បរទេស ៖ អតីតកីឡាករគុនចម្រុះ Conor McGregor បានធ្វើឲ្យមានការភ្ញាក់ផ្អើលជាថ្មីម្តងទៀត តាមរយៈការបង្ហោះរូបភាពមួយចំនួន ពីសកម្មភាពហ្វឹកហាត់ដ៏ខ្លាំងមួយ ដែលនាំឲ្យមានមតិជាច្រើនដេញដោលគ្នាពីការវិលត្រឡប់មកកាន់សង្វៀន UFC វិញ របស់បុរសជនជាតិអៀរឡង់រូបនេះ។
McGregor ដែលឈានដល់វ័យ ៣២ឆ្នាំ បច្ចុប្បន្នកំពុងសម្រាកលំហែកាយនៅប្រទេសបារាំងជាមួយគូដណ្តឹងគឺនាង Dee Devlin និងកូន ២ នាក់របស់ពួកគេ បន្ទាប់ពីការប្រកាសចូលនិវត្តន៍កាលពីខែមិថុនា ឆ្នាំ ២០២០ កន្លងទៅ និងជាលើកទី៣ របស់ខ្លួនក្នុងរយៈពេល ៤ឆ្នាំ។
បើទោះបីជាប្រកាសចូលនិវត្តន៍ កាលពីពេលថ្មីៗក៏ពិតមែន ប៉ុន្តែ McGregor នៅតែបន្តធ្វើការហ្វឹកហាត់ជាប្រចាំថ្ងៃ គ្រាន់តែពុំសូវបង្ហាញវាជាសាធារណៈ តាមរយៈបណ្តាញសង្គមរបស់ខ្លួន។ ប៉ុន្តែកាលពីថ្ងៃទី ៨ កន្លងទៅ រូបគេបានបង្ហោះរូបភាពហ្វឹកហាត់យ៉ាងសកម្មនៅលើបណ្តាញ Instagram ដែលបង្កឲ្យមានជជែកវែកញែកគ្នាជាច្រើន អំពីការវិលត្រឡប់មកកាន់សង្វៀន UFC វិញ។
ស្របពេលដែលថ្មីៗនេះ គូសត្រូវចាស់ដែលបានផ្តួល McGregor កាលពីឆ្នាំ ២០១៨ គឺកីឡាកររុស្ស៊ី Khabib Nurmagomedov តែងតែបោះពាក្យសម្តីជារឿយៗ ព្រមទាំងបានសារភាពថា ការប្រកួតម្តងទៀតរវាងពួកគេទាំង ២ គឺនៅតែអាចធ្វើទៅបាន៕ (ដកស្រង់ចេញពី The Sun)
ចែករំលែកព័តមាននេះ