ស្វែងរកសពស្ត្រីម្នាក់ត្រូវជំនន់ទឹកភ្លៀងអូសតាមទឹក ខណៈកំពុងឆ្លងព្រំដែនមកកម្ពុជា
- ប៉ៃលិន
ខេត្តប៉ៃលិន៖ នារសៀលថ្ងៃទី២១ ខែកញ្ញា ឆ្នាំ២០២០ លោក ផាន់ ចាន់ធុល អភិបាលខេត្ត អមដំណើរដោយលោកអភិបាលរងខេត្ត និងក្រុមការងារ…
ខេត្តប៉ៃលិន៖ នារសៀលថ្ងៃទី២១ ខែកញ្ញា ឆ្នាំ២០២០ លោក ផាន់ ចាន់ធុល អភិបាលខេត្ត អមដំណើរដោយលោកអភិបាលរងខេត្ត និងក្រុមការងារ ចុះពិនិត្យមើលដល់កន្លែងកើតហេតុ និងដឹកនាំកងកម្លាំងចម្រុះដោយផ្ទាល់ ដើម្បីឱ្យបន្តស្វែងរកសពស្ត្រីរងគ្រោះដែលត្រូវជំនន់ទឹកភ្លៀងហូរអូសយកទៅតាមទឹក ខណៈពេលរូបគាត់ (ស្ត្រីរងគ្រោះ) និងពលករខ្មែរដទៃទៀតកំពុងតែព្យាយាមឆ្លងអូរព្រំដែនត្រលប់មកពីប្រទេសថៃវិញ ហើយរហូតមកដល់ពេលនេះ សាកសពស្ត្រីរងគ្រោះនៅមិនទាន់រកឃើញនៅឡើយទេ។
ក្នុងឱកាសនោះដែរ លោក ផាន់ ចាន់ធុល អភិបាលខេត្តប៉ៃលិន បានមានប្រសាសន៍ជំរុញដល់កម្លាំងចម្រុះទាំងអស់ ត្រូវសហការជាមួយសាច់ញាតិជនរងគ្រោះ និងភាគីថៃ ដើម្បីធ្វើការរុករកសពស្ត្រីរងគ្រោះនៅតាមបណ្តោយអូរព្រំដែនឱ្យឃើញ ដើម្បីប្រគល់ឱ្យក្រុមគ្រួសារសព យកទៅធ្វើបុណ្យតាមប្រពៃណីនៅឯស្រុកកំណើតវិញ។
លោកអភិបាលខេត្ត បានលើកឡើងថា ដោយសារតែប៉ុន្មានថ្ងៃនេះ មានភ្លៀងធ្លាក់ច្រើននៅតាមតំបន់ភ្នំផ្នែកខាងលើ ដែលបណ្តាលទឹកស្ទឹងប៉ៃលិន និងតាមអូរនានាក្នុងខេត្ត មានសភាពឡើងខុសប្រក្រតីបង្កទៅជាជំនន់ទឹកភ្លៀង ដូច្នេះបងប្អូនដែលរស់នៅតាមបណ្តោយដងស្ទឹងប៉ៃលិន និងអូរនានា ត្រូវមានការប្រុងប្រយ័ត្នឱ្យបានខ្ពស់ ។ ហើយអាជ្ញាធរមូលដ្ឋានក៏ត្រូវសហការជាមួយអង្គភាពជំនាញពាក់ព័ន្ធ ជាពិសេសមន្ទីរធនធានទឹក និងឧតុនិយមខេត្ត ត្រូវសិក្សារកទីតាំងរំដោះទឹកចេញ បើសិនជាជំនន់ទឹកភ្លៀងមានស្ថានភាពមិនល្អ ព្រមទាំងធ្វើការជួយសង្គ្រោះប្រជាពលរដ្ឋឱ្យបានទាន់ពេលវេលា។
សូមរំលឹកថា កាលពីរសៀលថ្ងៃទី១៩ ខែកញ្ញា ឆ្នាំ២០២០កន្លងទៅ នៅត្រង់ចំណុចភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ឈមនឹងស្រុកពោណាំរ៉ន ខេត្តច័ន្ទបុរី ប្រទេសថៃ មានពលករខ្មែរឆ្លងដែនចំនួន០៣នាក់ ត្រូវជាម្តាយ ឪពុក កូននឹងគ្នា ។
សូមរំលឹកទៀតថា ក្នុងនោះជនរងគ្រោះដែលបានបាត់បង់ជីវិត និងបាត់ខ្លួននោះមានឈ្មោះ សេង ស្រីម៉ៅ អាយុ៤១ឆ្នាំ រស់នៅភូមិស្វាយមាស ឃុំកណ្តុរជ្រុំ ស្រុកពញាក្រែក ខេត្តត្បូងឃ្មុំ ចំណែកប្តីឈ្មោះ ឆោ ឆេង អាយុ៤១ឆ្នាំ និងកូនស្រីឈ្មោះ ឆេង ដាណេត អាយុ១៥ឆ្នាំ បានលួចឆ្លងដែនពីប្រទេសថៃចូលមកទឹកដីកម្ពុជាវិញ តាមច្រកធម្មជាតិអូរព្រំដែនកម្ពុជា-ថៃ ខណៈស្ថានភាពទឹកកំពុងឡើងខ្លាំង ដោយសារតែជំនន់ទឹកភ្លៀង ក៏ស្រាប់តែអូសស្ត្រីរងគ្រោះហូរទៅតាមទឹកបាត់តែម្តងទៅ ហើយរហូតមកដល់ពេលនេះ នៅរកសពជនរងគ្រោះមិនទាន់ឃើញនៅឡើងទេ ដោយសារស្ថានភាពអូរនៅព្រំដែនមានព្រៃច្រើន និងសម្បូរទៅដោយគ្រាប់មីនទៀតផង ទើបធ្វើឱ្យក្រុមការងារ និងកងកម្លាំងចម្រុះពិបាកក្នុងការរុករកសពជនរងគ្រោះ។
សូមរំលឹកបន្តទៀតថា ៖ ពលករជាង១០នាក់មកស្រុកវិញឆ្លងទឹកអូរកំពុងហូរខ្លាំង បាត់ខ្លួនម្នាក់ ។
ចែករំលែកព័តមាននេះ