រាជធានីភ្នំពេញ ៖ នាយកដ្ឋានព័ត៌មានវិទ្យានៃក្រសួងមហាផ្ទៃជាថ្មីម្តងទៀតបានក្រើនរម្លឹក និងបានណែនាំឱ្យបងប្អូនប្រជាពលរដ្ឋខ្មែរ ដែលកំពុងតែសស្រាក់សស្រាំងប្រើប្រាស់បណ្តាញសង្គមយក្សហ្វេសប៊ុក សូមប្រុងប្រយ័ត្នល្បិចបោកប្រាស់ នៅលើបណ្តាញសង្គមមួយនេះ តាមរយៈការចុច «Like &…
រាជធានីភ្នំពេញ ៖ នាយកដ្ឋានព័ត៌មានវិទ្យានៃក្រសួងមហាផ្ទៃជាថ្មីម្តងទៀតបានក្រើនរម្លឹក និងបានណែនាំឱ្យបងប្អូនប្រជាពលរដ្ឋខ្មែរ ដែលកំពុងតែសស្រាក់សស្រាំងប្រើប្រាស់បណ្តាញសង្គមយក្សហ្វេសប៊ុក សូមប្រុងប្រយ័ត្នល្បិចបោកប្រាស់ នៅលើបណ្តាញសង្គមមួយនេះ តាមរយៈការចុច «Like & Share» ដោយសន្យាថា នឹងបានលុយ ឬរង្វាន់មានតម្លៃផ្សេងៗជាច្រើន។
នាយកដ្ឋានព័ត៌មានវិទ្យានៃក្រសួងមហាផ្ទៃឱ្យដឹងថា នាពេលថ្មីៗនេះ ក្រុមការងារបច្ចេកទេសនៃនាយកដ្ឋានព័ត៌មានវិទ្យា សង្កេតឃើញអំពើឆបោកតាមទំព័រហ្វេសប៊ុក (Facebook Page) មួយចំនួនដោយប្រើប្រាស់ឈ្មោះ និងរូបថតរបស់បុគ្គលល្បីៗ បោកបញ្ឆោតប្រជាពលរដ្ឋដើម្បីចុច Like ទំព័រហ្វេសប៊ុក (Facebook Page) និងចែករំលែក (Share) អត្ថបទចាប់អារម្មណ៍មួយចំនួនតៗគ្នា ឧទាហណ៍៖ ការឈ្នះរង្វាន់ជាសាច់ប្រាក់សុទ្ឋ ឬត្រូវរង្វាន់ទូរស័ព្ទដៃជំនាន់ថ្មីជាដើម។
នាយកដ្ឋានបានបន្តថា តាមការស្រាវជ្រាវរបស់ក្រុមការងារបច្ចេកទេសនៃនាយកដ្ឋានព័ត៌មានវិទ្យា ជនខិលខូចបានប្រើប្រាស់វិធីសាស្ត្រចំនួន០២ ដើម្បីទាញយកផលប្រយោជន៍គឺ ៖
វិធីសាស្ត្រទី១៖ ជនខិលខូចធ្វើការផ្ញើសារទៅម្ចាស់គណនីហ្វេសបុកដែលបាន Like និងចែករំលែក (Share) អត្ថបទខាងលើ ដើម្បីបញ្ចុះបញ្ចូលឲ្យផ្ញើប្រាក់មួយចំនួន ដើម្បីជាថ្នូរនឹងបើកជាសាច់ប្រាក់សុទ្ឋ ឬរង្វាន់មានតម្លៃផ្សេងៗ។
វីធីសាស្ត្រទី២ ៖ បន្ទាប់ពីទទួលបានចំនួន Like និងចែករំលែក (Share) ជាច្រើនសន្ឋឹកសន្ធាប់រួចមក ជនខិលខូចនឹងធ្វើការប្តូរឈ្មោះទំព័រហ្វេសបុក (Facebook Page) ធ្វើការលុបចោលនូវទិន្ឋន័យចាស់ៗ និងធ្វើការលក់ទំព័រហ្វេសបុក (Facebook Page) បន្ត។
នាយកដ្ឋានព័ត៌មានវិទ្យា សូមក្រើនរំលឹកដល់មហាជន ដែលកំពុងប្រើប្រាស់បណ្តាញផ្សព្វផ្សាយសង្គម សូមមេត្តាប្រុងប្រយ័ត្នអំពើឆបោកទាំងអស់នេះ និងធ្វើការរាយការណ៍ដល់សម្ថតកិច្ចដែលនៅជិតលោកអ្នក ដើម្បីធ្វើការស្រាវជ្រាវ និងកំណត់មុខសញ្ញាជនខិលខូចទាំងនោះមកផ្តទ្ទាទោសតាមច្បាប់៕
ចែករំលែកព័តមាននេះ