រាជធានីភ្នំពេញ ៖ ទីតាំងស្តុក និងផលិតឡេក្លែងក្លាយមួយកន្លែង ត្រូវបានកម្លាំងនគរបាលការិយាល័យប្រឆាំងផលិតផលក្លែងក្លាយ នៃស្នងការដ្ឋាននគរបាលរាជធានីភ្នំពេញ ធ្វើការស្រាវជ្រាវរកឃើញ បន្ទាប់មកបានសហការជាមួយកម្លាំងនគរបាលខណ្ឌដង្កោ ចុះទៅបង្ក្រាប ដោយឃាត់ខ្លួនអ្នកបម្រើការងារនៅក្នុងនោះចំនួន៤នាក់…
រាជធានីភ្នំពេញ ៖ ទីតាំងស្តុក និងផលិតឡេក្លែងក្លាយមួយកន្លែង ត្រូវបានកម្លាំងនគរបាលការិយាល័យប្រឆាំងផលិតផលក្លែងក្លាយ នៃស្នងការដ្ឋាននគរបាលរាជធានីភ្នំពេញ ធ្វើការស្រាវជ្រាវរកឃើញ បន្ទាប់មកបានសហការជាមួយកម្លាំងនគរបាលខណ្ឌដង្កោ ចុះទៅបង្ក្រាប ដោយឃាត់ខ្លួនអ្នកបម្រើការងារនៅក្នុងនោះចំនួន៤នាក់ ដើម្បីនាំទៅធ្វើការសាកសួរ ចំណែកឯម្ចាស់ទីតាំង រត់គេចខ្លួនបាត់ស្រមោលមុនពេលដែលកម្លាំងនគរបាលចុះទៅដល់ ។
ប្រតិបត្តិការនេះបានធ្វើឡើងកាលពីម៉ោង១០និង៤០នាទីព្រឹក ថ្ងៃទី១២ ខែកញ្ញា ឆ្នាំ២០២០ ក្រោមការដឹកនាំដោយលោកឧត្តមសេនីយ៍ទោ ពិត បញ្ញា ស្នងការរងទទួលផែនប្រឆាំងផលិតផលក្លែងក្លាយ និងមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញ។
ទីតាំងផលិតឡេក្លែងក្លាយនោះ ស្ថិតនៅតាមបណ្ដោយផ្លូវលេខ២១៧ ហៅផ្លូវចំការដូង ត្រង់ចំណុចមុខវិទ្យាល័យទួលអំពិល ក្នុងភូមិបុរីកម្មករ សង្កាត់ជើងឯក ខណ្ឌដង្កោ រាជធានីភ្នំពេញ។
តាមប្រភពព័ត៌មានបានឲ្យដឹងថា ម្ចាស់ទីតាំងផលិតឡេក្លែងក្លាយខាងលើនេះ ជាជនជាតិចិនឈ្មោះវឹង ជីហេង ចំណែកមនុស្ស៤នាក់ដែលត្រូវឃាត់ខ្លួននោះជាបុរស មិនទាន់ត្រូវបានស្គាល់អត្តសញ្ញាណនៅឡើយទេ ហើយត្រូវសមត្ថកិច្ចនាំយកទៅសាកសួរនៅការិយាល័យប្រឆាំងផលិតផលក្លែងក្លាយនៃស្នងការដ្ឋាននគរបាលរាជធានីភ្នំពេញ ដើម្បីកសាងសំណុំរឿងចាត់ការតាមច្បាប់។
ក្រៅពីការឃាត់ខ្លួនមនុស្សទាំង៤នាក់ខាងលើនោះ កម្លាំងនគរបាលបានរឹបអូសយកឡេក្លែងក្លាយ និងគ្រឿងផ្សំរាប់តោន ព្រមទាំងម៉ាស៊ីនសម្រាប់ផលិតឡេជាច្រើនគ្រឿងទៀតផងដែរ ប៉ុន្តែត្រូវបានបិទទ្វារចាក់សោររក្សាទុកបណ្ដោះអាសន្ននៅទីតាំងខាងលើសិន។
នគរបាលបាននិយាយថា ទីតាំងផលិតឡេក្លែងក្លាយដ៏ធំមួយនេះ គឺបានដំណើរការមួយរយៈពេលមកហើយ ដែលអ្នកផលិតឡេក្លែងក្លាយនេះគឺជាជនជាតិចិន ហើយមុននឹងឈានដល់ការចុះបង្ក្រាប កម្លាំងបានធ្វើការស្រាវជ្រាវច្រើនថ្ងៃទំរាំរកឃើញ។
បន្ទាប់មកក្រោមការដឹកនាំដោយលោកឧត្តមសេនីយ៍ទោ ពិត បញ្ញា ស្នងការរងទទួលផែនប្រឆាំងផលិតផលក្លែងក្លាយ និងមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញផង កម្លាំងបានសហការជាមួយសមត្ថកិច្ចមូលដ្ឋានចុះទៅធ្វើការបង្ក្រាបជាក់ស្ដែងតែម្ដង។
ប្រភពដដែលបានបន្តទៀតថា តែគួរឲ្យស្ដាយដែលម្ចាស់ ទីតាំងជនជាតិចិនខាងលើទំនងជាដឹងខ្លួនមុន ឬយ៉ាងណាទេ? បានរត់គេចខ្លួនបាត់មុនពេលដែលកម្លាំងចុះទៅដល់ ហើយនៅក្នុងទីតាំងនោះមានឡេក្លែងក្លាយដែលផលិតរួច និងម្សៅគ្រឿងផ្សំផ្សេងៗរាប់តោន ព្រមទាំងម៉ាស៊ីនសម្រាប់ផលិតឡេជាច្រើនគ្រឿងទៀតផងដែរ។
ផលិតផលនេះ និងអាចបង្កឲ្យមានការប៉ះពាល់ដល់សុខភាពអ្នកប្រើប្រាស់ទូទៅ ហើយនេះគឺជាសកម្មភាពល្មើសច្បាប់ ហើយពេលនេះកម្លាំងកំពុងតែធ្វើការស្រាវជ្រាវ ដើម្បីស្វែងរកចាប់ខ្លួនមេខ្លោងដែលជាម្ចាស់ទីតាំងយកមកផ្ដន្ទាទោសតាមច្បាប់៕
ចែករំលែកព័តមាននេះ