ខេត្តកំពង់ឆ្នាំង ៖ ក្នុងឱកាសដឹកនាំមន្ត្រីតុលាការនិងមន្ត្រីពន្ធនាគារ ទៅសួរសុខទុក្ខនិងនាំយកគ្រឿងឧបភោគបរិភោគមួយចំនួន ទៅផ្តល់ជូនដល់ជនជាប់ចោទ ពិរុទ្ធជន និងទណ្ឌិត ដែលកំពុងជាប់ឃុំនៅក្នុងពន្ធនាគារខេត្ត កាលពីព្រឹកថ្ងៃទី៨ ខែកញ្ញា…
ខេត្តកំពង់ឆ្នាំង ៖ ក្នុងឱកាសដឹកនាំមន្ត្រីតុលាការនិងមន្ត្រីពន្ធនាគារ ទៅសួរសុខទុក្ខនិងនាំយកគ្រឿងឧបភោគបរិភោគមួយចំនួន ទៅផ្តល់ជូនដល់ជនជាប់ចោទ ពិរុទ្ធជន និងទណ្ឌិត ដែលកំពុងជាប់ឃុំនៅក្នុងពន្ធនាគារខេត្ត កាលពីព្រឹកថ្ងៃទី៨ ខែកញ្ញា ឆ្នាំ២០២០ ឯកឧត្តម អ៊ិត សុធា ព្រះរាជអាជ្ញាអមសាលាដំបូងខេត្តបានមានប្រសាសន៍ផ្ដាំផ្ញើដល់អ្នកដែលកំពុងជាប់ពន្ធនាគារ សូមប្រឹងប្រែងកសាងខ្លួន និងអប់រំផ្លូវចិត្តឱ្យបានល្អ ដើម្បីឆាប់បានចេញវិលត្រឡប់ទៅលំនៅឋានជួបជុំក្រុមគ្រួសារវិញ ។
ឯកឧត្តម អ៊ិត សុធា ថ្លែងទៀតថា ថ្វីបើបងប្អូនដែលកំពុងជាប់ក្នុងពន្ធនាគារក៏ពិតមែន ក៏ប៉ុន្តែថ្ងៃនេះ ដោយមានការយកចិត្តទុកដាក់ពីស្ថាប័នតុលាការ រូបលោកផ្ទាល់បានដឹកនាំមន្ត្រីតុលាការ និងមន្ត្រីពន្ធនាគារ នាំយកគ្រឿងឧបភោគបរិភោគរួមមាន មី ទឹកត្រី ទឹកស៊ីអ៊ីវ ទឹកក្រូច ទឹកបរិសុទ្ធ អង្ករ សាច់ជ្រូក មកចែកជូនបងប្អូនដែលកំពុងជាប់ពន្ធនាគារ ។
ជាមួយនេះ បាននិមន្តព្រះសង្ឃធ្វើពិធីកាន់បិណ្ឌវេនទី៦ ឱ្យបងប្អូនបានចូលរួមធ្វើបុណ្យដាក់បាត្រ ដើម្បីឧទិស្ទកុសលជូនដល់ញាតកា បុព្វការីជនដែលបានចែកឋានទៅ ព្រោះថាបង
ប្អូនមិនអាចទៅធ្វើបុណ្យនៅគេហឋាន ឬក៏នៅវត្តអារាមបានក៏ពិតមែន ប៉ុន្តែថ្ងៃនេះបងប្អូនអាចធ្វើបុណ្យកាន់បិណ្ឌ និងឧទ្ទិសមគ្គផលដែលបានចែកជូននៅពេលនេះ ដើម្បីឱ្យដល់បុព្វការីជនរបស់បងប្អូន ក៏ដូចបងប្អូនធ្វើបុណ្យនៅតាមទីអារាមផងដែរ ។
ឯកឧត្តមព្រះរាជអាជ្ញាអមសាលាដំបូងខេត្ត សំណូមពរដល់បងប្អូនទាំងអស់ដែលកំពុងជាប់ពន្ធនាគារ ត្រូវគោរពវិន័យ កែលំអកសាងខ្លួនឱ្យបានល្អ ដើម្បីឆាប់បានវិលត្រឡប់ទៅជួបជុំក្រុមគ្រួសារវិញ ហើយត្រូវគោរពច្បាប់បទដ្ឋាននានា របស់ព្រះរាជាណាចក្រកម្ពុជា ។ ជាមួយគ្នានេះ ត្រូវថែរក្សាសុខភាពឲ្យបានមាំមួន ដោយហូបចុកមានអនាម័យ ចៀសវាងការឆ្លងរីករាលដាលនៃជំងឺកូវីដ-១៩ ។
សូមបញ្ជាក់ថា នៅក្នុងឱកាសនោះមានរៀបចំដាក់បិណ្ឌវេនទី៦ ដោយបាននិមន្តព្រះសង្ឃចំនួន១៥អង្គ ធ្វើពិធីរាប់បាត្រ ប្រគេនទេយ្យទានតាមពិធីព្រះពុទ្ធសាសនារបស់មន្ត្រីពន្ធនាគារ ក៏ដូចជាអ្នកជាប់ពន្ធនាគារផងដែរ ៕
ចែករំលែកព័តមាននេះ