តាមប្រភពព័ត៌មានពីសេតវិមាន រដ្ឋធានីវ៉ាស៊ីនតោន បានឲ្យដឹងថា ស្ដ្រីទី១សហរដ្ឋអាមេរិក ដែលជាភរិយារបស់លោកប្រធានាធិបតី បារាក់ អូបាម៉ា គឺ «លោកស្រី Michelle Obama មីស្ហែល អូប៉ាម៉ា»
តាមប្រភពព័ត៌មានពីសេតវិមាន រដ្ឋធានីវ៉ាស៊ីនតោន បានឲ្យដឹងថា ស្ដ្រីទី១សហរដ្ឋអាមេរិក ដែលជាភរិយារបស់លោកប្រធានាធិបតី បារាក់ អូបាម៉ា គឺ «លោកស្រី Michelle Obama មីស្ហែល អូប៉ាម៉ា» នឹងធ្វើដំណើរមកកាន់ប្រទេសកម្ពុជា ដែនដីអាណាចក្រអច្ឆរិយអង្គរ ខេត្ដសៀមរាប ពីថ្ងៃទី២១ ដល់ថ្ងៃទី២២ ខែមីនា ឆ្នាំ២០១៥ ខាងមុខនេះ ។
ក្នុងព្រឹត្ដការណ៍នេះ មជ្ឈដ្ឋានសាធារណៈជាតិ និងអន្ដរជាតិ បាននាំគ្នាចោទសួរថា ហេតុអ្វីបានជាលោកស្រី មីស្ហែល អូបាម៉ា សម្រេចចិត្តធ្វើដំណើរមកកម្ពុជា ?
បើយោងតាមសេចក្ដីរាយការណ៍ពីប្រភពដដែល បានឲ្យដឹងថា លោកស្រី មីស្ហែល អូបាម៉ា មានគោលបំណងចម្បង គឺដើម្បីបានផ្សព្វផ្សាយពីកម្មវិធី «Let Girls Learn initiative» (យើងនាំគ្នាឲ្យយុវនារីរៀនសូត្រ) ជាកម្មវិធីមួយ ដែលស្វាមីរបស់លោកស្រី និងលោកស្រី ទើបតែបង្កើតថ្មីៗនេះ ។
ក្នុងបរិការណ៍នេះ គេនៅចាំបានថា កាលពីខែវិច្ឆិកា ឆ្នាំ២០១២ កន្លងទៅ ខណៈដែលប្រមុខរាជរដ្ឋាភិបាលកម្ពុជា ធ្វើជាប្រធានសមាគមប្រជាជាតិអាស៊ាន លោកប្រធានាធិបតី បារាក់ អូប៉ាម៉ា ក៏បានធ្វើដំណើរទាំងស្ទាក់ស្ទើរ តែ «ជាផ្លូវការ» មកកាន់កម្ពុជា ដើម្បីចូលរួមក្នុងកិច្ចប្រជុំកំពូល«អាស៊ាន-សហរដ្ឋអាមេរិក» និងកិច្ចប្រជុំកំពូលផ្សេងៗទៀត ។
កាលណោះ មានអង្គការឃ្លាំមើលសិទ្ធិមនុស្ស អង្គការក្រៅរដ្ឋាភិបាល និងក្រុមប្រឆាំងមួយចំនួន បានធ្វើព្យុះផ្គរយ៉ាងខ្លាំង រារាំងមិនឱ្យលោក អូបាម៉ា មកកម្ពុជា ដែលជាហេតុធ្វើឲ្យលោក អូបាម៉ា មានភាពចង្អៀតចង្អល់ចិត្ដ ព្រោះសហរដ្ឋអាមេរិកធ្លាប់បានថ្កោលទោសកម្ពុជា ពីរឿងសិទ្ធិមនុស្ស បញ្ហាដីធ្លី ។ល។
ប៉ុន្ដែអ្វីដែលធ្វើឲ្យគេចាប់អារម្មណ៍នោះ គឺនៅពេល លោក អូបាម៉ា បានមកដល់កម្ពុជា បន្ទាប់ពីលោកបានជួបសម្តេចនាយករដ្ឋមន្ដ្រី ហ៊ុន សែន ពេលបានពិនិត្យមើលឃើញនូវសភាពការណ៍ពិតនៅកម្ពុជា ទំនងជាលោកមានអារម្មណ៍ថា គ្មានអ្វីដែលជាសភាពការណ៍ធ្ងន់ធ្ងរ ដែលផ្ទុយពីរបាយការណ៍ផ្សព្វផ្សាយ បែបមានបំណងផ្លុំត្រចៀកលោកនោះសោះ ។
តើហេតុអ្វី ? ព្រោះក្រោយពីពេល លោក អូប៉ាម៉ា វិលត្រទ្បប់ទៅវិញ ដែលមានរយៈពេលជាង២ឆ្នាំហើយ គេមើលឃើញសហរដ្ឋអាមេរិក បន្តចំណងមិត្ដភាពជាមួយកម្ពុជា កាន់តែរឹងមាំថែមទៀត ។ រីឯសភាពការណ៍នយោបាយ សេដ្ឋកិច្ច សន្ដិភាព និងសុវត្ថិភាព នៅកម្ពុជា ក៏កាន់តែរីកស្រស់បំព្រង ។
ក្នុងន័យនេះហើយ ដែលយើងយល់ថា ស្ដ្រីទី១អាមេរិកាំង ដែលបានធ្វើការសម្រេចចិត្ដយ៉ាងត្រឹមត្រូវ ធ្វើដំណើរមកកាន់កម្ពុជា ដែលជាប្រទេសទី១ ក្នុងចំណោមប្រទេសទាំង១១ក្នុងពិភពលោក ដើម្បីប្រកាសកម្មវិធីរបស់លោកស្រី យ៉ាងសាមញ្ញ ។
បើគេពិនិត្យមើលពីព្រឹតិ្ដការណ៍ប្រវត្ដិសាស្ដ្រ និងនយោបាយ នៃកិច្ចសហប្រតិបត្ដិការ រវាងប្រទេសទាំងពីរ ចាប់តាំងពីពេលការធ្វើដំណើរមកកម្ពុជា របស់អតីតស្ដ្រីទី១អាមេរិក គឺលោកស្រី ចាកឺលីន កេណ្ណឺឌី (Jacqueline Kennedy) មកកម្ពុជា នាឆ្នាំ១៩៦៧ នោះ គឺមានរយៈពេលប្រមាណ៥០ឆ្នាំហើយ រីឯដែលឆ្នាំ២០១៥នេះ ជាលើកទី២ ដែលស្ដ្រីទី១សហរដ្ឋអាមេរិក មីស្ហែល អូបាម៉ា បានធ្វើដំណើរមកកាន់ប្រទេសកម្ពុជា ជាថ្មីម្តងទៀត ។
ក្នុងករណីនេះ គេមិនពិបាកយល់ទេថា កាលដែល លោកស្រី Kennedy អញ្ជើញមកកម្ពុជា នាពេលនោះ គឺដោយសារមាន សម្ដេចឪ (ព្រះករុណាព្រះបរមរតនកោដ្ឋ) ជាព្រះអគ្គមគ្គុទេ្ទសក៍ ក៏ព្រោះតែព្រះរាជាណាចក្រកម្ពុជាត្រូវបានគេទទួលស្គាល់ថា ជា «កោះសន្ដិភាព» ។
ជាអកុសល នៅទសវត្សឆ្នាំ៧០ ឆ្នាំ៨០ និងឆ្នាំ៩០ កម្ពុជាបានឆ្លងកាត់នូវព្យុះសង្ឃរា ប្រៀបដូចនឹងនាវាតូចមួយ ត្រូវឆ្លងកាត់មហាសាគរយ៉ាងដូច្នោះដែរ ។ ភាពអសន្ដិសុខ សង្គ្រាមកាប់សម្លាប់គ្នា រវាងប្រទេសជិតខាង រវាងខ្មែរនឹងខ្មែរគ្នាឯង បានធ្វើឲ្យពិភពលោកខ្លាចក្រែងរអែង មិនហ៊ានធ្វើដំណើរមកកាន់ប្រទេសកម្ពុជា ។
ទើបតែជាមហាភ័ព្វសំណាង នាទសវត្សចុងក្រោយនេះ ដែលកម្ពុជាមានសម្តេចតេជោ នាយករដ្ឋមន្ត្រី ហ៊ុន សែន ជាអគ្គមគ្គុទេ្ទសក៍ បានដឹកនាំកម្ពុជា ឲ្យក្លាយជាប្រទេសមួយ គេទទួលស្គាល់មានភាពរុងរឿង មានសន្ដិភាពពេញបរិបូរណ៍ ប្រជាពលរដ្ឋគ្រប់រូបមានមោទនភាពនឹងការរស់នៅយ៉ាងសុខដុម រស់នៅដោយគ្មានការភ័យខ្លាចអ្វីឡើយ ។
ជាសរុប ដំណើរទស្សនកិច្ចរបស់លោកស្រី មីស្ហែល អូបាម៉ា (Michelle Obama) មកកាន់អាណាចក្រអង្គរនាពេលនេះ គឺជាព្រឹត្ដិការណ៍មួយឆ្លុះបញ្ចាំងយ៉ាងប្រត្យក្សថា កម្ពុជាបច្ចុប្បន្នគឺជា «ព្រះរាជាណាចក្រអច្ឆរិយ» ពិតប្រាកដមែន ។ ពិភពលោកបានទទួលស្គាល់នូវកេរមរតករបស់បុព្វបុរសខ្មែរ ដែលមិនអាចកាត់ថ្លៃបាន ដែលបានបន្សល់ទុកមកជារៀងដរាប។
អត្ថបទនេះក៏អាចជាការក្រើនរំឭកដល់ប្រជាជនខ្មែរគ្រប់រូប ទាំងស្រីទាំងប្រុស ទាំងចាស់ទាំងក្មេង ទាំងយុវជនទាំងយុវនារី និងអ្នកនយោបាយ គួរចេះរួបរួមគ្នាលើកកម្ពស់អត្ដសញ្ញាណជាតិ «កម្ពុជាអច្ឆរិយ» តរៀងទៅ ៕
ដោយ រ័ត្ន សណ្តាប់
ចែករំលែកព័តមាននេះ