អូស្ត្រាលីអះអាងថា កម្ពុជា និងប្រទេសមួយចំនួនមានសិទ្ធិទទួលវ៉ាក់សាំងកូវីដ១៩ តាមរយៈ COVAX AMC
- ភ្នំពេញ
រាជធានីភ្នំពេញ ៖ នៅថ្ងៃទី៤ ខែកញ្ញា ឆ្នាំ២០២០ ឯកអគ្គរាជទូតអូស្ត្រាលីលោក Pablo Kang បាន ឲ្យដឹងថា…
រាជធានីភ្នំពេញ ៖ នៅថ្ងៃទី៤ ខែកញ្ញា ឆ្នាំ២០២០ ឯកអគ្គរាជទូតអូស្ត្រាលីលោក Pablo Kang បាន ឲ្យដឹងថា…
រាជធានីភ្នំពេញ ៖ នៅថ្ងៃទី៤ ខែកញ្ញា ឆ្នាំ២០២០ ឯកអគ្គរាជទូតអូស្ត្រាលីលោក Pablo Kang បាន ឲ្យដឹងថា ជុំវិញបញ្ហាជំងឺកូវីដ១៩ គឺទាមទារឲ្យប្រទេសនានាធ្វើការរួមគ្នា ដើម្បីកំចាត់វីរុសនេះបានអស់ ។
ហេតុដូច្នេះហើយ យើងត្រូវការវ៉ាក់សាំងដែលមានសុវត្ថិភាព ប្រសិទ្ធភាព និងអាចទទួលបានសម្រាប់មនុស្សទាំងអស់ក្នុងនោះផងដែរ កម្ពុជា និងប្រទេសមួយចំនួនមានសិទ្ធិទទួលបានវ៉ាក់សាំងកូវីដ១៩ តាមរយៈកម្មវិធីមួយឈ្មោះថា COVAX AMC ។
ប្រកាសព័ត៌មានរបស់ស្ថានទូតអូស្ត្រាលីប្រចាំនៅកម្ពុជាចុះថ្ងៃទី៤ កញ្ញា បានស្រង់សម្តីលោក Pablo Kang ថា «ការធានាបាននូវលទ្ធភាពស្មើគ្នាក្នុងការទទួលបានវ៉ាក់សាំង និងដើរតួនាទីយ៉ាងសំខាន់ក្នុងការធ្វើឱ្យប្រសើរឡើងនូវអនាគតរបស់ប្រទេសកម្ពុជា អូស្ត្រាលី និងតំបន់រួមរបស់យើង នៅពេលដែលរដ្ឋាភិបាលរបស់យើងកំពុងដោះស្រាយជាមួយនឹង ការស្តារសេដ្ឋកិច្ច និងសង្គមឡើងវិញពីជំងឺរាតត្បាតនេះ» ។
ប្រភពដដែលបានបន្តថា កាលពីសប្តាហ៍មុន រដ្ឋមន្ត្រីការបរទេស និងជារដ្ឋមន្ត្រីកិច្ចការនារីរបស់អូស្ត្រាលី លោកស្រី Marise Payne បានប្រកាសផ្តល់ថវិកាចំនួន ៨០ លានដុល្លារអូស្ត្រាលី ឧបត្ថម្ភសម្រាប់ការទទួលបានវ៉ាក់សាំងប្រកបដោយសមធម៌ នៅក្នុងតំបន់អាស៊ីអាគ្នេយ៍ និងប៉ាស៊ីហ្វិក ។ ការវិនិយោគនេះ ផ្អែកលើប្រវត្តិរឹងមាំរបស់អូស្ត្រាលីក្នុងការតស៊ូមតិ ដើម្បីធានាបានផលប្រយោជន៍សន្តិសុខសុខមាលភាព របស់បណ្តាប្រទេសនានា ក្នុងតំបន់របស់យើង ជាអាទិភាពតាមរយៈតួនាទីរបស់យើងជាអនុប្រធានក្រុមប្រឹក្សាភិបាល Gavi ។
ថវិកាចំនួន ៨០ លានដុល្លារអូស្ត្រាលីនេះ នឹងធានាថាសម្ព័ន្ធ Gavi COVAX Facility Advance Market Commitment (COVAX AMC) មានថវិកាដែលខ្លួនត្រូវការដើម្បីធ្វើឱ្យប្រសើរឡើងនូវលទ្ធភាពទទួលបានវ៉ាក់សាំងការពារជំងឺកូវីដ-១៩ ដែលមានប្រសិទ្ធិភាព និងមានតម្លៃសមរម្យ សម្រាប់បណ្តាប្រទេសអាស៊ីអាគ្នេយ៍ និងប៉ាស៊ីហ្វិក។ «គោលដៅរបស់យើងគឺ ប្រមូលវ៉ាក់សាំងចំនួនមួយពាន់លានដូស សំរាប់ប្រទេសកំពុងអភិវឌ្ឍន៍ ត្រឹមចុងឆ្នាំ ២០២១ ដើម្បីដោះស្រាយដំណាក់កាលធ្ងន់ធ្ងរនៃជំងឺរាតត្បាតនេះ។ ការប្រកាសថវិកាចំនួន ៨០ លានដុល្លារអូស្ត្រាលីនេះ គឺសម្រាប់តំបន់របស់យើង។ វាជួយបន្ថែមលើថវិកាចំនួន ៥០ លានដុល្លារអូស្ត្រាលី ដែលជាការវិនិយោគរយៈពេល ៥ ឆ្នាំក្នុងប្រព័ន្ធសុខាភិបាលនៅកម្ពុជា ក្នុងនាមជាដៃគូអន្តរជាតិដ៏សំខាន់មួយនៅក្នុងគម្រោងលើកកម្ពស់សមធម៌និងគុណភាពសុខាភិបាល H-EQIP» ។
នេះជាការលើកឡើងរបស់ឯកអគ្គរាជទូតអូស្ត្រាលីប្រចាំនៅកម្ពុជា។ លោកបានបន្តថា វាជាការពិត នៅពេលដែលនិយាយពីការរីករាលដាលនៃជំងឺរាតត្បាតនេះ យើងទាំងអស់គ្នានៅក្នុងនេះជាមួយ – ហើយក្នុងនាមជាប្រទេសជិតខាង កិច្ចសហប្រតិបត្តិការជិតស្និទ្ធរវាងអូស្ត្រាលី និងកម្ពុជា ពេលនេះមានសារៈសំខាន់ជាងពេលណាៗទាំងអស់ ។
ឯកអគ្គរាជទូតអូស្ត្រាលី បានបន្តថា «បណ្តាប្រទេសមួយចំនួននៅក្នុងតំបន់របស់យើង ឥឡូវនេះ មានសិទ្ធិទទួលបានវ៉ាក់សាំងតាមរយៈ COVAX AMC រួមមាន ឥណ្ឌូនេស៊ី ទីម័រខាងកើត កម្ពុជា ឡាវ មីយ៉ាន់ម៉ា ហ្វីលីពីន និងវៀតណាម។ នៅពេលមានវ៉ាក់សាំងហើយ យើងប្តេជ្ញាធានាថា COVAX AMC បែងចែកវ៉ាក់សាំងដល់ប្រទេសនានាដោយសមភាព ស្របនឹងការណែនាំពីអង្គការសុខភាពពិភពលោក។ ដំណើរការនេះនឹងមានពីរជំហាន» ។
ប្រភពដដែលបានបន្តថា ទីមួយ ប្រទេសដែលចូលរួមជាមួយ AMC នឹងអាចទទួលបានវ៉ាក់សាំងសម្រាប់អ្នកដែលមានហានិភ័យខ្ពស់ រហូតដល់ ២០ ភាគរយនៃចំនួនប្រជាជន។ នេះគឺជាជំហានដ៏សំខាន់មួយ ដែលនឹងអនុញ្ញាតឱ្យគេទទួលបានវ៉ាក់សាំងគ្រប់គ្រាន់ ដើម្បីជួយដល់់ប្រជាជនសំខាន់ៗ រួមទាំងបុគ្គលិកថែទាំសុខភាព និងក្រុមងាយរងគ្រោះ ដូចជាមនុស្សចាស់។ ទីពីរ បន្ទាប់ពីដំណាក់កាលដំបូងនេះ AMC នឹងពង្រីកវ៉ាក់សាំងការពារជំងឺកូវីដ-១៩ ដើម្បីផ្តល់លទ្ធភាពដល់ប្រជាជនកាន់តែច្រើន។ AMC នឹងដំណើរការរហូតដល់មួយទស្សវត្ស ដោយមានការពិនិត្យមើលឡើងវិញ នៅចុងឆ្នាំ ២០២៥ ។
ក្នុងនាមជាអនុប្រធានក្រុមប្រឹក្សាភិបាលនៃ Gavi ប្រទេសអូស្ត្រាលីនឹងបន្តធ្វើការតស៊ូមតិយ៉ាងមុតមាំ ដើម្បីទទួលបានលទ្ធផលល្អបំផុត នៅក្រោម COVAX AMC សម្រាប់តំបន់របស់យើង។ ប្រទេសដែលមានសិទ្ធិ រួមទាំងប្រទេសកម្ពុជា អាចបង្ហាញចំណាប់អារម្មណ៍ក្នុងការចូលរួមក្នុង AMC ដោយផ្ទាល់ទៅកាន់ Gavi ។ សូមបញ្ជាក់ថា ប្រជាជនកម្ពុជាក្រីក្រជាង ២,៤ លាននាក់ នៅតែបន្តទទួលបានការឧបត្ថម្ភធនសុខភាពដែលជាលទ្ធផលពីគម្រោង H-EQIP ។
ហើយគម្រោង H-EQIP ក្រោមការដឹកនាំរបស់ក្រសួងសុខាភិបាល កំពុងជំរុញកំណែទម្រង់គួរឱ្យចាប់អារម្មណ៍ ដើម្បីធ្វើឱ្យប្រសើរឡើងនូវគុណភាពសេវាកម្ម នៅតាមមណ្ឌលសុខភាព និងមន្ទីរពេទ្យ ទូទាំងប្រទេស។ គម្រោង H-EQIP ក៏បានធ្វើឱ្យយើងប្រមូលបាន ថវិកាអូស្ត្រាលី ចំនួន ១៤ លានដុល្លារអូស្ត្រាលី បន្ទាន់ភ្លាម សម្រាប់ក្រសួងសុខាភិបាល ដើម្បីទិញសម្ភារៈចាំបាច់ ដើម្បីជួយដល់ការឆ្លើយតបទៅនឹងជំងឺកូវីដ-១៩ ព្រមទាំងការទិញរថយន្តសង្គ្រោះបន្ទាន់ថ្មីចំនួន ២០ គ្រឿងដែលបច្ចុប្បន្នបានមកដល់ប្រទេសកម្ពុជាហើយ ៕
ចែករំលែកព័តមាននេះ