រាជធានីភ្នំពេញ ៖ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គទ្រង់ព្រះសម្តែងនូវព្រះរាជហរទ័យបារម្ភពីការធ្លាក់ចុះនូវសីលធម៌…
រាជធានីភ្នំពេញ ៖ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គទ្រង់ព្រះសម្តែងនូវព្រះរាជហរទ័យបារម្ភពីការធ្លាក់ចុះនូវសីលធម៌ គុណធម៌ និងសេចក្តីថ្លៃថ្នូរ ដែលធ្វើឲ្យប៉ះពាល់យ៉ាងធ្ងន់ធ្ងរដល់សេចក្តីថ្លៃថ្នូរ និងនិរន្តរភាព នៃវប្បធម៌ និងចីរភាពរបស់សង្គម ។
ព្រះបរមរាជឱង្ការដ៏ខ្ពង់ខ្ពស់បំផុត មានអត្ថន័យទាំងស្រុងដូចតទៅ ៖ «បច្ចុប្បន្ននេះ សាកលលោកយើង កំពុងស្ថិតនៅក្នុងដំណាក់កាល នៃការរីកចម្រើន និងជឿនលឿន ដោយមានជំនាញខាងវិទ្យាសាស្ត្រ និងសម្ភារៈ ដែលមិនធ្លាប់មានពីមុនមក ។ ប៉ុន្តែ ទន្ទឹមនឹងការរីកចម្រើនខាងលើនេះ សីលធម៌ និងអភិសមាចារ (មារយាទដ៏ល្អក្រៃលែង ឬជ្រះថ្លា) ក្នុងជីវភាពសង្គម ក៏មានការស្រុតចុះ គួរឲ្យព្រួយបារម្ភណាស់ដែរ ។ ភាពអន់ថយ នៃសីលធម៌ និងគុណធម៌សង្គម នាំឲ្យមានការប៉ះពាល់យ៉ាងធ្ងន់ធ្ងរដល់សេចក្តីថ្លៃថ្នូរ និងនិរន្តរភាព នៃវប្បធម៌ និងចីរភាពរបស់សង្គមនិយម ទៅអនាគត» ។
ជាការកត់សម្គាល់ ការសម្តែងនូវក្តីបារម្ភ ក្នុងព្រះរាជហរទ័យរបស់ព្រះមហាក្សត្រ បានធ្វើឡើងបន្ទាប់ពីប៉ុន្មានថ្ងៃនេះ គេសង្កេតឃើញការកាប់ចាក់ សម្លាប់មនុស្ស និងអំពើឃាតកម្មផ្សេងៗ បានកើតឡើងជាបន្តបន្ទាប់ជាប់ៗគ្នា ដែលភាគច្រើននៃអំពើល្មើសទាំងនេះ ផ្តើមចេញពីការប្រើប្រាស់គ្រឿងញៀន និងភាពមិនចុះសម្រុង ដោយសារករណីផ្សេងៗទៀត ជាច្រើន ។
ជាក់ស្តែង ត្រឹមតែរយៈពេល ១០ថ្ងៃ ចុងក្រោយ (ថ្ងៃទី២៦ ខែសីហា ដល់ថ្ងៃទី០៤ ខែកញ្ញា) អំពើឃាតកម្មយ៉ាងសាហាវព្រៃផ្សៃធំៗ បានកើតឡើងជាបន្តបន្ទាប់ ចំនួន៧ករណី (នេះមិនទាន់គិតពីអំពើឃាតកម្មផ្សេងៗជាច្រើនទៀតផង) ដើមចម នៃអំពើឃាតកម្មធំៗនេះ គឺកើតឡើងដោយសារតែភ្លើងប្រចណ្ឌ និងស្ថិតក្រោមឥទ្ធិពល នៃគ្រឿងញៀន ។
ទី១ – ឃាតកម្ម ប្តីច្របាច់(ក)សម្លាប់កូនស្រី៣នាក់ និងចង(ក)ស្លាប់ខ្លួនឯង
ដោយសារតែប្តីប្រពន្ធរស់នៅមិនសូវចុះសម្រុងនឹងគ្នា ធ្វើឱ្យបុរសជាប្តីតែងតែប្រចណ្ឌប្រពន្ធរហូតដាច់ច្របាច់.ក កូនស្រីវ័យក្មេង៣នាក់ បណ្តាលឱ្យបាត់បង់ជីវិតក្នុងពេលតែមួយ រួចហើយក៏យកក្រមាចង.កខ្លួនឯងទៀតបង្កឱ្យមានការភ្ញាក់ផ្អើលកាលពីម៉ោង8យប់ ថ្ងៃទី26 ខែសីហា ឆ្នាំ2020 នៅបន្ទប់ជួលគ្មានលេខ ស្ថិតភូមិឧកញ៉ាវាំង ផ្លូវ1113 សង្កាត់ភ្នំពេញថ្មី ខណ្ឌសែនសុខ ។
ទី២- ឃាតកម្ម ចាក់សម្លាប់សង្សារ ជាកម្មការិនីរោងចក្រ រួចជនដៃដល់ ចង(ក)សម្លាប់ខ្លួន
គូស្នេហ៍១គូ បានស្រឡាញ់គ្នាតាំងពីនៅរៀនថ្នាក់វិទ្យាល័យមកម្ល៉េះ ក្រោយមក ខាងស្រីបានធ្វើជាកម្មការិនីរោងចក្រ ចំណែកឯខាងប្រុស ធ្វើជាជាងនៅក្នុងរោងចក្រដែក ប៉ុន្តែបន្តបន្ទាប់មកស្នេហាពួកគេ ក៏ត្រូវប្រះស្រាំដោយសារតែខាងប្រុសបែកចិត្ត ទៅមានស្រីថ្មីទៀត ។ លុះមកដល់ពេលថ្មីៗនេះ បុរសខាងលើ បានសុំមូលគ្នាជាមួយនាងវិញ ព្រមទាំងសុំចូលស្ដីដណ្ដឹងថែមទៀតផង ប៉ុន្តែត្រូវនាងនិងឪពុកម្ដយប្រកែកមិនឲ្យទេ ព្រោះខ្លាចរងការឈឺចាប់ទៀត ។បុរសនោះក៏បានឆាតរកនាងទាំងយប់ និងមានការឈ្លោះប្រកែកគ្នានៅតាមឆាតបណ្ដាញសង្គមហ្វេសប៊ុកទៀត លុះព្រឹកឡើងខណៈនាងជិះម៉ូតូទៅធ្វើការបុសនោះក៏បានជិះម៉ូតូដេញតាមចាក់សម្លាប់ បន្ទាប់មកបានជិះម៉ូតូចូលទៅក្នុងវត្តមួយរួចចងកសម្លាប់ខ្លួនតាមក្រោយ កាលវេលាម៉ោង៨និង៣០នាទីព្រឹកថ្ងៃទី២៨ ខែសីហា ឆ្នាំ២០២០ ។
ទី៣- ឃាតកម្ម កូនប្រុសអារ(ក)ម្ដាយបង្កើតខ្លួនឯង កាត់ក្បាលចេញពីខ្លួន
កូនប្រុសដៃដល់សម្លាប់ម្តាយបង្កើតបានឃាត់ខ្លួនហើយ ស្ថិតនៅចំណុចដីឡូត៍មួយកន្លែង ខាងក្រោយសាលា IU ក្នុងសង្កាត់ភ្នំពេញថ្មី ខណ្ឌសែនសុខ ក្រោយប្រជាពលរដ្ឋប្រទះឃើញដើរស្រាតនិងស្គាល់ភិនភាគជននេះ តាមរយៈការចុះផ្សាយព័ត៌មានក៏ផ្តល់ដំណឹងជូនសមត្ថកិច្ចភ្លាមៗតែម្តង នាថ្ងៃដដែលថ្ងៃទី២៩ សីហា នេះ ដោយនាំមកកាន់អធិការដ្ឋានខណ្ឌពោធិ៍សែនជ័យ ដើម្បីចាត់ការបន្ត ។
ទី៤- ឃាតកម្ម អារ(ក)សម្លាប់ក្មេងស្រីអាយុ១៤ឆ្នាំម្នាក់ រួចរំលោភតាមក្រោយ
ក្មេងស្រីម្នាក់សង្ស័យត្រូវបានឃាតក អារ.កសម្លាប់ រួចរំលោភតាមក្រោយ បណ្ដាលឲ្យស្លាប់ទាំងអាក្រាតកាយ នៅក្នុងថ្លុកឈាម ឮបង្កឲ្យមានការភ្ញាក់ផ្អើលវេលាម៉ោង៤៖០០ល្ងាច ថ្ងៃទី០១ ខែកញ្ញា ឆ្នាំ២០២០ នៅក្នុងបន្ទប់ជួលមួយកន្លែង ស្ថិតនៅភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ក្រោយមកជនដៃដល់ឈ្មោះ ឡាច ចន្ថា អាយុ២៥ឆ្នាំ ត្រូវកម្លាំងនគរបាលជំនាញចាប់ខ្លួនបាន នៅព្រឹកថ្ងៃទី០២ ខែកញ្ញា ឆ្នាំ២០២០ នៅចំណុចក្រោមស្ពានលីយ៉ុងផាត ភូមិកណ្តាល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ ជនដៃដល់បានសារភាពថា ខ្លួនបានយកកាំបិតចាក់បំពុងកជនរងគ្រោះ រួចឆក់បន្ថែមបណ្ដាលឲ្យស្លាប់ ទើបរំលោភតាមក្រោយ។ សមត្ថកិច្ចបញ្ជាក់ថា ជនដៃដល់ជាមនុស្សប្រើប្រាស់គ្រឿងញៀន ។
ទី៥. ឃាតកម្ម ចាក់សម្លាប់សង្សារ រួចអារ(ក)ខ្លួនឯង នៅបុរី លឹម ឈាងហាក់
ស្ដ្រីអ្នកលក់ដូរម្នាក់ ត្រូវសង្សារបស់ខ្លួនចាក់(ក)សម្លាប់ ក្នុងថ្លុកឈាម ខណៈជនដៃដល់ព្យាយាមអារ(ក)សម្លាប់ខ្លួនឯងតាមក្រោយ តែមិនស្លាប់គ្រានតែរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យ នៅល្ងាចថ្ងៃទី០៣ ខែកញ្ញា ឆ្នាំ២០២០ ស្ថិតក្នុងបុរីលឹម ឈាងហាក់ ចំការដូង ខណ្ឌដង្កោ រាជធានីភ្នំពេញ ។
ទី៦- ឃាតកម្ម ប្តីចាក់សម្លាប់ប្រពន្ធ រួចអារ(ក)ខ្លួនឯង នៅស្រុកអង្គស្នួល
មានរឿងឃាតកម្ម ចាក់សម្លាប់ប្រពន្ធខ្លួនឯង ហើយប្តីអារ(ក)ខ្លួនឯងតាមក្រោម រងរបួសធ្ងន់ ត្រូវបញ្ជូនទៅមន្ទីរពេទ្យ ដោយសារតែទើបបែកគ្នារយៈពេល១ខែមកហើយនោះ ប្តីសុំជានាគ្នាវិញ តែប្រពន្ធបដិសេធមិនព្រមទទួលយក ទើបកើតមានរឿងបែបនេះ ។ ហេតុការណ៍ខាងលើបានកើតឡើងនៅវេលាម៉ោង២០នឹង២៥នាទី យប់ថ្ងៃទី០៣ ខែកញ្ញា ឆ្នាំ២០២០ នៅចំណុចចិញ្ចើមផ្លូវជាតិលេខ៤ ភូមិព្រៃរកា ឃុំឆក់ឈើនាង ស្រុកអង្គស្នួល ខេត្តកណ្តាល ។
ទី៧- ឃាតកម្ម ប្តីកាប់ប្រពន្ធ៤ពូថៅ ឯប្តីរត់ទៅបញ្ចប់ជីវិតខ្លួនឯង
ករណីអំពើហិង្សាបានកើតឡើងជាបន្តបន្ទាប់ ជាក់ស្តែងលើកនេះ មន្ដ្រីយោធាម្នាក់បានកាប់ប្រហារភរិយាខ្លួនឯងចំនួន៤ពូថៅផ្ទួនៗ រួចទៅចង.កសម្លាប់ខ្លួនឯងតាមក្រោយ ដែលហេតុការណ៍ដ៏គួឲ្យភ្ញាក់ផ្អើលនេះបានកើតឡើងនៅម៉ោង១២ ថ្ងៃទី០៤ ខែកញ្ញា ឆ្នាំ ២០២០ ចំណុចភូមិត្រពាំងរំពាក់ ឃុំត្រាំកក់ ស្រុកត្រាំកក់ ខេត្តតាកែវ ៕
ចែករំលែកព័តមាននេះ