ខេត្តបន្ទាយមានជ័យ ៖ នៅទីបំផុត ការកែច្នៃរថយន្តកាមរីស៊េរីចាស់មកជារថយន្តស៊េរីថ្មីដែលអ្នកណាៗក៏មានការស្ងើចសរសើរនោះ មិនត្រូវបានក្រសួងសាធារណការ និងដឹកជញ្ជូនអនុញ្ញាតឱ្យឆៀកឡើយ និងបានបង្ហាញពីហេតុផលមួយចំនួនពីរការមិនអនុញ្ញាតនេះ គឺការច្នៃខុសច្បាប់ និងអាចប៉ះពាល់ដល់កម្មសិទ្ធិបញ្ញាទៀតផង ។
លោក ឈួន សុផាន់ ជាម្ចាស់សហគ្រាសម៉ាស៊ីនច្រូតស្រូវខ្នាតធំនិងលក់គ្រឿងបន្លាស់នៅក្រុងសិរីសោភ័ណនិងស្រុកមង្គលបុរី បានប្រាប់អ្នកយកព័ត៌មានយើងតាមទូរស័ព្ទ នៅថ្ងៃទី៦ ខែកញ្ញា ឆ្នាំ២០២០ថា ក្រោយពីកូនប្រុសរបស់គាត់ឈ្មោះ ឈួន ណារ៉ា អាយុ២៨ឆ្នាំ បានកែច្នៃរថយន្តកាមរីស៊េរីឆ្នាំ១៩៩២ ចង្កូតស្តាំឲ្យមានរូបភាពជារថយន្តថ្មី ក៏បានយកទៅឆៀកនៅមន្ទីរសាធារណការ និងដឹកជញ្ជូនខេត្ត ។
លោក ឈួន សុផាន់ បន្តថា នៅពេលយកទៅឆៀកនោះ គឺបានប្រាប់មន្ត្រីជំនាញថា នេះជារថយន្តកាមរីស៊េរីឆ្នាំ១៩៩២ ដែលកូនប្រុសគាត់បានកែច្នៃជារថយន្តស៊េរីថ្មី ។ ពេលនោះមន្ត្រីត្រួតពិនិត្យលើឯកសារគឺមានគ្រប់គ្រាន់ទាំងអស់ តែរថយន្តចាស់កែច្នៃជារថយន្តស៊េរីថ្មី ទើប
ជាបញ្ហា ។
ទោះបីជាបែបណា ក្រុមមន្ត្រីបានថតរូបរថយន្តដែលសុំឆៀកនេះបង្ហោះទៅឱ្យមន្ត្រីជំនាញរបស់ក្រសួងពិនិត្យ និងរង់ចាំរហូតមក និងទើបទទួលព័ត៌មានថា ក្រសួងមិនចេញឆៀកឱ្យទេ ដោយសាររថយន្តកែច្នៃខុសច្បាប់និងកម្មសិទ្ធិបញ្ញា ។ ពិតជាគួរឱ្យសោកស្តាយ ចំពោះការប្រឹងប្រែងរបស់កូនប្រុសគាត់ដែលខិតខំកែច្នៃរថយន្តស៊េរីចាស់មកជារថយន្តស៊េរីថ្មី ។
ទោះជាយ៉ាងណា លោក ឈួន សុផាន់ បានកោតសរសើរកូនប្រុសគាត់យ៉ាងខ្លាំង ដែលឪពុកគ្មានលុយទិញរថយន្តស៊េរីថ្មីឱ្យកូនជិះ ហើយកូនប្រុសទិញរថយន្តកាមរីស៊េរីឆ្នាំ១៩៩២ចង្កូតស្តាំ
ក្នុងតម្លៃ១.៥០០ដុល្លារ យកមកកែច្នៃរយៈពេលជាង១ឆ្នាំទើបរួចរាល់ ហើយយកទៅឆៀកសម្រាប់ឆ្នាំ២០២០នេះ ។ មិនតែប៉ុណ្ណោះ ថែមទាំងត្រូវបានបងប្អូនប្រជាពលរដ្ឋកោតសរសើរ
គ្រប់ៗគ្នា និងថតជាអនុស្សារីយ៍និងថតបង្ហាញក្នុងបណ្តាញសង្គមទៀតផង ។
លោក សុក ចាន់ថា ប្រធានមន្ទីរសាធារណការនិងដឹកជញ្ជូនខេត្ត ថ្លែងថា រថយន្តស៊េរីចាស់ដែលកែច្នៃជារថយន្តស៊េរីថ្មីហើយយកមកឆៀកនោះ ដោយសារតែឯកសាររថយន្តផលិតឆ្នាំ១៩៩២ ហើយត្រូវបានកែច្នៃជារថយន្តថ្មីទើបមន្ត្រីជំនាញបានថតរូបបង្ហោះឱ្យមន្ត្រីជំនាញក្រសួងពិនិត្យមើលសិន ដែលទីបំផុតគឺមិនអនុញ្ញាតឱ្យឆៀកទេ ។
គួររំលឹកថា ៖ ឡូយម៉្លេះកូនខ្មែរ! ឡានសេរីចាស់ឆ្នាំ៩២ ប្រែក្រឡាជាឡានស្ព័ររាងយ៉ាងសង្ហារ ៕
ចែករំលែកព័តមាននេះ