ខេត្តស្វាយរៀង ៖ អ្នកបើកបររថយន្តកុងតឺន័រហាក់ដូចចងកំហឹងបើកបុកច្រមុះជ្រូករង្វង់មូលរូបគោ ជ្រុលបុករះទ្រូងចែកផ្លូវដួលរាបដល់ដី ហើយបើកទ្វារថយន្តរត់គេចខ្លួនបាត់ស្រមោល បន្សល់ទុករថយន្តនៅនឹងកន្លែងកើតហេតុ។ ករណីគ្រោះថ្នាក់ចរាចរណ៍ កើតឡើងកាលពីវេលាម៉ោង០៩និង៤៨នាទីយប់ថ្ងៃទី០៤ កញ្ញា ស្ថិតលើផ្លូវជាតិលេខ០១ត្រង់ចំណុចKm ១២៣/១២៤រង្វង់មូលរូបគោ ក្នុងភូមិរូបគោ សង្កាត់ព្រៃឆ្លាក់ ក្រុងស្វាយរៀង។
បើតាមសមត្ថកិច្ចឲ្យដឹងថា រថយន្ដកុងតឺន័របង្កពណ៌បៃតង ពាក់ស្លាកលេខភ្នំពេញ៣A ២៨២០ សឺមីរ៉ឺម៉ក ពាក់ស្លាកលេខ ព្រះសីហនុ៤A-០៨៨៥ អ្នកបើកបរមិនស្គាល់អត្តសញ្ញាណទេ ។ ក្រោយកើតហេតុ បានបើកទ្វារថយន្តរត់គេចខ្លួនបាត់ភ្លាមៗ ទុករថយន្តចោលនៅកន្លែងកើតហេតុ ។
ប្រភពបន្តថា មុនពេលកើតហេតុ គេឃើញរថយន្ដបង្កបើកបរពីទិសខាងកើតទៅលិចយ៉ាងលឿនចំកណ្តាលថ្នល់ ទំនងអ្នកបើកបរស្រវឹងស្រា ក៏បុកចំថ្មច្រមុះជ្រូករបាំងចែកទ្រូងផ្លូវពេញទំហឹងលាន់ដូចរន្ទះខូចខាតទាំងស្រុងប្រវែងជិត៤០ម៉ែត្ររថយន្ដខូចខាតធ្ងន់។
ករណីខាងលើ បណ្ដាលអោយខូចខាតថ្មក្បាលនាគនិងបង្កាន់ដៃពុះចែកទ្រូងផ្លូវខាងកើតរង្វង់គោដួលរាបដល់ដីខ្ទេចខូចទាំងស្រុង។ ក្រោយពីសមត្ថកិច្ចធ្វើការវាស់វែងរួចបញ្ជូនមធ្យោបាយរក្សាទុកនៅអធិការនគរបាលក្រុងស្វាយរៀង ដើម្បីដោះស្រាយពេលក្រោយ។
សមត្ថកិច្ចធ្វើការសន្និដ្ឋានថា មូលហេតុអ្នកបើកបរប្រើប្រាស់ល្បឿនលឿន ខ្វះការប្រុងប្រយ័ត្ន ។
ចែករំលែកព័តមាននេះ