រាជធានីភ្នំពេញ ៖ ជនជាតិវៀតណាម២នាក់ប្តីប្រពន្ធត្រូវបានកម្លាំងនគរបាលខណ្ឌសែនសុខ សហការជាមួយនគរបាលខណ្ឌពោធិ៍សែនជ័យឃាត់ខ្លួន ដោយជាប់សង្ស័យផ្សំគំនិត និងទទួលផលចោរកម្ម ទិញរ៉ឺម៉កពីជនសង្ស័យលួច ក្នុងតម្លៃ១៣ម៉ឺនរៀល ។
ការឃាត់ខ្លួនជនសង្ស័យខាងលើនេះបានធ្វើឡើងកាលពីវេលាព្រឹកថ្ងៃទី២០ ខែ កញ្ញា ឆ្នាំ ២០២០ នៅចំណុចភូមិថ្មគោល សង្កាត់ចោមចៅទី២ ខណ្ឌពោធិ៍សែន បន្ទាប់ពីម្ចាស់តាមរកកន្ទុយរ៉ឺម៉កឃើញនៅផ្ទះជនជាតិវៀតណាម២នាក់នោះ ។
ជនសង្ស័យរូបនោះពុំត្រូវនគរបាលព្រហ្មទណ្ឌសែនសុខប្រាប់អោយស្គាល់អត្តសញ្ញាណឡើយ ។
តាមប្រភពព័ត៌មានពីម្ចាស់រ៉ឺម៉កបានអោយដឹងថា មុនពេលកើតហេតុ គាត់បានចតរ៉ឺម៉កម៉ូតូមួយគ្រឿងទុកមុខផ្ទះ ដើម្បីទុកដឹកហ្គាសយកទៅលក់អោយម៉ូយ ហើយត្រូវបានជនសង្ស័យ ម្នាក់បានចូលទៅធ្វើសកម្មភាពលួចកាលពីវេលាម៉ោងប្រមាណ៨និង៣០នាទីព្រឹក ថ្ងៃទី២០ ខែកញ្ញា ឆ្នាំ២០២០ នៅចំណុចភូមិស្លែងរលើង សង្កាត់អូរបែកក្អម ខណ្ឌ សែនសុខ រួច ជិះគេចខ្លួនបាត់ទៅ។
តាមប្រភពដដែលបានបន្តថា បន្ទាប់ពីបាត់រ៉ឺម៉ករួចមក រូបគាត់និងក្រុមគ្រួសារនាំគ្នាដើររក និងសាកសួរគ្រប់ច្រកល្ហក ហើយក៏បានប្រទះឃើញកន្ទុយរ៉ឺម៉កចតទុកនៅផ្ទះទិញលក់អេតចាយរបស់ជនជាតិវៀតណាមខាងលើ ។ ចំណែកម៉ូតូសម្រាប់អូសរ៉ឺម៉ក ត្រូវបានជនសង្ស័យដោះយកទៅបាត់។
តាមប្រភពដដែលបានអោយដឹងទៀតថា បន្ទាប់ពីរកឃើញកន្ទុយរ៉ឺម៉ក គាត់ក៍បានអោយបងប្អូនចាំឃ្លាំមើល ហើយក៍បានមកដាក់ពាក្យបណ្តឹង នៅនគរបាលមូលដ្ឋាន ក៍បានទៅសហការជាមួយនគរបាលខណ្ឌ ពោធិ៍សែនជ័យ ចុះទៅឆែកឆេរ ដកហូតបានកន្ទុយរ៉ឺម៉ក និងឃាត់ខ្លួន ជនជាតិវៀតណាម២នាក់ប្តីប្រពន្ធ ។ ដោយឡែក ម៉ូតូត្រូវបានជនសង្ស័យ ដោះចេញយកទៅបាត់។
ជនជាតិវៀតណាម២នាក់នោះ បានសារភាពថា កន្ទុយរ៉ឺម៉កនោះ ត្រូវបានគាត់ទិញពីបុរសម្នាក់ក្នុងតម្លៃ១៣ម៉ឺនរៀល ។ ទោះបីជាយ៉ាងណា គេមានការសង្ស័យថា ជនជាតិវៀតណាម២នាក់ ជាអ្នកផ្សំគំនិត ក្នុងអំពើលួច ព្រោះជនសង្ស័យដែលបង្ហាញមុខ ក្នុងកាមេរ៉ាសុវត្ថិភាព គេស្គាល់ថាជាកូនចៅរបស់ជនជាតិវៀតណាម២នាក់ប្តីប្រពន្ធរូបនោះ ៕ (កែសម្រួលដោយ ៖ ធីតា)
ចែករំលែកព័តមាននេះ