រាជធានីភ្នំពេញ៖ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយក មជ្ឈមណ្ឌលសកម្មភាពកម្ចាត់មីនកម្ពុជា (CMAC)បានបញ្ជាក់ឱ្យដឹងនៅរសៀលថ្ងៃទី៤
ខែកញ្ញា ឆ្នាំ២០២០ថា ក្រុមមន្ត្រីជំនាញស៊ីម៉ាក់សហការជាមួយអាជ្ញាធររាជធានីភ្នំពេញបានជីកកាយដី ដើម្បីរៀបចំប្រព័ន្ធលូចម្រុះទឹកនៅបរិវេណវត្តភ្នំ បានប្រទះឃើញរូបចម្លាក់តោថ្មបុរាណដ៏ធំមួយកប់ក្នុងដីនៅជាប់មាត់ច្រាំងទន្លេ ។
ការប្រទះឃើញរូបសំណាកតោដ៏ធំនេះស្ថិតនៅទីតាំងកំពុងបោសសម្អាតគ្រាប់ដេីម្បីអនុវត្តគំរោងអភិវឌ្ឍនៃការដ្ឋានសាងសង់អាងស្តុកទឹកក្រោមដីនិងសាងសង់ស្ថានីយបូមទឹកទី៦ របស់រាជធានីភ្នំពេញ ដែលគាំទ្រដោយទីភ្នាក់ងារសហប្រតិបត្តិការអន្តរជាតិជប៉ុន (JICA) នៅខាងមុខក្រុមប្រឹក្សាអភិវឌ្ឍន៍កម្ពុជាជាប់មាត់ទន្លេ ។ កម្លាំងស៊ីម៉ាក់បានជីកដីប៉ះចំរូបចម្លាក់តោថ្មបុរាណដែលមានកម្ពស់ជាង២.៥ម៉ែត្រទំហំដងខ្លួនជាង១ម៉ែត្រ និងបានប្រគល់តោថ្មនេះ ជូនទៅរដ្ឋបាលរាជធានីភ្នំពេញក្នុងការគ្រប់គ្រងបន្ត និងសូមជូនពរសំណាងល្អគ្រប់ៗគ្នា នៅថ្ងៃកាន់បិណ្ឌទី២នេះ ។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ សហការជាមួយនឹងមន្ត្រីជំនាញមន្ទីរវប្បធ៌មនិងវិចិត្រសិល្បៈរាជធានីភ្នំពេញ ចុះមកមើលយ៉ាងយកចិត្តទុកដាក់ផងដែរ ។ ការប្រទះឃើញនេះដែរបានបង្ករការភ្ញាក់ផ្អើលកើតឡើងកាលពីវេលាម៉ោង៤និង៣០នាទីរសៀលនៅចំណុចការដ្ឋានស្តុបទឹកស្អាត គម្រោងរបស់ប្រទេសជប៉ុន មាត់ទន្លេ វិថីព្រះស៊ីសុវត្ថិ សង្កាត់ស្រះចក ខណ្ឌដូនពេញ ។
តាមប្រភពព័ត៌មានពីបុរសម្នាក់បានប្រាប់ឱ្យដឹងថា មុនពេលប្រទះឃើញ រូបគាត់បានប្រើគ្រឿងចក្រមួយគ្រឿងរបស់ស៊ីម៉ាក់ កាយដីធ្វើអាងស្តុកទឹកស្អាតនៅក្នុងការដ្ឋាន ។ លុះពេលកាយដីបានជម្រៅប្រមាណជាង២ម៉ែត្រក៏ប៉ះចំដុំថ្មធំមួយដុំ ដោយមិនបានដឹងថាជាដុំថ្មអ្វីឡើយ ហើយក៏បានកាយដីរកមើលក៏ស្រាប់តែបានប្រទះឃើញរូបសំណាកតោថ្មធំមួយ ដែលសង្ស័យជាវត្ថុបុរាណក៏ខាងការដ្ឋាននាំគ្នារាយការណ៍ទៅប្រាប់កម្លាំងមានសម្ថកិច្ចមូលដ្ឋានឱ្យចុះមកមើលតែម្តង ។
ក្រោយពីទទួលបានដំណឹងនេះរួចហើយ ក្រោមការដឹកនាំ របស់លោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ និងមន្ត្រីជំនាញមន្ទីរវប្បធម៌ និងវិចិត្រសិល្បៈរាជធានីភ្នំពេញចុះមកដល់ សហការជាមួយខាងការដ្ឋានស្ទូចយកមកដាក់ខាងលើ ដើម្បីធ្វើការលាងសម្អាតនិងត្រួតពិនិត្យ ។ តាមប្រភពដដែលបានប្រាប់បន្តទៀតថា ពាក់ព័ន្ធទៅនឹងរូបសំណាកតោថ្មនេះដែរ នៅមិនទាន់បានដឹងថា កសាងឡើងនៅឆ្នាំណា និងកសាងពីប្រភេទថ្មអ្វីឡើយ ដោយរង់ចាំបញ្ជូនបន្តទៅខាងក្រសួងវប្បធម៌ និងវិចិត្រសិល្បៈធ្វើការពិនិត្យបន្តទៀត ៕
ចែករំលែកព័តមាននេះ