រមណីយដ្ឋានបុប្ផាកោះភ្លុកកន្លែងងូតទឹកកម្សាន្តសមប្រកបសម្រាប់ឱកាសបុណ្យចូលឆ្នាំថ្មីខាងមុខ
ខេត្តស្ទឹងត្រែង ៖ រមណីយដ្ឋានបុប្ផាកោះភ្លុក ជារមណីយដ្ឋានមានប្រជាប្រិយភាពជាងគេ ក្នុងចំណោមរមណីយដ្ឋាន ធំៗចំនួន៣ទៀតក្នុងខេត្តស្ទឹង ត្រែង។
ខេត្តស្ទឹងត្រែង ៖ រមណីយដ្ឋានបុប្ផាកោះភ្លុក ជារមណីយដ្ឋានមានប្រជាប្រិយភាពជាងគេ ក្នុងចំណោមរមណីយដ្ឋាន ធំៗចំនួន៣ទៀតក្នុងខេត្តស្ទឹង ត្រែង។
អ្វីដែលជាការចាប់អារម្មណ៍របស់អ្នកទេសចរនោះគឺ «កោះភ្លុក» ជាកោះមួយនៅកណ្តាលទន្លេសេសាន មានទឹកថ្លាឆ្វង់ហូរ រឹមៗលើផ្ទាំងថ្ម ដែលអ្នក ទេស ចរជាតិទៅកម្សាន្តបាននារដូវប្រាំង ជាពិសេសនៅក្នុងឱកាសបុណ្យចូលឆ្នាំប្រពៃណីចិន និងបុណ្យចូលឆ្នាំប្រពៃណីជាតិខ្មែរ ។
រមណីយដ្ឋានបុប្ផាកោះភ្លុក មានចម្ងាយពីក្រុងស្ទឹងត្រែង ប្រមាណជា៣០គីឡូម៉ែត្រ ស្ថិតនៅភូមិភ្លុក ឃុំភ្លុក ស្រុកសេសាន ខេត្តស្ទឹងត្រែង បង្កើតឡើងនៅក្នុងឆ្នាំ២០០៨ ។
តាមសៀវភៅដែលចងក្រងឡើងដោយមន្ទីរវប្បធម៌ និងវិចិត្រសិល្បៈខេត្តស្ទឹងត្រែងឱ្យដឹងថា ដើមឡើយភូមិភ្លុក ឃុំភ្លុក ស្រុកសេសានជាតំបន់ដាច់ស្រយាលជាងគេ ដែលអ្នកទេសចរជាតិ និងអន្តរជាតិមិនដែលបានស្គាល់ ហើយជាតំបន់ដែលមានជនជាតិភាគតិចឡាវរស់នៅ និយាយតែភាសាឡាវលាយភាសាខ្មែរ ដែលពួកគេប្រកបរបរធ្វើកសិកម្ម ហើយការធ្វើដំណើរមកក្រុងស្ទឹងត្រែង ម្តងៗ គឺមានតែផ្លូវរទេះគោ និងធ្វើដំណើរតាមទូកប៉ុណ្ណោះ ។
រហូតដល់ឆ្នាំ២០០៧ ក្នុងអំឡុងពេលលោក ឡូយ សុផាត ជាអភិបាលខេត្ត បានសម្លឹងឃើញថា ភូមិភ្លុកជាតំបន់មានសក្តានុពល លើវិស័យទេសចរណ៍ លោកខិតខំស្ថាបនាផ្លូវមួយខ្សែក្រាលក្រួសក្រហម រួចរាល់ជាស្ថាពរនាឆ្នាំ២០០៨ រួចបានប្រមែប្រមូលជនជាតិភាគតិចឡាវ ក្នុងភូមិនោះសង់ជាតូបនៅលើកោះភ្លុក ដោយមានស្ពានសម្រួលដល់អ្នកទេសចរឆ្លង កាត់ ។ ចាប់ពីពេលនោះមកអ្នកទេសចរជាតិមានការចាប់អារម្មណ៍ បាននាំគ្នាទៅកម្សាន្ត ហើយមានកំណើនពី១ឆ្នាំទៅ១ឆ្នាំ ។
លោកទួន ថាំង មេឃុំភ្លុក រំពឹងថា នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរខាងមុខនេះ រមណីយដ្ឋានបុប្ផាកោះ អាចទទួលបានអ្នកទេសចរក្នុង១ថ្ងៃ៣០០០នាក់ ។ ចំពោះបុណ្យចូលឆ្នាំប្រពៃណីចិនកន្លងមក រមណីយដ្ឋានមួយនេះទទួលភ្ញៀវក្នុង១ថ្ងៃ២០០០នាក់ ។
លោកទួន ថាំង មេឃុំភ្លុក បញ្ជាក់ឱ្យដឹងថា «លក្ខណៈពិសេសនៃរមណីយដ្ឋានបុប្ផាកោះភ្លុកគឺ ទី១ ទឹកថ្លា ដូច្នេះដាក់ឈ្មោះថា «ទឹកថ្លាបុប្ផាភ្លុក» ទីពីរ មានតំបន់កម្សាន្តធម្មជាតិ ក្រៅពីក្យូស មានម្លប់ឈើ មានកោះជាច្រើន ដែលភ្ញៀវចាប់អារម្មណ៍» ។
រមណីយដ្ឋានបុប្ផាកោះភ្លុក ទាក់ទាញចិត្តអ្នកទេសចរជាតិ និងអន្តរជាតិ ទៅលេងកម្សាន្តលំហែកាយសប្បាយក្នុងអារម្មណ៍ គយគន់មើលទេសភាព ។ មិនត្រឹមតែទទួលបានអារម្មណ៍ស្រស់ត្រកាលពីខ្យល់បរិសុទ្ធប៉ុណ្ណោះទេ ថែមទាំងអាចងូតទឹកលេងកម្សាន្ត ប្រឡែងលេងជាមួយទឹកហូរ រឹមៗ និងមានផ្ទាំងថ្មនៅពី ក្រោម ៕
ចែករំលែកព័តមាននេះ