រាជធានីភ្នំពេញ ៖ កម្លាំងសមត្ថកិច្ចខណ្ឌចំការមនឃាត់ខ្លួនជនសង្ស័យជនជាតិចិនម្នាក់ ដកហូតគ្រឿងញៀនជាច្រើនគីឡូក្រាម បង្កការភ្ញាក់ផ្អើលយ៉ាងខ្លាំងនៅក្នុងកោះពេជ្រ កាលពីវេលាម៉ោង១០និង៣០នាទីយប់ថ្ងៃទី២២ ខែកញ្ញា ឆ្នាំ២០២០ ក្នុងបរិវេណកោះពេជ្រ ជិតអគារខុនដូមួយកន្លែង ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
ក្នុងប្រតិបត្តិការចុះបង្ក្រាបករណីខាងលើ សមត្ថកិច្ចបានដកហូតរថយន្តមួយគ្រឿងម៉ាកឡិចស៊ីស GS 300 ពណ៌ខ្មៅ ពាក់ស្លាកលេខ ភ្នំពេញ 2W-7669 ព្រមទាំងថ្នាំញៀនប្រភេទម្សៅក្រាមសថ្លា ជិត៤គីឡូក្រាម ថ្នាំញៀនប្រភេទហេរ៉ូអុីនចំនួន១៤ដុំ លុយចំនួន៣០០ដុល្លារ និងទូរស័ព្ទដៃ១គ្រឿង ។ ចំណែកជនសង្ស័យជាជនជាតិចិនម្នាក់ដែលត្រូវឃាត់ខ្លួនមិនស្គាល់អត្តសញ្ញាណនោះទេ ។
សមត្ថកិច្ចបានអោយដឹងថា មុនពេលកើតហេតុ កម្លាំងសមត្ថកិច្ចចំរុះបានដាក់ គោលដៅត្រួតពិនិត្យអាវុធជាតិផ្ទុះ និងច្បាប់ចរាចរណ៍នៅជិតស្ពានហង្សកោះពេជ្រ ស្របពេលនោះដែរ ក៍ស្រាប់តែមានរថយន្តមួយគ្រឿងម៉ាកឡិចស៊ីស GS300 ពណ៌ខ្មៅ បានបើកទម្លុះ បារ៉ាសរបស់សមត្ថកិច្ច រួចបើកគេចចូលទៅក្នុងបរិវេណកោះពេជ្រ ។
តាមប្រភពដដែលបានបន្តថា ភ្លាមៗនោះដែរ កម្លាំងសមត្ថកិច្ចក៍បានដេញតាមរហូតមកដល់ជិតចំណុចខុនដូមួយកន្លែង ក៍ស្រាប់តែសមត្ថកិច្ចបានប្រទះឃើញមនុស្សចំនួន៤នាក់ មានស្រីមានប្រុស ព្រមទាំងក្មេង បានយួរកាបូបមួយទៅដែរ ប៉ុន្តែដោយសារភ័យ ស្លន់ស្លោពេក ក្រុមជនសង្ស័យទាំងនោះក៏បានបោះកាបូបនោះចោល ហើយនាំគ្នារត់គេចខ្លួនបាត់ ។
តាមប្រភពដដែលបានបន្តទៀតថា បន្ទាប់ពីឃើញសកម្មភាពបែបនេះ កម្លាំងសមត្ថកិច្ច ក៏សហការជាមួយនិងព្រះរាជអាជ្ញារង អមសាលាដំបូងរាជធានីភ្នំពេញ សហការជាមួយនឹងការិយាល័យប្រឆាំងគ្រឿងញៀនរាជធានីភ្នំពេញ បានធ្វើការឆែកឆេរ ក្នុងកាបូបនោះ រកឃើញមានម្សៅក្រាមសរថ្លា មួយថង់ខ្មៅ ទំងន់ជិត៤គីឡូក្រាម លុយចំនួន៣០០ដុល្លារ និងទូរសព្ទ័១គ្រឿង ។
តាមប្រភពដដែលបានបន្តទៀតថា លុះបន្តិចក្រោយមក កម្លាំងសមត្ថកិច្ចចំរុះ កំពុងតែធ្វើការឡោមព័ទ្ធជុំវិញកន្លែងកើតហេតុ ក៍ស្រាប់តែប្រទះឃើញបុរសជាជនជាតិចិនម្នាក់ នៅអាគារមួយកន្លែងជិតមហោស្រពកោះពេជ្រ ដោយក្នុងដៃមានយួរថង់១ ពេលនោះ ជនសង្ស័យដែលជាជនជាតិចិនម្នាក់នោះ គ្រាន់តែឃើញកម្លាំងសមត្ថកិច្ចចំរុះភ្លាម ក៏បានបោះថង់នោះចោល ហើយរត់គេចខ្លួនដែរ ប៉ុន្តែត្រូវបានសមត្ថកិច្ចឃាត់ខ្លួនបាន និងធ្វើការឆែកឆេរ ស្រាប់តែរកឃើញថ្នាំញៀនប្រភេទ ហេរ៉ូអ៊ីន ចំនួន១៤ដុំ បន្ថែមទៀតផងដែរ ។
ក្រោយពេលកើតហេតុ បន្ទាប់ពីពិនិត្យនិងឆែកឆេររួចហើយ វត្ថុតាងថ្នាំញៀន ព្រមទាំងរថយន្តឡិចស៊ីស GS300 មួយគ្រឿង រួមទាំងជនសង្ស័យ ត្រូវបានសមត្ថកិច្ច ឃាត់ខ្លួនយកទៅអធិការនគរបាលខណ្ឌចំការមន ដើម្បីចាត់ការតាមនីតិវិធីជាបន្តទៀត៕ (កែសម្រួលដោយ ៖ ធីតា)
ចែករំលែកព័តមាននេះ