រាជធានីភ្នំពេញ ៖ ពាក្យថាកីឡាការិនី បើទោះជាស្ថិតក្នុងប្រភេទណាមួយក៏ដោយ ក៏មិនសូវត្រូវបានមនុស្សចាស់ទុំជាឪពុកម្ដាយគាំទ្រនោះដែរ ជាពិសេសសម្រាប់អ្នកអភិរក្សវប្បធម៌ខ្មែរតែម្ដង ។ មនុស្សភាគច្រើនយល់ថា នារីដែលចូលចិត្តកីឡាច្រើនតែជានារីចរិតប្រុស និងមិនមែនជានារីទន់ភ្លន់នោះផង…
រាជធានីភ្នំពេញ ៖ ពាក្យថាកីឡាការិនី បើទោះជាស្ថិតក្នុងប្រភេទណាមួយក៏ដោយ ក៏មិនសូវត្រូវបានមនុស្សចាស់ទុំជាឪពុកម្ដាយគាំទ្រនោះដែរ ជាពិសេសសម្រាប់អ្នកអភិរក្សវប្បធម៌ខ្មែរតែម្ដង ។ មនុស្សភាគច្រើនយល់ថា នារីដែលចូលចិត្តកីឡាច្រើនតែជានារីចរិតប្រុស និងមិនមែនជានារីទន់ភ្លន់នោះផង ។ យ៉ាងណាមិញ កីឡាការិនីប៉េតង់ ធា សម្ផស្ស ជាតារាចម្រៀងក្លាស៊ិកផង ជាតារាសម្ដែងផង ដែលតែងតែបង្ហាញភាពខ្យូតៗនៅក្នុងសិល្បៈនោះ បានអះអាងថា ថ្វីដ្បិតតែនាងគឺជាកីឡាការិនីដែលមើលទៅរឹងមាំមែន តែនាងក៏មាននិស្ស័យទន់ភ្លន់ផងដែរ ទើបនាងអាចប្រឡូកសិល្បៈកើតដូចពេលនេះ។
ស្ថិតក្នុងវ័យ២៥ឆ្នាំ ធា សម្ផស្ស ត្រូវគេស្គាល់គួរសមក្នុងនាមជាតារាចម្រៀងមួយរូបប្រចាំផលិតកម្ម ជាតារាសម្តែង និង ជាអ្នកដើរម៉ូដ ។ ប៉ុន្តែនៅក្នុងវិស័យកីឡា នាងក៏ត្រូវគេស្គាល់ថាគឺជាកីឡាការិនីជើងខ្លាំងផ្នែកប៉េតង់ផងដែរ ខណៈដែលពេលនេះ ក៏រយាលសិល្បៈ ហើយងាកមកពង្រឹងកីឡាវិញ ។ នាងត្រូវគេឃើញបង្ហាញមុខផ្តោតខ្លាំងលើការហ្វឹកហាត់កីឡាប៉េតង់ ព្រោះនាងចង់តំណាងឲ្យ កម្ពុជា ចូលរួមការប្រកួតកីឡាស៊ីហ្គេមលើកដំបូង នៅប្រទេសវៀតណាម នាឆ្នាំ២០២១ ខាងមុខនេះ ។ ម្យ៉ាងមកពីនាងធ្លាប់បានមេដាយកម្រិតជាតិ ហើយចង់ក្លាយខ្លួនជាកីឡាការិនីជម្រើសជាតិជាថ្មី ក្រោយត្រូវបានសហព័ន្ធកីឡាប៊ូល និងប៉េតង់កម្ពុជាជម្រុះចេញពីក្រុមជម្រើសជាតិ ជាលើកទី៥ផង ទើបនាងខំប្រឹងប្រែង។
កីឡាការិនីរូបនេះ ត្រូវបានសហព័ន្ធជម្រុះ ចេញពីក្រុមជម្រើសជាតិ ចំនួន៤លើក ក្រោយ ប្រឡូកក្នុងវិស័យនេះអស់រយៈពេល៥ឆ្នាំ ។ ប៉ុន្តែ នាងបានជាប់ជម្រើសជាតិឡើងវិញទាំង៤លើក ក្រោយជាប់ក្នុងការប្រកួតតេស្តជ្រើសរើស កីឡាករជម្រើសជាតិ ។
កីឡាការិនី មកពីស្រុកកោះអណ្តែត រូបនេះ បាននិយាយថា មូលហេតុដែលខ្លួនត្រូវបានសហព័ន្ធជម្រុះចេញពីក្រុមជម្រើសជាតិ៤ឆ្នាំជាប់គ្នា ដោយសារនាងមិនសូវបានហ្វឹកហាត់ព្រោះជាប់រវល់ជាមួយការសិក្សា និងមមាញឹកជាមួយការងារសិល្បៈ។ «ក្តីស្រមៃរបស់ខ្ញុំ គឺខ្ញុំចង់ចូលរួមប្រកួតក្នុងកីឡាស៊ីហ្គេម អ៊ីចឹងឆ្នាំនេះ ខ្ញុំប្តេជ្ញាខិតខំហ្វឹកហាត់ និងត្រៀមទៅស៊ីហ្គេមឆ្នាំ២០២៣ដែលកម្ពុជាធ្វើជាម្ចាស់ផ្ទះ »។ នេះជាការបង្ហាញក្តីស្រមៃ និងការប្តេជ្ញាចិត្ត របស់កីឡាការិនី ធា សម្ផស្ស ។
ទោះបីយ៉ាងនេះក្តី កីឡាការិនីដែលជាប់ជម្រើសជាតិនៅឆ្នាំ២០១៥រូបនេះ អះអាងថា នាងនឹងមិនបោះបង់ចោលវិស័យណាមួយឡើយ ព្រោះវិស័យទាំងពីរជាចំណង់ចំណូលចិត្តរបស់ខ្លួន ។ សម្ផស្ស បន្តថា ឆ្នាំនេះនាងអាចបោះបង់វិស័យសិល្បៈ ហើយងាកមកពង្រឹង លើវិស័យកីឡាប៉េតង់ដើម្បីសម្រេចគោលដៅដែលចង់ដណ្តើមមេដាយលើឆាកអន្តរជាតិជូនជាតិមាតុភូមិ ។ ដកស្រង់សម្ដីពីសារព័ត៌មានក្នុងស្រុក នាងនិយាយថា«ការងារសិល្បៈក៏ខ្ញុំស្រឡាញ់ កីឡាក៏ខ្ញុំស្រឡាញ់ តែបើខ្ញុំអាចបែងចែកពេលវេលាជាមួយសិល្បៈផង និងកីឡា ផង វាក៏ជារឿងល្អ ។ ដ្បិតតែខ្ញុំមិនអាចចេញទៅដណ្តើមមេដាយនៅក្រៅប្រទេសមែន ប៉ុន្តែខ្ញុំនៅតែជាកីឡាការិនីជម្រើសជាតិ ខ្ញុំនៅតែចូលរួមហ្វឹកហាត់ ព្រោះវាជាក្តីស្រឡាញ់របស់ខ្ញុំ»។
សម្ផស្ស បានចូលប្រឡូកក្នុងវិស័យកីឡា ប៉េតង់ តាំងពីនាងរៀននៅអនុវិទ្យាល័យមកម៉្លេះ ។
ដំបូងឡើយ នាងជាកីឡាការិនីបាល់ទះ តែត្រូវបានគ្រូផ្ទេរឲ្យទៅលេងកីឡាប៉េតង់ ក្រោយ ឃើញនាងមានមាឌតូច និងកម្ពស់ទាប ។ នាង ធ្លាប់ឈ្នះជើងឯកបានចំនួនពីរក្នុងការប្រកួត ជម្រើសថ្នាក់ខេត្ត ដោយទទួលបានម៉ូតូលើកទឹកចិត្ត ចំនួនពីរគ្រឿង ។
ភាពលេចធ្លោក្នុងការប្រកួតជម្រើសជើងឯកថ្នាក់ខេត្តនេះ នៅអំឡុងឆ្នាំ២០១៤ នាងត្រូវបានសហព័ន្ធកីឡាប៊ូល និងប៉េតង់កម្ពុជា ជ្រើសរើសឲ្យធ្វើជាកីឡាការិនីជម្រើសជាតិបម្រុង ។ ក្រោយមក នៅឆ្នាំ២០១៥ នាងក៏បានក្លាយជា កីឡាការិនីប៉េតង់ជម្រើសជាតិពេញសិទ្ធិ ក្រោយ ទទួលបានចំណាត់ថ្នាក់ លេខ៣ ក្នុងការប្រកួត ជើងឯកថ្នាក់ជាតិ ។
ក្រោយប្រឡូក អស់រយៈពេល៥ឆ្នាំកន្លងមកនេះ កីឡាការិនី ធា សម្ផស្ស ធ្លាប់សាង ស្នាដៃលើឆាកអន្តរជាតិ ជូនជាតិមាតុភូមិចំនួនពីរលើក តាមរយៈការឈ្នះមេដាយប្រាក់ក្នុងការប្រកួត Mekong Goodwill នៅប្រទេស ថៃ និងមេដាយសំរឹទ្ធ នៅប្រទេសវៀតណាម ។ ប៉ុន្តែកីឡាការិនីរូបនេះ មិនធ្លាប់ចូលរួមការប្រកួតកីឡា SEA Games និង Asia Games នោះទេ ៕
ចែករំលែកព័តមាននេះ