រាជធានីភ្នំពេញ ៖ រូបសំណាក «តោ» ធ្វើអំពីថ្មធំមួយដែលគេសង្ស័យជាវត្ថុបុរាណ ត្រូវបានប្រទះឃើញ កប់ក្នុងដីនៅក្នុងការដ្ឋានអាងស្តុបទឹកស្អាតមាត់ទន្លេ ដែលជាគម្រោងការដ្ឋារបស់ប្រទេសជប៉ុន ខណៈដែលគ្រឿងចក្ររបស់គម្រោងអភិវឌ្ឍន៍ស៊ីម៉ាក់មួយគ្រឿងកំពុងកាយដី។ ដោយមានការសង្ស័យ…
រាជធានីភ្នំពេញ ៖ រូបសំណាក «តោ» ធ្វើអំពីថ្មធំមួយដែលគេសង្ស័យជាវត្ថុបុរាណ ត្រូវបានប្រទះឃើញ កប់ក្នុងដីនៅក្នុងការដ្ឋានអាងស្តុបទឹកស្អាតមាត់ទន្លេ ដែលជាគម្រោងការដ្ឋារបស់ប្រទេសជប៉ុន ខណៈដែលគ្រឿងចក្ររបស់គម្រោងអភិវឌ្ឍន៍ស៊ីម៉ាក់មួយគ្រឿងកំពុងកាយដី។ ដោយមានការសង្ស័យ ក៏បានរាយការណ៍ប្រាប់កម្លាំងមានសមត្ថកិច្ចដោយមានវត្តមានរបស់លោក សាំ ពិសិដ្ឋ ប្រធានមន្ទីរ សាធារណៈការ និងដឹកជញ្ជូនរាជធានីភ្នំពេញ សហការជាមួយនឹងមន្ត្រីជំនាញមន្ទីរវប្បធម៌ និងវិចិត្រសិល្បៈរាជធានីភ្នំពេញ ចុះមកមើលយ៉ាងយកចិត្តទុកដាក់ផងដែរ។
ការប្រទះឃើញនេះដែរ បានបង្ករការភ្ញាក់ផ្អើលកើតឡើងកាលពីវេលាម៉ោង៤ និង៣០នាទី ថ្ងៃទី០៤ ខែកញ្ញា ឆ្នាំ២០១០ នៅចំណុចការដ្ឋានស្តុបទឹកស្អាត គម្រោងរបស់ប្រទេសជប៉ុន មាត់ទន្លេ ផ្លូវព្រះស៊ីសុវត្ថិ សង្កាត់ស្រះចក ខណ្ឌដូនពេញ។ តាមប្រភពព័ត៌មានពីបុរសម្នាក់បានប្រាប់ឱ្យដឹងថា មុនពេលកើតហេតុ រូបគាត់បានប្រើគ្រឿងចក្រមួយគ្រឿងរបស់ស៊ីម៉ាក់ កាយដីធ្វើអាងស្តុកទឹកស្អាតនៅក្នុងការដ្ឋាន ដែលជាគម្រោងរបស់ប្រទេសជប៉ុន។
លុះពេលកាយដីបានជម្រៅប្រមាណជាជាង ២ម៉ែត្រ ក៏ប៉ះចំដំថ្មធំមួយដុំ ដោយមិនបានដឹងថា ជាដំថ្មអ្វីឡើយ ហើយក៏បានកាយដីរកមើល ក៏ស្រាប់តែបានប្រទះឃើញរូប«តោ»ធំមួយ ដែលសង្ស័យជាវត្ថុបុរាណ ក៏ខាងការដ្ឋាននាំគ្នារាយការណ៍ ទៅប្រាប់កម្លាំងមានសមត្ថកិច្ចមូលដ្ឋានឲ្យចុះមកមើលតែម្តង។ ក្រោយពីទទួលបានដំណឹងនេះរួចហើយ ក្រោមការដឹកនាំរបស់លោក សាំ ពិសិដ្ឋ ប្រធានមន្ទីរសាធារណៈការ និងដឹកជញ្ជូនរាជធានីភ្នំពេញ និងមន្ត្រីជំនាញមន្ទីរវប្បធម៌ និងវិចិត្រសិល្បៈរាជធានីភ្នំពេញចុះមកដល់ សហការជាមួយខាងការដ្ឋាន ស្ទូចយកមលដាក់ខាងលើ ដើម្បីធ្វើការលាងសម្អាត និងត្រួតពិត្យ។
ដោយរូបសំណាកតោថ្មនេះ មានទំហំទទឹងប្រវែង ១ម៉ែត្រ និងកំម្ពស់ ២,៣០ម៉ែត្រ ទម្ងន់ប្រមាណជាជាង ១តោន។ តាមប្រភពដដែលបានប្រាប់បន្តទៀតថា ពាក់ពន្ធ័ទៅនឹងរូបសំណាក «តោថ្ម»នេះដែរ នៅមិនទាន់បានដឹងថា កសាងឡើងនៅឆ្នាំណា និងអំពីប្រភេទថ្មអ្វីឡើយ ដោយរង់ចាំបញ្ជូនបន្ត ទៅខាងក្រសួងវប្បធម៌ និងវិចិត្រសិល្បៈធ្វើការស្រាវជ្រាវជាបន្តទៀត៕ ដោយ ៖ ភី ផល
ចែករំលែកព័តមាននេះ