បាតុករជាច្រើនពាន់នាក់បាននាំគ្នាហែក្បួនជាថ្មីកាលពីថ្ងៃទី១ មីនា នៅតាមដងវិថីទាំងឡាយនៃរាជធានីម៉ាណាម៉ា ដោយអះអាងពីឯកភាពជាតិរបស់ព្រះរាជាណាចក្រដ៏តូចនេះ ដែលមានសហគមន៍ស៊ុននីត និងសហគមន៍ស៊ីអ៊ីត។ ចាប់តាំងពីថ្ងៃទី១៤ កុម្ភៈ មក មានបាតុកម្មតវ៉ាឱ្យមានការផ្លាស់ប្តូរនយោបាយក្នុងប្រទេសនេះ ដែលមានពួកស៊ីអ៊ីតភាគច្រើន តែដឹកនាំដោយរជ្ជកាលស៊ុននីត ។ ពួកប្រឆាំងគ្របដណ្តប់ ដោយពួកស៊ីអ៊ីត រហូតមកដល់ពេលនេះ បដិសេធការចរចាជាតិមួយស្នើឡើងដោយព្រះមហាក្សត្រហាម៉ាដ បេនអ៊ីសា អាល់ខាលីហ្វា ដោយស្នើលក្ខខណ្ឌការលាលែងរបស់រដ្ឋាភិបាលទាំងមូល ។ ពួកបាតុករបានបោះជំរំតវ៉ាចាប់តាំងពីច្រើនថ្ងៃមកហើយ នៅទីលាន PERLE ភាគកណ្តាលរាជធានីម៉ាណាម៉ា ហើយបង្កើនការទាមទារកាន់តែច្រើនទៀត រួចចង់ឱ្យមានការដួលរលំនៃរជ្ជកាលស្តេចអាល់ខាលីហ្វាផង ។ រជ្ជកាលស៊ុននីតនេះគ្រប់គ្រងប្រទេសចាប់តាំងពីជាង២០០ឆ្នាំមកហើយ ។ បារ៉ែនមានប្រជាជនត្រឹមតែ១.២លាននាក់ ក្នុងនោះពាក់កណ្តាលជាជនបរទេស ។ ប្រជាជនដើមម្ចាស់ស្រុកភាគច្រើនជាពួកស៊ីអ៊ីត ។ មេដឹកនាំនិយមតឹងមួយរូបរបស់ក្រុមប្រឆាំងស៊ីអ៊ីត លោកអាប់ដែលចាលីល អាល់ស៊ីនហ្គាស បានព្រមានកាលពីថ្ងៃទី១ មីនា ថា ឈាមអាចហូរជាថ្មី ប្រសិនបើរបបបច្ចុប្បន្នធ្វើមិនដឹងមិនឮចំពោះការទាមទារទាំងឡាយរបស់ប្រជាជន ៕
ចែករំលែកព័តមាននេះ