រាជធានីភ្នំពេញ ៖ គេហទំព័រហ្វេសប៊ុករបស់កងរាជអាវុធហត្ថរាជធានីភ្នំពេញ បានបង្ហោះជាផ្លូវការថា កាលពីរសៀលថ្ងៃទី១៣ កញ្ញា ថា សមត្ថកិច្ចអាវុធហត្ថរាជធានីភ្នំពេញ បានបញ្ជូនជនសង្ស័យម្នាក់ ពាក់ព័ន្ធករណីឃាតកម្ម កាលពី៥ឆ្នាំមុន ទៅកាន់តុលាការ ដើម្បីធ្វើការផ្តន្ទាទោសតាមច្បាប់ ។
ជនសង្ស័យឈ្មោះ សី ផារ៉ាដា ភេទប្រុស អាយុ៤០ឆ្នាំ ជាជនសង្ស័យជាប់ ពាក់ព័ន្ធក្នុងអំពើឃាតកម្មរឹតកសម្លាប់ជនរងគ្រោះម្នាក់ជាមិត្តភក្តិស្គាល់គ្នា រួចយកសាកសព ទៅបោះចោលនៅក្នុងគំនរសំរាមក្បែរប្រឡាយទឹកមួយកន្លែង ដើម្បីប្លន់យកទ្រព្យសម្បត្តិ រួមមានរថយន្ដកាមេរី១គ្រឿង ទូរស័ព្ទម៉ាកអាយហ្វូនស៊ិចផ្លើស និងណូគា២គ្រឿង ខ្សែក ខ្សែដៃ និងចិញ្ចៀនពេជ្រ១ឈុត ដែលអំពើឃាតកម្មនេះបានកើតឡើងកាលពី៥ ឆ្នាំកន្លងទៅ ។
សូមរំលឹកថា កាលពីថ្ងៃទី២៣ ឧសភា ឆ្នាំ២០១៥ (៥ឆ្នាំមុន) មានសពជនរងគ្រោះម្នាក់ ត្រូវបានគេប្រទះឃើញនៅក្នុងគំនរ សំរាមក្បែរប្រឡាយទឹកមួយកន្លែង តាមបណ្ដោយផ្លូវលេខ៣៧១ ក្នុងភូមិអូរបែកក្អម សង្កាត់ទឹកថ្លា ខណ្ឌសែនសុខ រាជធានីភ្នំពេញ ដោយពុំមានអ្នកស្គាល់អត្តសញ្ញាណ ជនរងគ្រោះទេ ព្រោះតែសាកសពមានសភាពហើមប្រែប្រួលខុសពីរូបភាពដើម តែអាចបញ្ជាក់បានថា ជាអំពើឃាតកម្ម ។
ក្រោយកើតមានករណីនោះឡើង តាមរយៈវិធានការជំនាញរបស់កម្លាំងកងរាជ អាវុធ ហត្ថរាជធានីភ្នំពេញ ទើបកំណត់អត្តសញ្ញាណជនរងគ្រោះបានថា មានឈ្មោះ ស្រ៊ុន សុភក្ដិ អាយុ៣៥ឆ្នាំ ទីលំនៅ ភូមិព្រែកតានូ សង្កាត់ចាក់អង្រែលើ ខណ្ឌមានជ័យ ។
បន្ទាប់មក សមត្ថកិច្ចកងរាជអាវុធហត្ថរាជធានីភ្នំពេញ ក៏បានឃាត់ខ្លួនជនដៃដល់ម្នាក់ឈ្មោះ សោម គឹមស៊ាន និងបានបញ្ជូនទៅតុលាការផ្តន្ទាទោសតាមច្បាប់ផងដែរ ។
ចំណែកឈ្មោះ សី ផារ៉ាដា នេះ ក្រោយពីដឹងថា បក្សពួករបស់ខ្លួនត្រូវបានកម្លាំងកងរាជអាវុធហត្ថរាជធានីភ្នំពេញចាប់ខ្លួនហើយនោះ គេក៏គេចខ្លួនបាត់រហូតតែម្តងទៅ ។ ទោះជាយ៉ាងនេះក្តី សមត្ថកិច្ចមិនដែលបោះបង់ការតាមប្រម៉ាញ់ជនជាឃាតករទេ គ្រាន់តែវិធានការតាមប្រមាញ់របស់សមត្ថកិច្ច មិនអាចត្រូវបានយកមកផ្សព្វផ្សាយឬអួតបង្ហាញតាមបណ្ដាញសង្គមហ្វេសប៊ុកបានឡើយ ជាក់ស្តែង ជនសង្ស័យដែលគេចខ្លួនអស់រយៈពេល៥ឆ្នាំខាងលើនេះ ត្រូវបានអាវុធហត្ថភ្នំពេញស្រាវជ្រាវដឹងថា សំងំលាក់ខ្លួននៅខេត្តតាកែវ ទើបកម្លាំងការិយាល័យជំនាញ ចុះទៅសហការជាមួយកម្លាំងកងរាជអាវុធហត្ថខេត្តតាកែវ ចាប់ជនសង្ស័យបានយ៉ាងស្ងៀមស្ងាត់បំផុត ។
ហេតុដូច្នេះហើយ ទើបសមត្ថកិច្ចកងរាជអាវុធហត្ថភ្នំពេញ សុំអំពាវនាវដល់មហាជន សូមមេត្តា កុំវាយស្មៅបង្អើលពស់ កុំគោះទឹកបង្អើលត្រី តាមរយៈការតាំងខ្លួនជាអ្នកឈឺឆ្អាលជួសគ្រួសារជនរងគ្រោះ បង្ហោះសារសួររកឃាតករតាមអារម្មណ៍ផ្ទាល់ខ្លួន និងប្រមាថដល់សមត្ថកិច្ចដែលមិនទាន់អាចស្វែងរកឃាតករឃើញ ដែលប្រការនេះ គឺជាការពញ្ញាក់ស្មារតីជនល្មើស ឲ្យរឹតតែប្រុងប្រយ័ត្ន រឹតតែពួនកាន់តែស្ងាត់ និងរឹតតែរត់គេ ចកាន់តែឆ្ងាយ ប៉ះពាល់ដល់ចំណាត់ការរបស់សមត្ថកិច្ចទៅវិញទេ ។
ពោលគឺ៥ឆ្នាំ មិនទាន់ហួសពេលទេ ព្រលឹងជនរងគ្រោះនៅតែអន្ទង(PM)ឲ្យតាមចាប់ខ្លួនជនជាឃាតករ សម្លាប់ជនរងគ្រោះច្រកបាវ ឲ្យបានមុនបុណ្យភ្ជុំបិណ្ឌនេះ មិនខុសពាក្យថា (កុកអាចភ្លេចជុង តែជុងមិនដែលភ្លេចកុក) ហើយអាជ្ញាយុកាលនៃបទល្មើសឧក្រិដ្ឋ មានរយៈពេល១៥ឆ្នាំ បើដរាបណាមិនទាន់ផុតអាជ្ញាយុកាល ទេ កុំទាន់ចាត់ទុកថា ជនល្មើសបានរួចខ្លួន ដូច្នេះបើបងប្អូន បានដឹងដំណឹងជនល្មើស សូមចូលរួមសហការណ៍ផ្តល់ព័ត៌មានដល់សមត្ថកិច្ច ដើម្បីអនុវត្តច្បាប់ដោយមិនលើក
លែង ៕
ចែករំលែកព័តមាននេះ