កងទ័ពរដ្ឋាភិបាលលីប៊ីកាលពីថ្ងៃទី២៩ មីនា បានវាយរុញច្រានកងកម្លាំងពួកបះបោរដែលលើកមកកាន់ទីតាំងរបស់លោកកាដាហ្វីគឺទីក្រុង SYRTE ដើម្បីបើកផ្លូវឆ្ពោះទៅទិសខាងលិច និងទីក្រុងទ្រីប៉ូលី។ ការវាយបកឱ្យដកថយក្រោយវិញនេះរបស់ពួកបះបោរធ្វើឡើង ខណៈពេលមានកិច្ចប្រជុំអន្តរជាតិមួយនៅក្រុងឡុងដ៏ ស្តីពីអនាគតរបស់លីប៊ី និងមធ្យោបាយទាំងឡាយដើម្បីឱ្យលោកកាដាហ្វី ព្រមចាកចេញពីអំណាច។
ទោះបីជាមានការជួយទ្រទ្រង់តាមរយៈការវាយប្រហារតាមអាកាសរបស់អន្តរជាតិ ដែលបានបញ្ឈប់ការវាយបករបស់កងទ័ពលោកកាដាហ្វីក្នុងពេលដែលកងទ័ពនេះប្រុងវាយដណ្តើមកាន់កាប់ទីក្រុងបេនហ្គាហ្ស៊ីទីតាំងបង្អែករបស់ពួកប្រឆាំងនៅភាគខាងកើតប្រទេស ក៏កងទ័ពបះបោរហាក់ដូចជាពុំទាន់មានប្រៀបខ្លាំង និងការចាត់តាំងប្រយុទ្ធដូចកងកម្លាំងរដ្ឋាភិបាលនៅឡើយ។
បន្ទាប់ពីរុលទៅដល់ទីក្រុងណូហ្វី លីយ៉ា កាលពីថ្ងៃទី២៨ មីនា ចម្ងាយ១០០គីឡូម៉ែត្រពីទីក្រុង SYRTE កងកម្លាំងបះបោរត្រូវវាយរុញច្រានយ៉ាងរប៉ាត់រប៉ាយបំផុត កាលពីថ្ងៃទី២៩ មីនា រហូតដល់ទីក្រុង BEN JAOUAD ចម្ងាយ៤០គីឡូម៉ែត្រកាន់តែឆ្ងាយទៅភាគខាងកើតរួចត្រូវវាយបណ្តេញចេញពីទីនោះទៀត។ ពុំមានការវាយប្រហារណាមួយរបស់កងកម្លាំងចំរុះអន្តរជាតិជួយដល់ពួកបះបោរឡើយក្នុងពេលមានការប្រយុទ្ធគ្នាជាច្រើនម៉ោងនៅ BEN JAOUAD ។
ទីក្រុង SYRTE ជាទីក្រុងមួយមានប្រជាជន១០០.០០០នាក់គ្រប់គ្រងដោយពួកកុលសម្ព័ន្ធរបស់លោកកាដាហ្វី។ ការប្រយុទ្ធគ្នាក្នុងតំបន់មានប្រជាជនច្រើនបែបនេះជាការលំបាកសំរាប់ពួកបះបោរក៏ដូចជាសំរាប់អូតង់។ កិច្ចការពារប្រជាជនស៊ីវិល គឺជាទិសដៅសំខាន់កំណត់ដោយដំណោះស្រាយរបស់ក្រុមប្រឹក្សាសន្តិសុខអ.ស.បដែលអនុញ្ញាតឱ្យប្រើកម្លាំង។
ម្យ៉ាងទៀតកងទ័ពរដ្ឋាភិបាលនាថ្ងៃទី២៩ មីនា បន្តឡោមព័ទ្ធទីក្រុង MISRATA ជាទីក្រុងចុងក្រោយកាន់កាប់ដោយពួកឧទ្ទាមនៅភាគខាងលិចប្រទេស និងជាទីក្រុងធំបំផុតទី៣របស់ប្រទេស។
ចំណែកកងម៉ារីនអាមេរិកប្រកាសថា ខ្លួនបានវាយប្រហារនាវាទាំងឡាយរបស់កងឆ្មាំឆ្នេរសមុទ្រលីប៊ីដែលបាញ់លើបណ្តានាវាដឹកទំនិញក្នុងកំពង់ផែ។
បារាំងត្រៀមផ្តល់ជំនួយយោធាដល់ពួកឧទ្ទាម
ក្រុងប៉ារីសនិយាយថា ត្រៀមពិភាក្សាជាមួយបណ្តាសម្ព័ន្ធមិត្តអំពីជំនួយយោធាឱ្យដល់ពួកឧទ្ទាមលីប៊ីជាលទ្ធភាពមួយគ្រោងផងដែរដោយក្រុងវ៉ាស៊ីនតោន ។ នៅលើទីលានមានការផ្ទុះយ៉ាងខ្លាំង២លើកត្រូវបានស្តាប់ឮកាលពីថ្ងៃទី២៩ មីនា នៅទីក្រុងទ្រីប៉ូលី។
លោក ALAIN JUPPE រដ្ឋមន្ត្រីការបរទេសបារាំងថ្លែងនាថ្ងៃទី២៩ មីនា ថា បារាំងត្រៀមពិភាក្សាជាមួយពួកសម្ព័ន្ធមិត្តអំពីជំនួយយោធាដល់ពួកបះបោរលីប៊ី ក៏ប៉ុន្តែលោកពុំបានបញ្ជាក់ពីប្រភេទនៃជំនួយទាំងនេះឡើយ។
រីឯឯកអគ្គរដ្ឋទូតអាមេរិកប្រចាំអ.ស.ប លោកស្រី ស៊ូសាន រ៉ៃ គូសបញ្ជាក់ថា សហរដ្ឋអាមេរិកពុំបដិសេធឡើយនូវការផ្តល់ជំនួយយោធាដល់ពួកបះបោរលីប៊ីដើម្បីជួយពួកគេក្នុងការផ្តួលរំលំលោកកាដាហ្វី។
ប្រមុខអូតង់ចង់ឱ្យមានដំណោះស្រាយនយោបាយ
អគ្គលេខាធិការអូតង់ លោក ANDERS FOGH RASMUSSEN ដែលពុំអាចព្យាករណ៍បានពីរយៈពេលនៃប្រតិបត្តិការនៅលីប៊ីវាយតម្លៃកាលពីថ្ងៃទី២៩ មីនា ថា ដំណោះស្រាយយោធាតែមួយមុខគត់នឹងពុំអាចដោះស្រាយវិបត្តិលីប៊ីបានឡើយ។ បន្ទាប់ពីសន្និសីទនៅទីក្រុងឡុងដ៏ស្តីពីលីប៊ី លោកបានស្នើដល់គ្រប់ភាគីដែលទាក់ទិនឱ្យស្វែងរកដោយឆាប់រហ័សតាមដែលអាចធ្វើទៅបាននូវដំណោះស្រាយនយោបាយមួយចំពោះជម្លោះ។ លោកបន្តថា ខ្ញុំសង្ឃឹមយ៉ាងច្បាស់ថា យើងនឹងរកឃើញក្នុងពេលឆាប់ៗនូវដំណោះស្រាយនយោបាយមួយនៃបញ្ហានៅលីប៊ី។ ច្បាស់ណាស់ថា ដំណោះស្រាយយោធាមួយមុខគត់នឹងពុំអាចដោះស្រាយបញ្ហាបានឡើយ។
អគ្គលេខាធិការអូតង់បន្តថា យើងទៅកាន់ទីនោះដើម្បីការពារជនស៊ីវិលពីការវាយប្រហារនានា ក៏ប៉ុន្តែដំណើរការនយោបាយគឺចាំបាច់ដើម្បីស្វែងរកដំណោះស្រាយដ៏ស្ថិតស្ថេរមួយ ហើយខ្ញុំស្នើដល់គ្រប់ភាគីដែលទាក់ទិនឱ្យស្វែងរកដំណោះស្រាយនយោបាយបែបនោះឱ្យបានឆាប់រហ័សបំផុត។
លោក RASMUSSEN បានបដិសេធការរិះគន់ទាំងឡាយរបស់ប្រមុខការទូតរុស្ស៊ី លោកស័រហ្គេយ ឡាវរ៉ូវ ដែលនិយាយថា បេសកកម្មរបស់ពួកលោកខាងលិច គឺជាអន្តរាគមន៍ដោយផ្ទាល់ក្នុងសង្គ្រាមស៊ីវិលមួយដែលហួសពីដំណោះស្រាយ១៩៧៣របស់អ.ស.ប។
បណ្តាអ្នកទទួលខុសត្រូវខាងយោធានិយាយថា អូតង់គ្រោងរយៈពេលប្រមាណជា៣ខែសំរាប់ប្រតិបត្តិការនៅលីប៊ី ក៏ប៉ុន្តែអ្វីៗផ្អែកលើសេចក្តីសំរេចចិត្តរបស់អ.ស.ប។
បេសកកម្មនៅលីប៊ីមន្ទីរប៉ង់តាហ្គោនចំណាយប្រាក់៥៥០លានដុល្លារហើយ
បណ្តាអ្នកទទួលខុសត្រូវរបស់មន្ទីរប៉ង់តាហ្គោនឱ្យដឹងថា ប្រតិបត្តិការយោធានៅលីប៊ីរហូតមកទល់ពេលនេះក្រសួងការពារប្រទេសអាមេរិកចំណាយប្រាក់អស់ដល់៥៥០លានដុល្លារហើយ ពិសេសការចំណាយលើគ្រាប់បែក និងមីស៊ីល។ នោះជាតួលេខផ្លូវការលើកដំបូងរបស់អាមេរិកតាំងពីចាប់ផ្តើមធ្វើអន្តរាគមន៍មក។ ទឹកប្រាក់ទាំងនោះប្រមាណ៦០%ចំណាយសំរាប់គ្រាប់រំសេវ។ គិតមកដល់ថ្ងៃទី២៨ មីនា កងទ័ពអាមេរិកបានបាញ់មីស៊ីល TOMA-HAWK ចំនួន១៩២គ្រាប់ ដែលគិតជាទឹកប្រាក់ប្រមាណពី១លានទៅ១,៥លានដុល្លារក្នុងមួយគ្រាប់។ យន្តហោះចម្បាំងអាមេរិកចេញធ្វើប្រតិបត្តិការ៩៨៣លើក ក្នុងនោះ៣៧០លើកបំពេញបេសកកម្មទម្លាក់គ្រាប់បែក ហើយការហោះហើរឯទៀត គឺដើម្បីសង្កេតការណ៍ ឬផ្គត់ផ្គង់ខាងភស្តុភារ ៕
ចែករំលែកព័តមាននេះ