ប្រទេសក្រិក-តួកគី ៖ នាយករដ្ឋមន្ត្រីក្រិកប្រកាសនាថ្ងៃទី១២ ខែកញ្ញាថា ក្រិកនឹងទិញយន្តហោះប្រយុទ្ធធុនRAFALEចំនួន១៨គ្រឿង ពីក្រុមហ៊ុនយន្តហោះ DASSAULT ក្នុងពេលមានភាពតានតឹងខ្លាំងជាមួយតួកគី។
នាយករដ្ឋមន្ត្រីរូបនោះលោកKYRIAKOS MITSOTAKIS គូសបញ្ជាក់ថា ពេលវេលាមកដល់ហើយ ដែលកងទ័ពត្រូវមានមធ្យោបាយថែមទៀត។ លោកក៏ប្រកាសដែរពីការបញ្ជាទិញនាវាពិឃាតថ្មី៤គ្រឿងនិងរើសទាហានបន្ថែម១៥.០០០នាក់។
ភាពតានតឹងរវាងក្រុងអាថែននិងក្រុងអង់ការ៉ា មានភាពធ្ងន់ធ្ងរចាប់តាំងពីការបើកធ្វើកាលពីខែសីហា នូវយុទ្ធនាការមួយរបស់តួកគី រុករកឧស្ន័នក្នុងតំបន់មានការប្រទែងប្រទង់គ្នា ក្នុងសមុទ្រ មេឌីទែរ៉ាណេខាងកើតដែលសម្បូរដោយប្រេងកាតនិងឧស្ម័ន។ ប្រទេសក្រិក បារាំងនិងអ៊ីតាលីនាពេលថ្មីៗនេះបានធ្វើសមយុទ្ធយោធារួម មួយក្នុងតំបន់នោះ។
ប្រធានាធិបតីតួកគីលោករីស៊ីបតៃយ៉ីបអ័រដូហ្គាន កាលពីថ្ងៃទី១២កញ្ញា បានព្រមានដល់សមភាគីបារាំង លោកអេមម៉ានុយអែលម៉ាក្រុងថា កុំចង់ឈ្លោះជាមួយតួកគី ខណៈភាពតានតឹងបានកើនខ្ពស់រវាងប្រទេសទាំង២ ចំពោះសភាពការណ៍នៅសមុទ្រមេឌីទែរ៉ាណេខាងកើត។ ក្នុងសុន្ទរកថាតាមទូរទស្សន៍មួយនៅក្រុងអ៊ីស្តង់ប៊ុល ប្រធានាធិបតីតួកគីថ្លែងថា កុំចង់ឈ្លោះជាមួយប្រជាជនតួកគីនិងប្រទេសរបស់យើង។
លោកម៉ាក្រុងនិងមេដឹកនាំប្រទេស៦ទៀតក្នុងសហភាពអឺរ៉ុប មុននេះបានស្នើដល់តួកគីឲ្យបញ្ឈប់នយោបាយប្រឈមមុខដាក់គ្នានៅមេឌីទែរ៉ាណេខាងកើត ហើយបានគំរាមពីការដាក់ទណ្ឌកម្ម ប្រសិនបើតួកគីបន្តទាមទារសទ្ធិ្ធរុករកឧស្ម័នរបស់ក្រិកនិងសីុប៕ ដកស្រង់ចេញពីវេបសាយ ៖ challenges
ចែករំលែកព័តមាននេះ