ខេត្តស្វាយរៀង ៖ ជ្រូករស់ពីប្រទេសថៃ ត្រូវបានឈ្មួញដឹកឆ្លងដែនចូលទៅប្រទេសវៀតណាម ខណៈដែលអាជ្ញាធរមិនអនុញ្ញាតឲ្យធ្វើចរាចរណ៍ទំនិញគ្រប់ប្រភេទតាមច្រករបៀង និងច្រកតំបន់ ក៏ប៉ុន្តែក្រុមឈ្មួញនៅតែផ្គើននាំជ្រូករស់ចេញតាមច្រករបៀងកំពង់ស្ពាន ក្នុងភូមិបាវិតកណ្តាល សង្កាត់បាវិត ក្រុងបាវិត…
ខេត្តស្វាយរៀង ៖ ជ្រូករស់ពីប្រទេសថៃ ត្រូវបានឈ្មួញដឹកឆ្លងដែនចូលទៅប្រទេសវៀតណាម ខណៈដែលអាជ្ញាធរមិនអនុញ្ញាតឲ្យធ្វើចរាចរណ៍ទំនិញគ្រប់ប្រភេទតាមច្រករបៀង និងច្រកតំបន់ ក៏ប៉ុន្តែក្រុមឈ្មួញនៅតែផ្គើននាំជ្រូករស់ចេញតាមច្រករបៀងកំពង់ស្ពាន ក្នុងភូមិបាវិតកណ្តាល សង្កាត់បាវិត ក្រុងបាវិត កាលពីរសៀលថ្ងៃទី១១ ខែកញ្ញា ឆ្នាំ២០២០ ។
លោក សាយ ពន្លឺមេត្តា អនុប្រធានការិយាល័យផលិតកម្មនិងបសុព្យាបាល នៃមន្ទីរកសិកម្មរុក្ខាប្រមាញ់ និងនេសាទខេត្ត បានឲ្យដឹងថា ជ្រូករស់ចំនួន៦០០ក្បាលដឹកតាមរថយន្តយីឌុប២គ្រឿងឆ្លងដែនទៅប្រទេសវៀតណាមតាមច្រករបៀងកំពង់ស្ពាន គឺជ្រូករបស់ក្រុមហ៊ុន លឹម ស៊ីវម៉ី មានច្បាប់អនុញ្ញាតនាំជ្រូករស់ពីប្រទេសថៃ ឆ្លងកាត់កម្ពុជាទៅប្រទេសវៀតណាមក្នុងមួយថ្ងៃ៦០០ក្បាលទៅ១.២០០ក្បាល ។
នៅថ្ងៃទី១១ ខែកញ្ញា ជ្រូករស់ត្រូវបានដឹកតាមច្រករបៀងកំពង់ស្ពានចំនួន៦០០ក្បាលតាមរថយន្ត២គ្រឿង ដែល១គ្រឿងពាក់ផ្លាកលេខ៣E-៣៧១២ ដឹកចំនួន៣០០ក្បាល និង១គ្រឿងទៀតពាក់ផ្លាកលេខ ៣A-៥១៥៨ ចំនួន៣០០ក្បាល និងដឹកចេញតាមច្រកទ្វារព្រំដែនអន្តរជាតិព្រៃវល្លិ ឃុំថ្មី ស្រុកកំពង់រោទ៍៦០០ក្បាល ។ ជាមួយនេះ ក៏មានក្រុមហ៊ុនជីធីហ្វោនដេសិន នាំជ្រូករស់ចេញតាមច្រកទ្វារព្រំដែនអន្តរជាតិព្រៃវល្លិចំនួន៦០០ក្បាលដែរ ។
ទាក់ទិននឹងករណីនេះ មានខាងក្រុមហ៊ុននាំជ្រូកពីប្រទេសថៃទៅប្រទេសវៀតណាមម្នាក់សុំមិនបញ្ចេញឈ្មោះ បង្ហើបឲ្យដឹងថា ក្រុមហ៊ុននាំជ្រូកពីប្រទេសថៃទៅប្រទេសវៀតណាម មានច្រើនក្រុមហ៊ុន ក៏ប៉ុន្តែក្រុមហ៊ុន លឹម ស៊ីវម៉ី កន្លងមកមាននាំជ្រូករស់ពីប្រទេសថៃ ដាក់ចែកចាយតាមឡដ៏សត្តឃាតក្នុងខេត្តស្វាយរៀង កាប់សាច់លក់នៅលើទីផ្សារផងដែរ ។
ករណីនេះ អ្នកយកព័ត៌មានយើងមិនអាចរកការបំភ្លឺពីតំណាងក្រុមហ៊ុន លឹម ស៊ីវម៉ី បានទេ ដោយសារទូរស័ព្ទហៅអត់ចូល ហើយប្រភពដែលផ្តល់ព័ត៌មានឱ្យនេះក៏មិនដឹងថាពិតកម្រិតណាដែរ ។
ប្រភពពីមន្ត្រីពេទ្យសត្វបានឲ្យដឹងទៀតថា មានក្រុមហ៊ុនដានី ដេង នាំជ្រូករស់ពីប្រទេសថៃមកលក់ចែកចាយតាមឡសត្តឃាតនានាទូទាំងខេត្តស្វាយរៀង សម្រាប់កាប់សាច់លក់នៅលើទីផ្សាររាប់រយក្បាលក្នុង១ថ្ងៃៗ ។
អ្វីដែលប្រជាពលរដ្ឋមានការព្រួយបារម្ភនោះ គឺពេលមានជ្រូកឈឺឬងាប់ ឈ្មួញវៀតណាមមិនយកទេហើយឈ្មួញតែងតែលក់ជ្រូកទាំងនោះឲ្យតាមឡសត្តឃាតពន្លះសាច់លក់ចែកចាយនៅលើទីផ្សារនានាក្នុងខេត្តស្វាយរៀង ដែលធ្វើឲ្យប៉ះពាល់ដល់សុខភាពអ្នកបរិភោគយ៉ាងខ្លាំង ។
ទាក់ទិនករណីនេះ ក្រុមកម្មកររបស់ក្រុមហ៊ុនលឹម ស៊ីវម៉ី បានបំភ្លឺថា គ្មានជ្រូកឈឺទេ គឺជ្រូកអន់ដឹកឆ្ងាយត្រូវក្តៅ វៀតណាមគេមិនយកទេ ហើយចំពោះជ្រូកងាប់ក៏មិនមិនមែនងាប់ដោយជំងឺដែរ គឺងាប់ដោយត្រូវក្តៅ ។ បើងាប់ភ្លាមគឺវះសាច់ចែកកម្មករធ្វើម្ហូប បើងាប់តាមផ្លូវអន់សាច់គឺដុតចោល បើជ្រូកអន់គឺលក់ឲ្យឡកាប់សាច់ ៕
ចែករំលែកព័តមាននេះ