពអារ៉ាប់។
អាជ្ញាធររុស្ស៊ីបានប្រកាសកាលពីថ្ងៃទី២៨ មីនា កន្លងមកនេះពីការកំទេចមូលដ្ឋានមួយរបស់ពួកឧទ្ទាមនៅអ៊ីនហ្គូជី ក្រោយការវាយប្រហារតាមអាកាស និងប្រតិបត្តិការតាមជើងគោកមួយមក ៕
ចែករំលែកព័តមាននេះ