រាជធានីភ្នំពេញ ៖ ទីបំផុត កីឡាករសួន ចាន់នី មកពីក្លិបបក្សីស្លាបដែក មានឱកាសសងសឹកជាមួយអ្នកប្រដាល់ជើងខ្លាំងមឿនសុខហ៊ុច បានសម្រេចហើយនៅក្នុងជំនួបជាលើកទី២នៅលើសង្វៀនស៊ីអិនស៊ី កាលពីថ្ងៃទី៦កញ្ញា ។…
រាជធានីភ្នំពេញ ៖ ទីបំផុត កីឡាករសួន ចាន់នី មកពីក្លិបបក្សីស្លាបដែក មានឱកាសសងសឹកជាមួយអ្នកប្រដាល់ជើងខ្លាំងមឿនសុខហ៊ុច បានសម្រេចហើយនៅក្នុងជំនួបជាលើកទី២នៅលើសង្វៀនស៊ីអិនស៊ី កាលពីថ្ងៃទី៦កញ្ញា ។
សម្រាប់ការជួបគ្នាលើកនេះ សួន ចាន់នីបានព្យាយាមប្ដូរកែងនិងជង្គង់ជាមួយមឿន សុខហ៊ុច តាំងពីទឹកទី១និងទី២ ព្រោះកម្លាំងរបស់គេអាចទ្រាំទ្រការប្រកួតបានល្អបំផុតត្រឹមទឹកទី៣ប៉ុណ្ណោះ ។ ទោះជាយ៉ាងនេះក្ដី ការប្រកួត៣ទឹកដំបូងគេសង្កេតឃើញរាល់ការវាយចេញរបស់ សួន ចាន់នី ចំគោលដៅល្អជាង ដោយសារមឿន សុខហ៊ុច ដែលធ្លាប់យកឈ្នះពីមុនមកនោះ ហាក់ដូចជាធ្វេសប្រហែសបន្តិចដោយបណ្ដោយឱ្យសួន ចាន់នី ដាក់សម្ពាធមកលើខ្លួនជាប់រហូត។
មឿន សុខហ៊ុច ដែលព្យាយាមវាយបកសងវិញចាប់ពីទឹកទី៤រហូតទៅនោះ ត្រូវបានអ្នក
ទស្សនាផ្ដល់ការយល់ឃើញថា ទាល់តែវាយគូប្រកួតឱ្យសន្លប់ទើបមានឱកាសឈ្នះបានតែសួន ចាន់នី នៅតែអាចទប់ទល់បានរហូតដល់ចប់ទឹកនិងឈ្នះការប្រកួតដោយពិន្ទុនៅនាទីចុង
ក្រោយ។
ចំណែកកីឡាករថៃ រ៉េត មកពីក្លិបបញ្ជាការដ្ឋានទ័ពពិសេស ក៏បានយកឈ្នះកីឡាករឯម ដារ៉ូ មកពីក្លិបថ្មគោលខណ្ឌពោធិសែនជ័យដោយពិន្ទុដូចគ្នា ។ រវាងគូនេះទោះបីជាមិនសូវល្បីឈ្មោះមែនក៏ប៉ុន្តែកីឡាករទាំងពីរបានធ្វើឱ្យអ្នកដែលនិយមតាមដានការប្រកួតកីឡាប្រដាល់មានការចាប់អារម្មណ៍យ៉ាងខ្លាំង។
ជាពិសេសកីឡាករថៃ រ៉េត បានបង្ហាញវិជ្ជាគុនវាយទៅលើឯម ដារ៉ូ មិនដកដៃតាំងពីចាប់ផ្ដើមទឹកដំបូង ។ ទោះបីយ៉ាងណា ឯម ដារ៉ូ បានប្រឹងប្រែងទប់ទល់មិនឱ្យថៃ រ៉េត ធ្វើអ្វីមកលើរូបគេស្រេចតែចិត្តបានទេ ។ ជាក់ស្ដែងស្នៀតកណ្ដាប់ដៃរបស់គេបានម៉ាត់ចូលមុខពេញៗវិញធ្វើឱ្យថៃ រ៉េត ចង់យ៉ាប់ម្ដងៗ ។ យ៉ាងណាក៏ដោយចប់ការប្រកួតឯម ដារ៉ូ ត្រូវបានគណៈកម្មការរៀបចំការប្រកួតប្រកាសឱ្យចាញ់ពិន្ទុថៃ រ៉េត ៣ទល់២ ។
នៅលើសង្វៀនដដែលកីឡាករយ៉ន ពិសីមកពីក្លិបសាលវ័ន្តកីឡា ក៏បានយកឈ្នះកីឡាករ ធន់ វណ្ណឌី ដោយពិន្ទុដែរ ៕
ចែករំលែកព័តមាននេះ