រាជធានីភ្នំពេញ ៖ បុរសម្នាក់យកម៉ូតូខ្លួនទៅបញ្ចាំឱ្យទៅអ្នកធ្វើការជាមួយគ្នាម្នាក់ទៀតបាន៣ខែ ក្រោយមកក៏ឆ្លៀតឱកាសពេលម្ចាស់ម៉ូតូក្រោយទៅធ្វើការបាត់ បុរសរូបនេះក៏បានចូលទៅឆ្កឹះសោបន្ទប់ រួចយកម៉ូតូមួយគ្រឿងបញ្ជូនទៅឱ្យអង្គការដែលជនសង្ស័យខ្ចីលុយដើម្បីទិញម៉ូតូវិញ លុះម្ចាស់ម៉ូតូថ្មីមានការសង្ស័យក៏ឃាត់ឱ្យសមត្ថកិច្ចធ្វើការសាកសួរ បង្កឱ្យមានការភ្ញាក់ផ្អើលកាលពីម៉ោង៧និង៣០យប់ ថ្ងៃទី៣ ខែកញ្ញា ឆ្នាំ២០២០ ស្ថិតនៅភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ ។
ជនសង្ស័យខាងលើមានឈ្មោះ ធួន ប៉ុនធឿន ភេទប្រុស អាយុ២១ឆ្នាំ មុខរបរកម្មកររោងចក្រ ស្នាក់នៅបន្ទប់ជួលភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើតនៅភូមិ បាក់ទូក ឃុំក្តីដូង ស្រុកកំពង់ស្វាយ ខេត្តកំពង់ធំ។ ចំណែកជនរងគ្រោះឈ្មោះ ហេង ទូច ហៅស្រីលក្ខណ៍ ភេទស្រី អាយុ២៦ឆ្នាំ មុខរបរកម្មកររោងចក្រ ស្នាក់នៅបន្ទប់ជួលជិតគ្នាជាមួយជនសង្ស័យដែរ មានស្រុកកំណើត ភូមិជេទុក ឃុំ ក្រែក ស្រុកពញាក្រែក ខេត្តកំពង់ចាម។
តាមប្រភពពីស្ត្រីរងគ្រោះជាអ្នកទទួលបញ្ចាំម៉ូតូពីជនសង្ស័យបានឱ្យដឹងថា រូបគាត់ និងជនសង្ស័យជាអ្នកធ្វើការជាមួយគ្នា ហើយស្នាក់នៅបន្ទប់ជួលជិតគ្នាទៀត លុះមុនពេលកើតហេតុ នៅប្រមាណជា៣ខែមុន ជនសង្ស័យរូបនេះបានយកម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរី២០២០ មកបញ្ចាំឱ្យគាត់ដោយបានប្រាប់ថា «ខ្លួនត្រូវការលុយសំរាប់ព្យាបាលម្តាយឈឺនៅឯស្រុកកំណើត ហើយកាតគ្រីម៉ូតូនេះនៅឯស្រុកកំណើតឯណោះ» ។
ស្ត្រីរងគ្រោះបន្តថា នៅពេលនោះរូបគាត់មានការអាណិតអាសូរ ក៏បានទទួលបញ្ចាំម៉ូតូខាងលើដោយឱ្យលុយជនសង្ស័យចំនួន៥០០ដុល្លារ ហើយក្នុង១ខែជនសង្ស័យត្រូវបង់ការប្រាក់ឱ្យស្ត្រីរងគ្រោះចំនួន៥០ដុល្លាររហូតដល់ជនសង្ស័យត្រឡប់មកយកម៉ូតូវិញ ចំណែកឯរយៈពេលនៃការទទួលបញ្ចាំម៉ូតូនេះបាន៣ខែមកហើយ ប៉ុន្តែស្ត្រីរងគ្រោះទើបតែទទួលបានការប្រាក់ចំនួន១ខែប៉ុណ្ណោះ ។
ប្រភពដដែលបន្តទៀតថា លុះនៅម៉ោង២រសៀល ថ្ងៃទី៣ ខែកញ្ញានេះ ពេលរូបគាត់ និងប្តីត្រឡប់មកពីធ្វើការរោងចក្រវិញក៏ស្រាប់តែបាត់ម៉ូតូ ភ្លាមៗនោះផងដែរស្ត្រីរងគ្រោះអ្នកទទួលបញ្ចាំម៉ូតូបានរត់ទៅប្តឹងសមត្ថកិច្ច ដោយមានការសង្ស័យទៅលើជនសង្ស័យដែលជាអ្នកយកម៉ូតូមកបញ្ចាំខាងលើ តែជនសង្ស័យមិនសារភាពទេ ។
ប្រភពដដែលបន្តថា ក្រោយមកទាល់តែសមត្ថកិច្ចនាំជនសង្ស័យខាងលើទៅប៉ុស្ដិ៍នគរបាលចោមចៅទី៣ ធ្វើការសាកសួរ ទើបជនសង្ស័យបានឆ្លើយសារភាពថា ខ្លួនបានលួចម៉ូតូខាងលើនោះមែន ដោយសារតែខ្លួនទាល់ពេក ព្រោះម៉ូតូខាងលើនេះគាត់ទិញបង់រំលោះទេ គឺខ្ចីលុយអង្គការទិញ ហើយមិនបានបង់ការប្រាក់ និងប្រាក់ដើមក្នុងមួយខែជាង១០០ដុល្លារនេះចំនួន៣ខែមកហើយ ទើបអង្គការតម្រូវឲ្យដកហូតយកម៉ូតូវិញ រូបគាត់ក៏សម្រេចចិត្តលួចម៉ូតូដែលយកទៅបញ្ចាំទៅឲ្យអង្គការវិញ ។
ក្រោយពេលកើតហេតុ ជនសង្ស័យជាម្ចាស់ម៉ូតូត្រូវបានសមត្ថកិច្ចឃាត់ខ្លួន ដើម្បីកសាងសំណុំរឿងបញ្ជូនទៅផ្នែកជំនាញព្រហ្មទណ្ឌខណ្ឌពោធិ៍សែនជ័យ ចាត់ការតាមនីតិវិធីបន្ត៕
ចែករំលែកព័តមាននេះ