ខេត្តបន្ទាយមានជ័យ ៖ ជនសង្ស័យម្នាក់ក្នុងចំណោមបក្ខពួកផ្សេងទៀត បន្ទាប់ពីធ្វើសកម្មភាពលួចគាស់ឃ្លាំងផ្ទុកសម្ភារៈបានមួយថ្ងៃ ត្រូវបានកម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានធ្វើការស្រាវជ្រាវតាមវិធានការជំនាញ រហូតឈានដល់ការចាប់ឃាត់ខ្លួនបានកាលពីវេលាម៉ោង១០និង១៣នាទីព្រឹកថ្ងៃទី១៧ ខែកញ្ញា ឆ្នាំ២០២០ រួចនាំខ្លួនមកធ្វើការសាកសួរនៅបញ្ជាការដ្ឋានមូលដ្ឋានកងរាជអាវុធហត្ថក្រុងប៉ោយប៉ែត…
ខេត្តបន្ទាយមានជ័យ ៖ ជនសង្ស័យម្នាក់ក្នុងចំណោមបក្ខពួកផ្សេងទៀត បន្ទាប់ពីធ្វើសកម្មភាពលួចគាស់ឃ្លាំងផ្ទុកសម្ភារៈបានមួយថ្ងៃ ត្រូវបានកម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានធ្វើការស្រាវជ្រាវតាមវិធានការជំនាញ រហូតឈានដល់ការចាប់ឃាត់ខ្លួនបានកាលពីវេលាម៉ោង១០និង១៣នាទីព្រឹកថ្ងៃទី១៧ ខែកញ្ញា ឆ្នាំ២០២០ រួចនាំខ្លួនមកធ្វើការសាកសួរនៅបញ្ជាការដ្ឋានមូលដ្ឋានកងរាជអាវុធហត្ថក្រុងប៉ោយប៉ែត ។
លោកវរសនីយ៍ត្រីនួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឲ្យដឹងថា បន្ទាប់ពីទទួលបានបណ្តឹងពីជនរងគ្រោះឈ្មោះ យុន កែវ ភេទប្រុស អាយុ៤២ឆ្នាំ រស់នៅភូមិប្រជាធម្មលិច សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ បានប្តឹងថា មានករណីក្រុមជនសង្ស័យលួចគាស់ឃ្លាំងរបស់គាត់ កាលពីយប់ថ្ងៃទី១៦ខែកញ្ញា ឆ្នាំ២០២០ យកអស់ទ្រព្យសម្បត្តិនៅក្នុងឃ្លាំងជាច្រើនរួចមក។
លោកបានដឹកនាំកម្លាំងចុះធ្វើការស្រាវជ្រាវតាមវិធានការជំនាញ រហូតឈានដល់ការបង្ក្រាបចាប់ឃាត់ខ្លួនមុខសញ្ញា ជនសង្ស័យម្នាក់ឈ្មោះ វង្ស និត ភេទប្រុស អាយុ២៣ឆ្នាំ រស់នៅភូមិប្រជាធម្មលិច សង្កាត់ផ្សារកណ្ដាល ក្រុងប៉ោយប៉ែត ខេត្ត បន្ទាយមានជ័យ កាលពីវេលាម៉ោង១០និង១៣នាទីថ្ងៃទី១៧ខែកញ្ញា ឆ្នាំ២០២០ ហើយបានដកហូតវត្ថុតាងដែលលួចបានបញ្ជូនមកកាន់មូលដ្ឋានកងរាជអាវុធហត្ថក្រុងដើម្បីធ្វើការសាកសួរ។
លោកមេបញ្ជាការបានបញ្ជាក់ថា នៅចំពោះមុខសមត្ថកិច្ច ជនសង្ស័យឈ្មោះវង្ស និត បានសារភាពថា ខ្លួនរួមទាំងបក្ខពួកផ្សេងទៀត ពិតជាបានធ្វើសកម្មភាពលួចគាស់ឃ្លាំងរបស់ជនរងគ្រោះប្រាកដែមែន ដោយយកបានប្រេងបូបក្នុងកាដុងចំណុះ១៨លីត្រ ចំនួន១៨កាដុង, អាគុយ៧០អំពែ ចំនួន៨គ្រាប់, ដូយរថយន្ត៣០តោន ចំនួន២, ម៉ូទ័រកាត់ដែកចំនួន៣គ្រឿង, ម៉ូទ័រលាងរថយន្តចំនួន៥គ្រឿង, ឌីណាម៉ូរថយន្តចំនួន៤គ្រឿង និងសម្ភារៈមួយចំនួនទៀត ៕ (កែសម្រួលដោយ ៖ ធីតា)
លោកវរសេនីយ៍ត្រីនួន នីណារ៉ូ បានបញ្ជាក់បន្ថែមទៀតថា ដោយផ្អែកលើបណ្តឹងរបស់ជនរងគ្រោះ និងចម្លើយសារភាព របស់ជនសង្ស័យ រួមមានទាំងវត្ថុតាង កម្លាំងជំនាញផ្នែកព្រហ្មទណ្ឌបាន កសាងសំណុំរឿងបញ្ជូនមកបញ្ជាការដ្ឋានកងរាជអាវុធហត្ថខេត្តនិងបានរៀបចំបញ្ជូនខ្លួនជនសង្ស័យទៅសាលាដំបូងខេត្ត ដើម្បីចាត់ការបន្តតាមនិតិវិធីច្បាប់ហើយដែរ ។ ចំណែកសម្ភារៈវត្ថុតាងប្រគល់ជូនម្ចាស់ដើមវិញផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ