ការប្រាព្ធពិធីបុណ្យភ្ជុំបិណ្ឌរបស់ប្រជាជនខ្មែរដែលរស់នៅអាមេរិកនៅក្នុងឆ្នាំនេះ គឺមានសភាពស្ងាត់ជាងបណ្តាលឆ្នាំមុនៗ ដោយសារការភ័យខ្លាចនៃការរីករាលដាលនៃជំងឺកូវីដ១៩។ យ៉ាងណា ពុទ្ធបរិស័ទខ្មែរនៅទីនោះមួយចំនួនតូចក៏នៅតែឆ្លៀតយកចង្អាន់ទៅប្រគេនព្រះសង្ឃនៅតាមទីវត្តអារាម ក្នុងរដូវកាន់បិណ្ឌនាពេលនេះដដែល ប៉ុន្តែការប្រារព្ធពិធីឱ្យមានភាពអធឹកធមនោះមិនមានឡើយ។
តារាភាពយន្តជើងចាស់ និងបច្ចុប្បន្នជាទីប្រឹក្សាក្រសួងវប្បធម៌ប្រចាំរដ្ឋកាលីហ្វញ៉ាសហរដ្ឋអាមេរិកលោក យស បូវណ្ណៈ បានអះអាងប្រាប់កោះសន្តិភាពតាមសារអេឡិចត្រូនិចថា ការរៀបចំពិធីបុណ្យភ្ជុំបិណ្ឌរបស់បងប្អូនខ្មែរយើងដែលរស់នៅអាមេរិកនាឆ្នាំនេះ គឺមានសភាពស្ងប់ស្ងាត់ជាងបណ្តាឆ្នាំកន្លងទៅ ដោយសារការភ័យខ្លាចនៃជំងឺកូវីដ១៩។
លោកបញ្ជាក់ថា បងប្អូនខ្មែរយើងតិចណាស់បាននាំគ្នាទៅវត្តយកចង្ហាន់ទៅប្រគេនព្រះសង្ឃ ព្រោះម្នាក់ៗបារម្ភពីការឆ្លងនៃជំងឺមួយនេះ ខណៈពេលដែលរដ្ឋដែលលោកកំពុងរស់នៅនេះ គឺនៅមានការរឹតបណ្តឹងនៃការជួបជុំគ្នានៅឡើយ។
លោកថា ខ្មែរយើងនៅទីនេះ គឺបានត្រឹមតែយកចង្ហាន់ប្រគេនព្រះសង្ឃមួយភ្លែតប៉ុណ្ណោះ ដោយមិនបាននៅយូរស្តាប់លោកទេសនាឡើយ ក្នុងពេលដែលការទៅវត្តនោះ គឺបានតែម្នាក់ប៉ុណ្ណោះ។
ទោះជាយ៉ាងណា បើតាមលោក យស បូវណ្ណៈ ថា ប្រជាជនខ្លះគាត់ស័គ្រចិត្តជួយធ្វើម្ហូបអាហារ រួចដឹកយកទៅវត្តប្រគេនព្រះសង្ឃ ដោយសារខ្លាចដាច់ចង្ហាន់ព្រះសង្ឃដល់គង់ចាំព្រះវស្សានៅទីវត្តអារាម។
លោក យស បូវណ្ណៈ បានអោយដឹងទៀតថា ទាំងក្រុមគ្រួសារលោក និងបងប្អូនខ្មែរជាច្រើនទៀត ដែលរស់នៅទីនេះ គឺមិនទាន់បានទៅធ្វើបុណ្យនៅវត្តនាឱកាសពិធីបុណ្យភ្ជុំបិណ្ឌនៅឡើយទេ ដោយសារការភ័យខ្លាច និងការគោរពច្បាប់នៃការហាមប្រាមរបស់អាជ្ញាធរនៅទីនេះ ពាក់ព័ន្ធនឹងការទបស្កាត់ជំងឺកូវីដ១៩។ យ៉ាងណាលោកនឹងក្រុមគ្រួសារក៏បានឆ្លៀតទៅវត្តនៅមុនពិធីកាន់បិណ្ឌ និងភ្ជុំបិណ្ឌចូលមកដល់ផងដែរ។ លោកថា មិនមែនវត្តខ្មែរតែមួយនោះទេ ដែលត្រូវបានបិទ សូម្បីវិហារសាសនាគ្រឹះ សាសនាអ៊ិស្លាម និងទីកន្លែងប្រារព្ធពិធីសាសនាទាំងអស់ក៏ត្រូវបានបិទដូចគ្នា។
ដោយឡែកសម្រាប់ការវេចនំអន្សមតាមប្រពៃណីខ្មែរនាខែភ្ជុំបិណ្ឌសម្រាប់ខ្មែរនៅអាមេរិកនោះត្រូវបានលោក យស បូវណ្ណៈ លើកឡើងថា ជាទូទៅបងប្អូនយើងមិនសូវនិយមវេចនំតាមផ្ទះនោះឡើយ គឺពួកគេច្រើនទៅទិញនៅឯផ្សារទំនើប ដើម្បីយកទៅប្រគេនព្រះសង្ឃនិងញ៉ាំជាលក្ខណៈគ្រួសារ។
លោកបញ្ជាក់ថា បច្ចុប្បន្នក្មេងៗជំនាន់ក្រោយនៅទីនេះ គឺមិនសូវយល់ពីការវេចនំអន្សមខ្មែរយើងនោះឡើយ ហើយអ្នកដែលវេចនោះភាគច្រើនៗជាចាស់សល់ពីមុនមកប៉ុណ្ណោះ។
យ៉ាងណា បើតាមលោក យស បូវណ្ណៈ ឆ្នាំនេះបងប្អូនខ្មែរនៅអាមេរិក គឺមិនបានប្រារព្ធពិធីបុណ្យភ្ជុំបិណ្ឌអោយបានអធឹកអធមដូចបងប្អូនខ្មែរនៅស្រុកកំណើតនោះឡើយ ដោយសាររាជរដ្ឋាភិបាលខ្មែរយើងបានទប់ស្កាត់ជំងឺកូវីដបានយ៉ាងណាល្អ នឹងបានបើកទូលាយច្រើនសម្រាប់អោយប្រជាជនយើងមានឱកាសបានប្រារព្ធពិធីបុណ្យភ្ជុំបិណ្ឌដែលជាប្រពៃណីដូនតាយើងតាំងពីបរមបុរាណកាលមក៕
ចែករំលែកព័តមាននេះ