ទីក្រុងរ៉ង់ហ្គូន ៖ ក្រុមមន្ត្រី នៃគណៈកម្មាធិការជាតិរៀបចំការបោះឆ្នោត បាននិយាយថា ប្រទេសភូមា នឹងបោះឆ្នោតជាសកល ទៅតាមការគ្រោងទុក គឺនៅខែវិច្ឆិកា ឆ្នាំនេះ…
ទីក្រុងរ៉ង់ហ្គូន ៖ ក្រុមមន្ត្រី នៃគណៈកម្មាធិការជាតិរៀបចំការបោះឆ្នោត បាននិយាយថា ប្រទេសភូមា នឹងបោះឆ្នោតជាសកល ទៅតាមការគ្រោងទុក គឺនៅខែវិច្ឆិកា ឆ្នាំនេះ ទោះបីមានការអំពាវនាវពីគណបក្សប្រឆាំង ឲ្យពន្យារពេលក៏ដោយ ដោយហេតុផលថា ចំនួនអ្នកឆ្លងកូវីដ-១៩ បន្ថែមថ្មីៗ មានការកើនឡើងខ្លាំង ។
ប្រទេសស្ថិតក្នុងអាស៊ីអាគ្នេយ៍មួយនេះ បានរាយការណ៍ថា ចំនួនអ្នកឆ្លងកូវីដ-១៩ មានចំនួន ៦៧១ ករណីថ្មីទៀត កាលពីថ្ងៃអាទិត្យ ទី២០កញ្ញា ដែលជាចំនួនឆ្លងប្រចាំថ្ងៃខ្ពស់បំផុត ចាប់តាំងពីការផ្ទុះឡើង នាខែមីនាមក នាំឲ្យចំនួនសរុបកើនដល់ ៥.៥៤១នាក់ និងអ្នកស្លាប់ចំនួន ៩២នាក់ ។
មីយ៉ាន់ម៉ា បានឆ្លងកាត់ជាច្រើនសប្តាហ៍ ដោយគ្មានករណីឆ្លងក្នុងស្រុក មុនពេលមានការផ្ទុះឡើងខ្លាំង ក្នុងខែសីហា នៅតំបន់រ៉ាឃីនភាគខាងលិច ដែលបានឆ្លងរីករាលដាលពាសពេញប្រទេសតែម្តង ។
គណបក្សនានា បានបញ្ឈប់យុទ្ធនាការរបស់ខ្លួន ក្នុងរដ្ឋធានីរ៉ង់ហ្គូន កាលពីថ្ងៃចន្ទនេះ បន្ទាប់ពីអាជ្ញាធរបានដាក់ចេញនូវវិធានការតឹងរ៉ឹង បិទទីក្រុង ដោយបង្ខំអោយប្រជាជនប្រមាណ៥លាននាក់ ធ្វើការពីផ្ទះ ដើម្បីទប់ស្កាត់នឹងការឆ្លងរីករាលដាល ។
គណៈកម្មាធិការជាតិរៀបចំការបោះឆ្នោត បានប្រាប់អ្នកសារព័ត៌មានថា ការបោះឆ្នោតនឹងប្រព្រឹត្តិទៅដូចតាមកាលបរិច្ឆេទ នៅថ្ងៃទី៨ ខែវិច្ឆិកា ។
លោក Myint Naing មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត បានថ្លែងក្នុងសន្និសីទសារព័ត៌មាន កាលពីចុងសប្តាហ៍ថា “យើងមិនមានផែនការពន្យារពេលការបោះឆ្នោត ដោយហេតុផល នៃកូវីដ-១៩ នោះទេ” ។
លោកបាននិយាយបន្តថា ចំនួនស្ថានីយ៍បោះឆ្នោតនឹងត្រូវដំឡើងពី ៤០,០០០ ទៅ ៥០,០០០ កន្លែង ដើម្បីចៀសវាងការផ្ទុកចំនួនមនុស្សលើស ហើយបុគ្គលិកនឹងពាក់ឧបករណ៍ការពារ និងអ្នកបោះឆ្នោត ត្រូវពាក់ម៉ាស និងតម្រូវអោយលាងដៃ មុនចូលស្ថានីយ៍បោះឆ្នោត ។
លោកបានមានប្រសាសន៍ទៀតថា “យើងបានរៀបចំស្ថានការណ៍ដូច្នេះហើយ មិនមានអ្វីដែលត្រូវព្រួយបារម្ភនោះទេ” ៕
ចែករំលែកព័តមាននេះ