ខេត្តព្រៃវែង ៖ រថយន្តដឹកស្រូវ ដំឡូង សណ្តែក រថយន្តដឹកអ្នកដំណើរ និងរថយន្តទេសចរណ៍បានស្ទះបន្តកន្ទុយគ្នាយ៉ាងវែង នៅលើកំណាត់ផ្លូវជាតិលេខ១១ ស្ថិតក្នុងភូមិព្រែកខ្សាយ ឃុំព្រៃខ្សាយ «ក» ស្រុកពាមរក៍ នាព្រឹកថ្ងៃទី៧ មីនា ។ មូលហេតុនៃការស្ទះចរាចរណ៍នេះ គឺបណ្តាលមកពីរថយន្តកាម៉ាស់ដឹកខ្សាច់ដ៏ធំមួយគ្រឿងបានបើកមកជាប់ផុងកង់ក្រោយនៅចំណុចខាងលើ បន្ទាប់មកក៏មានរថយន្តដឹកស្រូវខ្នាតយក្សមួយគ្រឿង បើកមកដល់ជៀសទៅខាងឆ្វេងដៃ (ស្របទិសគ្នា) បំរុងវាងរថយន្តកាម៉ាស់ដែលជាប់ផុង ប៉ុន្តែរថយន្តទៅមុខមិនទាន់ផុតកង់មុខផងក៏ឈប់ទ្រឹងមួយកន្លែងធ្វើឱ្យផ្លូវទាំងមូលត្រូវបិទជិតដោយសាររថយន្តទាំងពីរគ្រឿង សូម្បីតែរ៉ឺម៉កនិងម៉ូតូ កង់ក៏ទៅមិនរួចទាំងអស់ ។
តាមប្រជាពលរដ្ឋរស់នៅកន្លែងកើតហេតុបានប្រាប់ថា កាលពីមួយខែមុននេះ ត្រង់កន្លែងជាប់ផុងមុខផ្ទះរបស់ពួកគាត់ គឺជាផ្លូវកៅស៊ូទេ (ផ្លូវជាតិលេខ១១) ប៉ុន្តែដោយសារក្រុមអាជីវករដឹកស្រូវ ដឹកខ្សាច់ ធ្ងន់ៗពេកធ្វើឱ្យផ្លូវនេះខូចបែកប្រេះ ហើយក៏មានមនុស្សមួយក្រុមយកគ្រឿងចក្រពីរបីមកឈូសកើបយកកៅស៊ូ និងដីស្អុយចេញក្នុងចម្ងាយប្រមាណជា២០០ម៉ែត្រ ។ បន្ទាប់ពីឈូសកើបយកដីស្អុយ និងកៅស៊ូចេញអស់ ក៏ទុកផ្លូវនេះចោលដោយមិនបានចាក់ថ្ម ឬកៅស៊ូឱ្យទៅជាផ្លូវស្អាតល្អវិញទេ ។ លុះនៅល្ងាចថ្ងៃទី៦ មីនា ក៏មានភ្លៀងធ្លាក់មួយមេជ្រាបទឹកចូលទៅក្នុងដីផ្លូវធ្វើឱ្យដីជ្រាយ ពេលមានរថយន្តម៉ូតូបើកមកធ្វើឱ្យបែកជាល្បាប់ និងផុងដោយកន្លែង ហើយនៅម៉ោង១១យប់ ថ្ងៃដដែលពេលរថយន្តកាម៉ាស់ខាងលើដឹកធ្ងន់ពេកមកជួបនឹងថ្នល់ដែលកំពុងជ្រាយស្រាប់ក៏ធ្វើឱ្យផុងជាប់តែម្តង ។
ប្រភពដដែលបន្តថា រហូតដល់ម៉ោងជិត៥ភ្លឺ ក៏មានរថយន្តដឹកស្រូវខ្នាតយក្សមួយគ្រឿង បើកមកជាប់ក្បែរគ្នាទៀត ធ្វើឱ្យផ្លូវទាំងមូលត្រូវបិទជាប់មិនអាចធ្វើចរាចរណ៍បានទាំងអស់ ហើយមកដល់ម៉ោង៧ព្រឹក ទើបមានគ្រឿងចក្ររបស់មន្ទីរសាធារណការ និងដឹកជញ្ជូនខេត្ត២ទៅ៣គ្រឿងមកជួយអន្តរាគមន៍ និងអូសទាញរថយន្តដែលជាប់ម្តងមួយៗ ដោយចំណាយពេលម្តងៗរាប់ម៉ោង ព្រោះរថយន្តខ្សាច់ និងរថយន្តដឹកស្រូវសុទ្ធតែខ្នាតយក្សដែលផ្ទុកទំងន់ចាប់ពី៥០តោនទៅ៦០តោន ។ ចំណែកឯរថយន្តតូចៗ ម៉ូតូ កង់ រ៉ឺម៉ក ត្រូវចំណាយពេលជាង១ម៉ោង ទើបឆ្លងផុតផ្លូវដ៏លំបាកនេះដែលមានចំងាយតែប្រមាណជា២០០ម៉ែត្រប៉ុណ្ណោះ ។
នៅព្រឹកថ្ងៃទី៧ មីនា ដែលជាថ្ងៃច័ន្ទ ដើមសប្តាហ៍ផងនោះ មន្ត្រីរាជការទាំងអស់ដែលត្រូវទៅធ្វើការនៅក្នុងក្រុងព្រៃវែង ត្រូវខាតពេលវេលាធ្វើការយ៉ាងតិច២ម៉ោង ដោយសារស្ទះចរាចរណ៍។ ចំណែកសិស្សានុសិស្សវិទ្យាល័យពាមរក៍ ត្រូវខាតពេលសិក្សាជិត១ម៉ោង លោកគ្រូ អ្នកគ្រូខាតពេលបង្រៀនសិស្សជិត១ម៉ោងដែរ ឯអាជីវករនានាក៏ត្រូវខកខានពេលវេលាប្រគល់ទំនិញឱ្យអតិថិជន។ កត្តាទាំងអស់នេះ បានធ្វើឱ្យមានការត្អួញត្អែរ និងរិះគន់ពីគ្រប់មជ្ឈដ្ឋានទៅលើមន្ទីរសាធារណការ និងដឹកជញ្ជូនខេត្ត ដែលគ្រាន់តែផ្លូវប្រវែងប្រមាណជាង២០០ម៉ែត្រសោះ ឈូសកើបហើយទុកចោលមិនព្រមធ្វើឱ្យហើយបង្កឱ្យលំបាកដល់គ្រប់មជ្ឈដ្ឋានទាំងប្រជាពលរដ្ឋ មន្ត្រីរាជការ និងសិស្សានុសិស្ស ។ ករណីនេះលោកសឹម តេង អនុប្រធានមន្ទីរសាធារណការ និងដឹកជញ្ជូនខេត្តមានប្រសាសន៍ថា ផ្លូវជាតិលេខ១១ នេះគឺស្ថិតនៅក្នុងគម្រោងជួសជុលឡើងវិញរបស់ក្រសួងដែលបានដាក់ឱ្យក្រុមហ៊ុនឯកជនដេញថ្លៃធ្វើ គឺពុំមែនជាការទទួលខុសត្រូវរបស់មន្ទីរនោះទេ៕
ចែករំលែកព័តមាននេះ