រាជធានីភ្នំពេញ ៖ បឺត សង្ឃឹម មកពីក្លិបរ៉ាហាប់ស្វាយប៉ាក ត្រូវបានគេរៀបចំឱ្យជួបប្រកួតសងសឹកជាមួយវ៉ាន់ វឿន មកពីក្លិបឃ្លាំងមឿងកីឡាម្ដងទៀតនៅលើសង្វៀនស៊ីអិនស៊ីនាថ្ងៃសៅរ៍ ទី១២ កញ្ញា ឆ្នាំ២០២០ ខាងមុខនេះ ក្នុងកម្មវិធីប្រដាល់ដណ្ដើមប្រាក់លានពីក្រុមហ៊ុនគោជល់ ។
ក្នុងជំនួប៣លើកកន្លងមក បឺត សង្ឃឹមធ្លាប់ជួបរឿងខកចិត្តតែម្ដងគត់ក្នុងឱកាសប្រកួតដណ្ដើមខ្សែក្រវាត់គោជល់វគ្គផ្ដាច់ព្រ័ត្រដោយកាលណោះគេបានចាញ់ពិន្ទុវ៉ាន់ វឿនទាំងប្រផិតប្រផើយប៉ុណ្ណោះ ។ ប៉ុន្តែសម្រាប់ការប្រកួតចំនួនពីរលើកទៀត អ្នកប្រដាល់មកពីក្លិបរ៉ាហាប់ស្វាយប៉ាករូបនេះ មានឱកាសសងសឹកបានសម្រេចវិញដោយបានយកឈ្នះទាំងពីរលើកតែម្ដង ។ ជាពិសេសសម្រាប់ការប្រកួតមួយលើកចុងក្រោយ បឺត សង្ឃឹម បានប្រើស្នៀតជើងទាត់ផ្កាប់ចានត្រូវកញ្ចឹងកគូប្រកួតពេញទំហឹង ធ្វើឱ្យវ៉ាន់ វឿន សន្លប់ធំនៅត្រឹមទឹកទី៤។
ទោះជាយ៉ាងណាសម្រាប់ការប៉ះគ្នាជាលើកទី៤នេះទៀត គេមិនអាចទាយទុកមុនថាតើ បឺត សង្ឃឹម អាចសម្រេចក្ដីស្រមៃរបស់ខ្លួនក្នុងការក្លាយជាម្ចាស់ប្រាក់លានបានឬអត់នោះទេ។
ប៉ុន្តែលោកបឺត សំខាន់ ដែលជាគ្រូបង្វឹកនោះនៅតែមានជំនឿចិត្តយ៉ាងច្រើនលើសិស្សរបស់លោក ព្រោះអីតាមរយៈការយកឈ្នះទាំងពីរលើកចុងក្រោយមកនេះបឺត សង្ឃឹម បានស្គាល់ពីល្បិចប្រកួត វ៉ាន់ វឿន ខ្ទេចខ្ទីអស់គ្មានសល់នោះទេ ។ ម្យ៉ាងទៀត សំអាងទៅលើស្នៀតជើងដ៏ជំនាញរបស់គេ វ៉ាន់ វឿន បើចង់យកឈ្នះប្រហែលជាពិបាកបន្តិចហើយ។
ចំណែកវ៉ាន់ វឿន ពេលទទួលដំណឹងថាជួបសត្រូវចាស់ម្ដងទៀតនោះ គេក៏មិនហ៊ានធ្វេសប្រហែសនោះដែរ មួយរយៈមកនេះគេខិតខំប្រឹងប្រែងហ្វឹកហាត់សម្បើមខ្លាំងណាស់។មិនតែប៉ុណ្ណោះ គេក៏មិនចង់ឱ្យបឺត សង្ឃឹម ធ្វើព្យុះភ្លៀងតាមតែអំពើចិត្តនោះដែរ។ ដូច្នេះសម្រាប់ការជួបគ្នារវាងកីឡាករទាំងពីរលើកនេះដឹងតែពីល្អមើលមិនខាន។
សម្រាប់មួយគូទៀតដែលត្រូវប្រកួតដណ្ដើមប្រាក់លាននៅក្នុងថ្ងៃជាមួយគ្នានេះដែរ គឺជាការជួបគ្នារវាងកីឡាករឈាង ហុង មកពីក្លិបខ្លារខិនមានរិទ្ធ ជាមួយកីឡាករ ឡុង សំណាងមកពីក្លិបសាលវ័ន្តកីឡា ។ គូនេះក៏ធ្លាប់ប៉ះគ្នាចំនួន៣លើករួចមកហើយដែរ ប៉ុន្តែឈាង ហុងមិនដែលប្រកួតឈ្នះ ឡុង សំណាងម្ដងណាឡើយ ។ ទោះជាបែបនេះក្ដី ក៏ឈាង ហុង នៅតែមានចិត្តចង់ប្រកួតសងសឹកគ្មានទីបញ្ចប់។
ម្យ៉ាងវិញទៀត សម្រាប់ការប៉ះគ្នាជាលើកទី៤នេះទៀត ឈាង ហុង ប្ដេជ្ញាថាត្រូវតែសងសឹកឱ្យបានសម្រេច ៕
ចែករំលែកព័តមាននេះ